Amudaryo tumani Kambagʻallikni qisqartirish va bandlikka koʻmaklashish boʻlimida tegishli tashkilotlar bilan hamkorlikda mehnat yarmarkasi tashkil etildi

Bugungi kunda aholini ish bilan taʼminlash, yangi ish oʻrinlarini yaratish, qonuniy mehnat faoliyatiga jalb etish dolzarb masalalardan hisoblanadi. Mamlakatimizda sohaga doir belgilangan vazifalar tizimli ravishda bajarilib, aholi, ayniqsa, yoshlarni ish bilan band qilishga alohida eʼtibor qaratilmoqda.

Amudaryo tumani Kambagʻallikni qisqartirish va aholi bandligiga koʻmaklashish boʻlimi tomonidan doimiy tashkil qilib kelinayotgan mehnat yarmarkalari natijasida koʻplab ishsiz fuqarolar ish bilan taʼminlanyapti.

Joriy yilning 6-iyun kuni oʻtkazilgan boʻsh ish oʻrinlar mehnat yarmarkasi tuman Kambagʻallikni qisqartirish va bantlikka koʻmaklashish boʻlimi binosida Majburiy ijro byurosi tuman boʻlimi hamda tuman IIB Jamoat xavfsizligi xizmati probatsiya boʻlimi bilan hamkorlikda tashkil qilindi. Mazkur mehnat yarmarkasida tegishli mutasaddilar hamda ish bilan band boʻlmagan aholi vakillari ishtirok etdi.

Tadbirni Kambagʻallikni qisqartirish va bandlikka koʻmaklashish boʻlimi boshligʻi Rashid Salayev ochdi va olib bordi. U oʻz soʻzida mamlakatimizda aholi bandligiga koʻmaklashish, aholini ish bilan taʼminlash hamda yangi ish oʻrinlarini yaratish borasida olib borilayotgan islohatlar xususida toʻxtaldi.

Shuningdek, soʻzga chiqqan masʼullar tomonidan soʻnggi yillarda aholi bandligini taʼminlash yoʻlida joriy etilgan yangi mexanizmlarning natijadorligi, ehtiyojmand aholini mehnat faoliyatiga jalb qilishda qulay shart-sharoitlar yaratilayotgani, joylarda tegishli masʼullar tomonidan yoshlarning mavjud muammolari hal qilinib, bandligini taʼminlash borasida qator amaliy ishlar qilinayotgani alohida qayd etildi.

Mazkur yarmarkada tumanimizda faoliyat yuritayotgan 29 ta korxona va tashkilotlar jami 300dan ziyod boʻsh ish oʻrinlari bilan ishtirok etishdi. Mehnat yarmarkasiga tuman hududida istiqomat qiluvchi ishsiz fuqarolar, jumladan, aliment boʻyicha qarzdorligi mavjud boʻlgan hamda jazoni ijro etish muassasalaridan qaytgan aholi vakillari, shuningdek, ishsiz yoshlar va bandligi taʼminlanmagan oliy taʼlim muassasalarining bitiruvchilari tashrif buyurdi.

Mehnat yarmarkasida 50dan ortiq mehnatga layoqatli ishsiz fuqarolar ishtirok etishdi. Ularning 21 nafari doimiy ishga joylashtirilgan boʻlsa, 4 nafar yoshlar haq toʻlanadigan jamoat ishlariga jalb qilindi. Shuningdek, kasbga oʻqitish hamda mehnat qonunchiligiga doir masalalar yuzasidan 9 nafar fuqaroga maslahatlar berildi.

Bundan tashqari, Toʻlqin ovulida tashkil etilgan tikuvchilik yoʻnalishi boʻyicha qayta kasbga tayyorlov oʻquv kurslarini muvaffaqiyatli tugatgan 10 nafar fuqaroga maxsus sertifikatlar topshirildi.

Bu kabi mehnat yarmarkalarida aholinining ishsiz qatlami, ayniqsa yoshlar va ayollarning bandligi taʼminlanishiga, ularning daromad topishiga koʻmaklashish va turmush sharoitini yaxshilash imkonini beradi. Natijada jamiyatda ishsizlik kamayib, koʻplab koʻngilsiz holatlarning oldi olinishi mumkin.

Tadbir davomida masʼullar tomonidan fuqarolarning mehnat qonunchiligiga doir barcha savollariga tegishli javoblar qaytarildi hamda ishga joylashish yuzasidan zarur tavsiyalar berildi.

Rashid Salayev, tuman Kambagʻallikni qisqartirish va bandlikka koʻmaklashish boʻlimi boshligʻi