Amudaryo tumani mamlakat miqyosidagi seminarga mezbonlik qildi

Mamalakat rivojini taʼlim sifati va kadrlar salohiyati belgilab beradi. Shu maqsadda yurtimizda maktabgacha va maktab taʼlimini yangi bosqichga koʻtarish yoʻlida qator islohotlar amalga oshirilyapti. Jumaladan, maktablarda Milliy oʻquv dasturi va zamonaviy dasrliklarni amaliyotga joriy etish, bu jarayonda pedagog xodimlarga uzliksiz metodik xizmat koʻrsatish, qizil toifadagi maktablarga manzilli yordam berish ustuvor vazifa sifatida belgilangan.

Ayni yoʻnalishda amalga oshirilayotgan ishlarning natijasini yana bir marta sarhisob qilish, bu boradagi yutuqlarni eʼtirof etib, kamchiliklarni bartaraf etish maqsadida Amudaryo tumanidagi 76-sonli maktabda Oʻzbekiston miqyosida metodik tur tashkil qilindi.

Metodik turga mamlakatning barcha hududlaridan kelgan soha vakillari maktab binosi oldida karnay sadolari bilan tantanavor kutib olindi. Mehmonlarga qadriyatimizga aylangan anʼana – non-tuz tutildi. Oʻquvchilar tomonidan cholgʻu asboblarida ijro etilgan milliy kuy va musiqalar barchaga oʻzgacha kayfiyat baxsh etdi. Maxsus tayyorlangan koʻrgazmada oʻquvchilarning qoʻl mehnati bilan ishlangan buyumlar, yumshoq oʻyinchoqlar va har xil mavzularda chizilgan suratlar namoyish qilindi.

Seminarda Oʻzbekiston Respublikasi Maktabgacha va maktab taʼlimi vazirining birinchi oʻrinbosari U.Sharifxodjayev, Vazirlikning Metodika va darsliklar boshqarmasi boshligʻi D.Norboyeva, Respublika taʼlim markazi direktori Sh.Xudayqulov, Qoraqalpogʻiston Respublikasi Vazirlar kengashi raisi oʻrinbosari B.Otemuratov, Qoraqalpogʻiston Respublikasi Maktabgacha va maktab taʼlimi vaziri G.Qojabayeva, barcha viloyatlar Maktabgacha va maktab taʼlimi boʻlimlarining oʻquvchilarda zamonaviy koʻnikmalarni shakllantirish shoʻʼbalari bosh metodistlari, hududiy metodik xizmat koʻrsatish boʻlimi boshliqlari, tumanimizning sohaga masʼul mutasaddilari hamda ommaviy axborot vositalari vakillari ishtirok etdi.

Maktabning faollar zalida oʻtkazilgan yigʻilishda Oʻzbekiston Respublikasi Maktabgacha va maktab taʼlimi vazirining birinchi oʻrinbosari Usman Sharifxodjayev hamda Qoraqalpogʻiston Respublikasi Maktabgacha va maktab taʼlimi vaziri Gulistan Qojabayevalar soʻzga chiqib, mamlakatimizda maktabgacha va maktab taʼlimi sohasida amalga oshirilayotgan keng koʻlamli islohotlar, oʻquvchilarning sifatli taʼlim olishi uchun yaratilayotgan sharoitlar, oʻqituvchilarga berilayotgan imtiyozlar va yaratilayotgan imkoniyatlar haqida toʻxtalib, metodik turning ahamiyati haqida maʼlumotlar berishdi. Shundan soʻng Amudaryo tumani Maktabgacha va maktab taʼlimi boʻlimi boshligʻi Yalgʻashboy Shomuratov “qizil” toifaga kirgan maktablarda amalga oshirilgan ishlar, erishilgan ijobiy natijalar va keyingi rejalar haqida taqdimot qildi.

Jumladan, 2021-yilda tumanda 4 ta umumiy oʻrta taʼlim maktabi, shu oʻrinda 76-sonli maktab ham taʼlim sifati yuqori boʻlmaganligi sababli “qizil” toifaga kiritilgan edi. Tegishli muassasalar tomonidan metodik yordam berilib, manzilli ishlash natijasida barcha maktablar “yashil” toifaga oʻtkazildi. Ushbu maktab esa bugungi kunda tumandagi eng kuchli maktablar beshtaligidan joy olgan. Keyingi yillarda oʻquvchilar soni ortgani sababli maktabga qoʻshimcha yangi bino qurilgan. Hozirda tumanimizda taʼlim sifati boʻyicha “qizil” toifadagi maktablar mavjud emas.

Seminar davomida mehmonlar va soha vakillari maktabda yaratilgan sharoitlar, zamonaviy metodlarga tayangan holda oʻtilayotgan dars jarayonlari bilan yaqindan tanishdilar. Mehmonlar dars jarayonlarida bevosita ishtirok etib, oʻqituvchilarning dars oʻtish uslubi va oʻquvchilarning mavzu boʻyicha faolliklarini kuzatishdi.

Taʼlim dargohida “bir kasb – ikki xorijiy til” tajribasi joriy qilingan. Ushbu tamoyil asosida oʻquvchilarga ikkita xorijiy til chuurlashtirilgan tarzda oʻrgatilib, ularning kasb-korli boʻlishlari, hunar egallashlari uchun ham sharoitlar yaratilmoqda. Maktabda duradgorlik va tikuvchilik toʻgaraklari faoliyat yuritmoqda. Tikuvchilik toʻgaragiga sohada katta tajribaga ega boʻlgan ilgʻor biznes egalari, faol tadbirkorlar jalb qilingan. Ular oʻquv-ishlab chiqarish ustaxonalarini tashkil qilish va jihozlash ishlarida amaliy yordamlar koʻrsatib kelmoqda.

Maʼlumki, Oʻzbekiston Respublikasi Prezidentining “2022-2026-yillarda xalq taʼlimini rivojlantirish boʻyicha milliy dasturini tasdiqlash toʻgʻrisida”gi Farmoni qabul qilingan edi. Farmon ijrosi yuzasidan maktab oʻquvchilarining bilimi va koʻnikmalarini shakllantirish, ularni milliy hamda umuminsoniy qadriyatlarga sodiqlik ruhida tarbiyalash, oʻqituvchi kasbi nufuzini va pedagoglarning sifat tarkibini oshirish, darsliklar va oʻquv metodik majmualarni zamon talablari asosida takomillashtirish, xalq taʼlimi muassasalarining xalqaro standartlarga javob beradigan zamonaviy modellarini barpo etish maqsadida qator vazifalar belgilan.

Endilikda sifati yuqori boʻlmagan umumiy oʻrta taʼlim maktablarida manzilli metodik yordam koʻrsatish boʻyicha Qoraqalpogʻiston tajribasini Oʻzbekiston Respublikasi miqyosida ommalashtirish kutilmoqda. Bu kabi amaliy ishlar orqali “qizil” toifaga kiritilgan maktablarda taʼlim sifatini yanada yaxshilash, samaradorligini oshirish koʻzda tutilgan.

Ushbu metodik tur doirasida mamlakat miqyosida turli hududlardan kelgan mehmonlar Amudaryo tumanidan tashqari Qoʻngʻirot va Moʻynoq tumanlari hamda Nukus shaharlarida boʻlishib, maktablar va maktabgacha taʼlim tashkilotlariga tashrif buyurishdi va metodik xizmat koʻrsatish boʻyicha bilim va tajribalarini yanada oshirdilar.

Shohzod Qurbonboyev