Амударё тумани “Баркамол авлод” болалар мактаби томонидан 2023-2024 ўқув йили якунига бағишланган “Йил сарҳисоби” тадбири ўтказилди
Амударё тумани “Баркамол авлод” болалар мактаби фаолиятини бошлаган илк йиллардан буён туманимиз ёшларининг севимли манзилига айланган. Бугунги кунда мактабда “Маданият ва санъат”, “Техника, конструкторлик ва моделлаштириш”, “Жисмоний тарбия ва спорт”, “Хунармандчилик ва қўл меҳнати”, “Туризм ва экология”, “Олий таълим муассасалари ва мактабга тайёрлов” ҳамда “Чет тиллари” каби тўгараклар мавжуд бўлиб, мазкур тўгаракларда жами 1668 нафар ўқувчи-ёшлар мактаб таълимидан ташқари қизиқишларига кўра билим олишяпти. Болалар бўш вақтларини мазмунли ўтказишлари учун мактабда барча шарт-шароитлар яратилган.
Яқинда Манғит шаҳридаги Маданият ва истироҳат боғида туман “Баркамол авлод” болалар мактаби томонидан 2023-2024 ўқув йили якунланиши муносабати билан “Йил сарҳисоби” номли тадбир ташкил этилди. Шунингдек, шу куни туман ва мамлакат миқёсида ўтказилган кўрик-танловларнинг ғолиблари бўлган “Эстрада-вокал” тўгараги аъзоларидан иборат “Шох болалар” жамоаси ташкил топганининг 10 йиллиги ҳам нишонланди.
Тадбирда “Баркамол авлод” болалар мактаби директори, тўгаракларнинг раҳбарлари, ўқувчи-ёшлар ва уларнинг ота-оналари иштирок этишди.
Тадбирни мактаб директори Хонимжон Ражабова очиб, ўтган ўқув йили давомида эришилган ютуқлар ҳақида, “Баркамол авлод” болалар мактабларининг ўсиб келаётган ёш авлод таълим-тарбиясида тутган ўрни хусусида фикр-мулоҳазаларини билдирди.
Шундан кейин тўгарак аъзоларининг тадбир учун тайёрлаган чиқишларига навбат берилди. “Эстрада-вокал” тўгараги аъзоларидан иборат “Шўх болалар” жамоасининг иқтидорли ўқувчилари томонидан беғубор ёшлик, она Ватан, қадрдон мактаб мадҳи тараннум этилган шўх қўшиқлар ижро қилинди. Бу қўшиқларда болаларнинг беғубор туйғулари, орзу-истаклари, ўз ифодасини топган. Шунингдек, миллий либосларга бурканган “Миллий рақс” тўгараги аъзолари бўлган қизлар ижросидаги гуруҳ рақслари ҳам меҳмонлар кўнглига завқ улашди. Миллий либос ва миллий қўшиқлар уйғунлиги халқимизнинг ўлмас қадриятларини ўзида акс эттирди. Томошабинлар ёшларни қўллаб, улар билан биргаликда куйлашди ва давомли қарсаклар билан олқишладилар.
Табир якунида 2023-2024 ўқув йили давомида машғулотларга доимий қатнашган 867 нафар ўқувчиларга гувоҳномалар топширилди. Мактаб директори Хонимжон Ражабова томонидан “Баркамол авлод” болалар мактабининг фахрига айланган “Шўх болалар” жамоасининг истеъдодли ёшлари эътироф этилиб, ёш санъаткорлар эстадик совғалар билан тақдирланди.
Маълумот ўрнида айтишимиз жоизки, ўтган ўқув йили давомида мактаб ўқувчилари қатор ютуқларни қўлга киритди. Хусусан, жорий йилнинг 21 май куни “Бойсун баҳори” болалар фольклори кўрик-танловининг Қорақалпоғистон Республикаси босқичида “Эстрада-вокал” тўгараги аъзоларидан иборат “Шўх болалар” жамоаси фахрли 2-ўринни қўлга киритди.
Мактабнинг “Биология” тўгараги аъзолари бўлган Гулруҳ Эндирбоева биология фанидан ва Сарвиноз Нажмаддинова кимё фанидан “Баркамол авлод” лауреати” кўрик-танловининг Қорақалпоғистон Республикаси босқичида фахрли 2-ўринни эгалладилар. Шунингдек, мактабда ўтказилаётган ҳар хил тадбирларда ўқувчилар фаол иштирок этиб, ўз истеъдодларини намоён қилишяпти.
“Йил сарҳисоби” тадбирида иштирок этган ота-оналар “Баркамол авлод” болалар мактабида фарзандларининг истеъдоди камол топаётганлигини кўриб мамнун бўлишди ва тўгарак раҳбарларига ўз миннатдорчиликларини билдиришди. Фурсатдан фойдаланиб, туманимиздаги барча ёшларни мактабда ташкил қилинган тўгаракларга таклиф қилиб қоламиз.
Шокиржон Худойберганов, “Баркамол авлод” болалар мактаби услубий бўлим бошлиғи.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
