Amudaryo tumani “Barkamol avlod” bolalar maktabi tomonidan 2023-2024 oʻquv yili yakuniga bagʻishlangan “Yil sarhisobi” tadbiri oʻtkazildi

Amudaryo tumani “Barkamol avlod” bolalar maktabi faoliyatini boshlagan ilk yillardan buyon tumanimiz yoshlarining sevimli manziliga aylangan. Bugungi kunda maktabda “Madaniyat va sanʼat”, “Texnika, konstruktorlik va modellashtirish”, “Jismoniy tarbiya va sport”, “Xunarmandchilik va qoʻl mehnati”, “Turizm va ekologiya”, “Oliy taʼlim muassasalari va maktabga tayyorlov” hamda “Chet tillari” kabi toʻgaraklar mavjud boʻlib, mazkur toʻgaraklarda jami 1668 nafar oʻquvchi-yoshlar maktab taʼlimidan tashqari qiziqishlariga koʻra bilim olishyapti. Bolalar boʻsh vaqtlarini mazmunli oʻtkazishlari uchun maktabda barcha shart-sharoitlar yaratilgan.

Yaqinda Mangʻit shahridagi Madaniyat va istirohat bogʻida tuman “Barkamol avlod” bolalar maktabi tomonidan 2023-2024 oʻquv yili yakunlanishi munosabati bilan “Yil sarhisobi” nomli tadbir tashkil etildi. Shuningdek, shu kuni tuman va mamlakat miqyosida oʻtkazilgan koʻrik-tanlovlarning gʻoliblari boʻlgan “Estrada-vokal” toʻgaragi aʼzolaridan iborat “Shox bolalar” jamoasi tashkil topganining 10 yilligi ham nishonlandi.

Tadbirda “Barkamol avlod” bolalar maktabi direktori, toʻgaraklarning rahbarlari, oʻquvchi-yoshlar va ularning ota-onalari ishtirok etishdi.

Tadbirni maktab direktori Xonimjon Rajabova ochib, oʻtgan oʻquv yili davomida erishilgan yutuqlar haqida, “Barkamol avlod” bolalar maktablarining oʻsib kelayotgan yosh avlod taʼlim-tarbiyasida tutgan oʻrni xususida fikr-mulohazalarini bildirdi.

Shundan keyin toʻgarak aʼzolarining tadbir uchun tayyorlagan chiqishlariga navbat berildi. “Estrada-vokal” toʻgaragi aʼzolaridan iborat “Shoʻx bolalar” jamoasining iqtidorli oʻquvchilari tomonidan begʻubor yoshlik, ona Vatan, qadrdon maktab madhi tarannum etilgan shoʻx qoʻshiqlar ijro qilindi. Bu qoʻshiqlarda bolalarning begʻubor tuygʻulari, orzu-istaklari, oʻz ifodasini topgan. Shuningdek, milliy liboslarga burkangan “Milliy raqs” toʻgaragi aʼzolari boʻlgan qizlar ijrosidagi guruh raqslari ham mehmonlar koʻngliga zavq ulashdi. Milliy libos va milliy qoʻshiqlar uygʻunligi xalqimizning oʻlmas qadriyatlarini oʻzida aks ettirdi. Tomoshabinlar yoshlarni qoʻllab, ular bilan birgalikda kuylashdi va davomli qarsaklar bilan olqishladilar.

Tabir yakunida 2023-2024 oʻquv yili davomida mashgʻulotlarga doimiy qatnashgan 867 nafar oʻquvchilarga guvohnomalar topshirildi. Maktab direktori Xonimjon Rajabova tomonidan “Barkamol avlod” bolalar maktabining faxriga aylangan “Shoʻx bolalar” jamoasining isteʼdodli yoshlari eʼtirof etilib, yosh sanʼatkorlar estadik sovgʻalar bilan taqdirlandi.

Maʼlumot oʻrnida aytishimiz joizki, oʻtgan oʻquv yili davomida maktab oʻquvchilari qator yutuqlarni qoʻlga kiritdi. Xususan, joriy yilning 21-may kuni “Boysun bahori” bolalar folklori koʻrik-tanlovining Qoraqalpogʻiston Respublikasi bosqichida “Estrada-vokal” toʻgaragi aʼzolaridan iborat “Shoʻx bolalar” jamoasi faxrli 2-oʻrinni qoʻlga kiritdi.

Maktabning “Biologiya” toʻgaragi aʼzolari boʻlgan Gulruh Endirboyeva biologiya fanidan va Sarvinoz Najmaddinova kimyo fanidan “Barkamol avlod” laureati” koʻrik-tanlovining Qoraqalpogʻiston Respublikasi bosqichida faxrli 2-oʻrinni egalladilar. Shuningdek, maktabda oʻtkazilayotgan har xil tadbirlarda oʻquvchilar faol ishtirok etib, oʻz isteʼdodlarini namoyon qilishyapti.

“Yil sarhisobi” tadbirida ishtirok etgan ota-onalar “Barkamol avlod” bolalar maktabida farzandlarining isteʼdodi kamol topayotganligini koʻrib mamnun boʻlishdi va toʻgarak rahbarlariga oʻz minnatdorchiliklarini bildirishdi. Fursatdan foydalanib, tumanimizdagi barcha yoshlarni maktabda tashkil qilingan toʻgaraklarga taklif qilib qolamiz.

Shokirjon Xudoyberganov, “Barkamol avlod” bolalar maktabi uslubiy boʻlim boshligʻi.