31 нафар битирувчиларга олтин ва кумуш медаллари топширилди ҳамда инглиз тили бўйича 122 нафар B2 сертификати эгалари тақдирланди

Жорий йилнинг 20 июнь санасида Амударё тумани Маданият бўлими биносида умумтаълим мактабларини олтин ва кумуш медалларга тамомлаган ҳамда инглиз тилини билиш даражаси бўйича B2 сертификатига эга бўлган битирувчи ёшларни тақдирлаш маросими бўлиб ўтди.

Тақдирлаш маросимида туман ҳокимининг иқтисодий тараққиёт ва камбағалликни қисқартиш масалалари бўйича 1-ўринбосари Камилжан Айтбоев, туман ҳокимининг ёшлар сиёсати ва ижтимоий ривожлантириш ва маънавий-маърифий ишлар бўйича ўринбосари Нодирбек Камолов, туман Маънавият ва маърифат маркази раҳбари Ислом Маткаримов, Мактабгача ва мактаб таълими бўлими бошлиғи Ялғаш Шомуратовлар, ҳокимлик ва прокуратура масъул ходимлари, ёшлар ҳамда уларнинг ота-оналари иштирок этдилар.

Туман ҳокимининг биринчи ўринбосари Камилжан Айтбоев туман ҳокимининг битирувчи ёшларга йўллаган табригини ўқиб эшиттирди. Ҳоким ўринбосари ўз сўзида бугунги кунда ёшларнинг сифатли таълим-тарбия олишлари, ўз иқтидор ва қобилиятларини юзага чиқаришлари, етук билим ва салоҳиятга эга, баркамол авлод бўлиб вояга етишлари учун яратилаётган шарт-шароитлар ҳамда имкониятлар хусусида тўхталиб ўтди. Сўзи якунида ёшларни ютуқлари билан самимий табриклади ҳамда уларга катта ҳаёт йўлида, келгусидаги ўқиш ва ишларида омад ва зафарлар тилади.

Ҳоким ўринбосарлари ҳамда масъул раҳбарлар олтин ва кумуш медаллар билан жорий йилги ўқув йилини муваффақиятли тамомлаган, инглиз тили бўйича B2 сертификатига эга бўлган битирувчи ёшларга медалларни, ташаккурнома ҳамда эсдалик совғаларни тантанали равишда топширдилар. Қайд этиш жоизки, жорий йилда туман бўйича 2963 нафар ёшлар умумтаълим мактабларини тамомлаган бўлиб, уларнинг 27 нафари олтин, 4 нафари кумуш медаллар соҳиблари бўлдилар.

Маълумот ўрнида, олтин медаль умумий ўрта таълим муассасаларининг 9-синфини битирганлик тўғрисидаги аъло даражали шаҳодатномаси мавжуд бўлган, умумий ўрта таълим муассасаларининг 10- ва 11-синфларида барча фанлар бўйича якуний назоратлар, чораклик ва йиллик баҳолари аъло бўлган ёки академик лицейларнинг барча курсларида барча фанлар бўйича якуний назоратлар, ярим йиллик ва йиллик баҳолари аъло бўлган, намунали хулқ-атворли ва жамоат ишларида фаоллик кўрсатган битирувчиларга берилади.

Кумуш медаль умумий ўрта таълим муассасаларининг 9-синфини битирганлик тўғрисидаги аъло даражали шаҳодатномаси мавжуд бўлган, умумий ўрта таълим муассасаларининг 10- ва 11-синфларида ёки академик лицейларнинг барча курсларида барча фанлар бўйича йиллик баҳолари аъло бўлган, намунали хулқ-атворли ва жамоат ишларида фаоллик кўрсатган битирувчиларга берилади.

Таъкидлаш жоизки, мамлакатимизда ёшларнинг ОТМларда таълим олишлари учун яратилаётган имконият ва қулайликлар натижасида туманимиз ёшларининг олий таълим олишга бўлган қизиқишлари йилдан йилга ортиб бормоқда. Илмга чанқоқ ёшларимизнинг нафақат республикмиздаги, балки чет давлатлардаги ОТМларда ўқишга кириш кўрсаткичлари тобора ортиб бормоқда. Сўровномалар натижаларига кўра жорий йилги ўқув йилида туманимиздаги умумтаълим мактабларини тамомлаган 2963 нафар ёшлардан 2856 нафари, яни 96,3 фоизи ОТМларга ҳужжат топширишган.

Мамлакатимизда ёшларнинг чет тилини мукаммал ўрганишларига катта эътибор қаратилиб, таълим соҳасидаги энг устувор масалалардан бири сифатида қаралмоқда. Амударёлик ёшлар чет тили билимларини чуқур эгаллаш бўйича республикада энг пешқадамлар сафида бормоқда.

Чарос Арслонова, туман ҳокимлигининг Ахборот хизмати раҳбари.