21-sonli bolalar musiqa va sanʼat maktabida hisobot kontserti boʻlib oʻtdi

Ayni kunlarda bolalar musiqa va sanʼat maktablarida 2023-2024 oʻquv yili yakunlari boʻyicha hisobot kontsertlari boʻlib oʻtmoqda. Anʼanaviy tarzda oʻtkaziladigan mazkur madaniy, badiiy-musiqiy tadbirda sanʼatsevar oʻquvchi-yoshlar oʻquv yili davomida oʻz yoʻnalishlari boʻyicha egallagan bilim va koʻnikmalarini, shu barobarida turli koʻrik-tanlovlarda qatnashish orqali erishgan yutuqlarini namoyish etishadi.

Amudaryo tumanining Qipchoq shaharchasida joylashgan 21-sonli bolalar musiqa va sanʼat maktabi sanʼatsevar yoshlarining oʻquv yili yakuniga bagʻishlangan hisobot kontserti har yilgidan ham joʻshqinlik bilan oʻtdi va nafaqat ularning ustozlari, balki ota-onalar hamda hudud aholisi uchun ham olam-olam zavq bagʻishladi.

“Musiqa iforlariga yoʻgʻrilgan yutuqlar” deb nomlangan hisobot kontsertini mazkur musiqa va sanʼat maktabi direktori Ahmadjon Jumaboyev ochdi va tadbir ishtirokchilari boʻlgan ota-onalarni, hududdagi umumtaʼlim maktablaridan tashrif buyurgan sanʼatsevar yoshlarni oʻquv yilining muvaffaqiyatli yakuni hamda 21-sonli bolalar musiqa va sanʼat maktabi oʻquvchilarining mazkur oʻquv yilida erishgan yutuqlari bilan samimiy tabrikladi.

Darvoqe, maktab oʻquvchilari yakunlangan oʻquv yili davomida quvonarli yutuqlarga erishdilar. Xususan, joriy yilning 17-may sanasida Oʻzbekiston davlat konservatoriyasining Nukus filialida boʻlib oʻtgan "Jayxun toʻlqinlari" xalq cholgʻulari Xalqaro festivalida maktabning xalq cholgʻulari orkestri jamoasi Qoraqalpogʻiston Respublikasidagi 24ta jamoa orasida faxrli 2-oʻrinni egalladi.

Shuningdek, yakunlanayotgan oʻquv yilida maktab oʻquvchilaridan 2-qashqar rubob sinfi oʻquvchisi Ogʻabek Qozoqov “Besh tashabbus olimpiadasi” musobaqalarining Qoraqalpogʻiston Respublikasi bosqichida faxrli 1-oʻrinni, 2-dutor sinfi oʻquvchisi Islombek Qozoqov esa 2-oʻrinni qoʻlga kiritdi. Bundan tashqari, Islombek Qozoqov "Kamalak yulduzlari" bolalar ijodiyoti koʻrik-tanlovining Respublika bosqichida 3-oʻrinni egallab, sovrindorlar safidan munosib joy oldi.

Shundan soʻng, turli yoʻnalishlarda tahsil olayotgan oʻquvchi-yoshlar ijrosidagi kontsert dasturi tomoshabinlar eʼtiboriga havola etildi. Hisobot kontserti dasturidan joy olgan oʻzbek va qoraqalpoq mumtoz navolari, jahon mumtoz sanʼatining durdona asarlari, zamonaviy estrada sanʼati va anʼanaviy ashulachilik yoʻnalishidagi dilbar kuylar mahorat bilan ijro etildi. Sanʼatsevar yoshlarning har bir chiqishi kontsertga oʻziga xos joziba bagʻishladi va tomoshabinlar har bir ijrochini olqishlar bilan qoʻllab-quvvatlab turdilar.

Hisobot kontsertida ishtirok etgan Amudaryo tuman hokimining oʻrinbosari Nodirbek Kamolov tumanimizda iqtidorli yoshlar kamol topayotganini alohida eʼtirof etib, 21-sonli bolalar musiqa va sanʼat maktabi oʻquvchilariga yangi-yangi yutuqlar tiladi.

Hisobot kontserti avvalida muassasa oʻquvchilari tomonidan tayyorlangan va oʻquv yili davomida erishilgan yutuqlar koʻrgazmasi orqali tadbir mehmonlari tasviriy sanʼat, musiqa, raqs va anʼanaviy xonandalik yoʻnalishlarida tahsil olayotgan oʻquvchi-yoshlarning oʻquv yili davomida erishgan yutuqlari, orzu-intilishlari bilan tanishdilar va oʻz taassurotlarini izhor etdilar.

Hisobot kontserti haqiqatdan ham har bir qalbni musiqiy iforlarga chulgʻadi.

Robiya Yoʻldosheva.