Nukus innovatsion institutida oʻtkazilgan ilmiy-nazariy anjumanda sohalardagi dolzarb masalalar muhokama qilindi

Oliy taʼlim muassasalarida tahsil olayotgan yoshlarning oʻz sohalari boʻyicha yetuk va bilimli mutaxassis kadrlar boʻlib yetishishlarida ularga dars berayotgan professor-oʻqituvchilarning taʼlim jarayonida zamonaviy ilm-fan yutuqlaridan faol foydalanishlari muhim ahamiyat kasb etadi. Oʻqituvchilarning oʻzaro tajriba almashishi, ilm-fan sohasidagi yangiliklar bilan yaqindan tanishishlarida esa ilmiy-nazariy anjumanlarning oʻrni beqiyos.

Ana shunday ilmiy-nazariy anjumanlarning navbatdagisi “Zamonaviy sharoitda oliy maʼlumotli mutaxassislarni tayyorlashning innovatsion yoʻnalishlari: muammo va yechimlar” mavzusida Nukus innovatsion institutida tashkil qilindi.

Dastlab xorijdan va Respublikamizning turli viloyatlardan tashrif buyurgan mehmonlar hamda anjuman ishtirokchilari institut rahbariyati tamonidan tantanali kutib olindi. Tashrif buyuruvchilarga qadriyatimizga aylangan anʼana – non-tuz tutildi. Yosh sozandalar ijrosida yangragan milliy kuylar va jarayon uchun maxsus tayyorlangan koʻrgazma tashkilotchilar tamonidan anjumanga puxta hozirlik koʻrilganining amaliy isboti boʻldi. Konferentsiyada respublikamizning turli hududlaridan yetakchi tadqiqotchilar Zoom ilovasi orqali onlayn tarzda ham ishtirok etishdi.

Anjumanning maqsadi yuqori malakali oliy maʼlumotli mutaxassislar tayyorlashning dolzarb muammolari va innovatsion yoʻnalishlarini muhokama qilish asnosida zamonaviy ilm-fan yutuqlarining ilgʻor tajribalarini amaliyotga joriy etish boʻyicha taklif va tavsiyalarni ishlab chiqishdan iborat.

Anjuman avvalida Nukus innovatsion instituti rektori Anvar Aʼzamov va bir qator mehmonlar soʻzga chiqib, oʻtkazilayotgan konferentsiyaning maqsadi va ahamiyati, bugungi kundagi oliy taʼlim tizimidagi kamchiliklar va maummolar haqida toʻxtaldi.

Institutning ilmiy ishlar va innovatsiyalar boʻyicha prorektori Alisher Yuldashev, Qoraqalpogʻiston Respublikasi Oliy taʼlim, fan va innovatsiyalar vazirligi masʼullari, Turkiyadagi Egey universiteti professori Pinar Fidakar xonim hamda Navoiy davlat konchilik va texnologiyalar universiteti Nukus filiali direktori Atabek Qaipbergenovlar oʻz tabrik soʻzlarida konferentsiya ishiga omad tiladilar.

Konferentsiyada mamlakatimizdagi turli nufuzli oliy taʼlim muassasalaridan tashrif buyurgan professor-oʻqituvchilar tomonidan “Talabalarda tanqidiy va kreativ fikrlashni rivojlantirish”, “Oliy taʼlim muassasalari faoliyatiga innovatsion marketingni joriy etish”, “Oliy taʼlim tizimida matematika fanini yoʻnalishlarga bogʻlab oʻqitishning ayrim jihatlari” kabi va boshqa mavzularda maʼruzalar qilindi.

Anjuman davomida ilm-fan sohalarida erishilayotgan yutuqlar, tadqiqot xulosalarining amaliyotdagi natijasi va shu kabi boshqa mavzularda oʻzaro fikr almashildi.

Konferentsiya shoʻbalarga boʻlingan holda oʻz ishini davom ettirdi.

Anjuman davomida Nukus innovatsion instituti rektori Anvar Aʼzamov, institutning ilmiy ishlar va innovatsiyalar boʻyicha prorektori Alisher Yuldashev, Egey universiteti professori Pinar Fidakar xonim, Qoraqalpogʻiston qishloq xoʻjaligi va agrotexnologiyalar institutining ilmiy ishlar va innovatsiyalar boʻyicha prorektori Atabek Alimovlar ommaviy axborot vositalari vakillariga bergan intervyularida taʼkidlaganlaridek, konferentsiya oliy taʼlim muassasalari oʻqituvchilari uchun juda ahamiyatli boʻldi.

Ayniqsa, anjumanda bugungi kunning eng dolzarb mavzulari koʻtarilgani, ilmiy-nazariy tadqiqotlarda esa yaqin kelajakda kutilayotgan jarayonlar toʻliq qamrab olingani Oʻzbekistonning Uchinchi Renessansni barpo etish yoʻlidagi amaliy islohotlariga xizmat qilishi alohida eʼtirof etildi.

Xorijlik mehmonlarga mamlakatimizda oliy maʼlumotli kadrlarni tayyorlash jarayonida qoʻllanilayotgan innovatsion va pedogogik texnologiyalar, bu borada erishilgan natijalar, kredit-modul tizimining afzalliklari, professor-oʻqituvchilar faoliyatidagi ijodiy raqobat, Oʻzbekiston taʼlim tizimida tayyorlangan kadrlarning dunyo bozoriga chiqishi uchun amalga oshirilishi rejalashtirilayotgan ishlar haqida maʼlumotlar berildi.

Aytish joizki, Oliy taʼlimning rivojlanishida ilmiy-nazariy konferentsiyalar muhim rol oʻynaydi. Bu tadbirlar olimlar, talabalar va oʻqituvchilar uchun oʻz ilmiy ishlarini namoyish etish, yangi ilmiy gʻoyalar va yondashuvlarni muhokama qilish hamda sohadagi eng soʻnggi tendentsiyalardan xabardor boʻlish uchun imkoniyat yaratadi.

Shuningdek, bu kabi konferentsiyalar ilmiy hamkorlikni rivojlantirish va akademik hamjamiyatni kengaytirishga ham amaliy yordam beradi. Shu sababli mamlakatimizda ham oliy taʼlimni rivojlantirish va uni xalqaro standartlarga moslashtirish borasidagi islohotlar doirasida ilmiy-nazariy va ilmiy-amaliy konferentsiyalarni oʻtkazishga alohida eʼtibor qaratiladi.

Zero, bu kabi amaliy ishlar mamlakatning ilmiy va texnologik salohiyatini yanada kuchaytirishga, oliy taʼlim muassasalarida tahsil olayotgan yoshlarning kelgusida mehnat bozoridagi raqobatbardoshligini oshirishga xizmat qiladi.

Maʼlumot oʻrnida aytish kerakki, bugungi kunda Nukus innovatsion institutida dasturiy injiniring, iqtisodiyot, moliya va moliyaviy texnologiyalar, buxgalteriya hisobi va audit kabi 10ta yoʻnalishda jami 6 mingdan ziyod talaba tahsil olyapti. Institutda 115 nafar professor oʻqituvchilar faoliyat yuritadi. Fursatdan foydalanib, yoshlarimizni ushbu oliy taʼlim muassasasiga oʻqishga hujjat topshirishga chaqirib qolamiz.

Shohzod Qurbonboyev