Amudaryo tuman ixtisoslashtirilgan maktabiga oʻqishga marhamat!

Prezidentimizning 2022-yil 14-aprel kungi farmoni asosida Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi tizimida 2022-2023 oʻquv yilidan boshlab Amudaryo tuman ixtisoslashtirilgan maktabi oʻz ish faoliyatini boshladi. Oʻtgan qisqa fursat ichida maktabimiz pedagogik jamoaning kuch-gʻayrati hamda bilimga chanqoq oʻquvchilarning intilishlari tufayli qator natijalarga erishdi.

Maktabimizda aniq va tabiiy fanlar yoʻnalishlarida oʻquvchilarga xalqaro taʼlim standartlariga mos interaktiv uslublar asosida 28 nafar oliy, 17 nafar birinchi hamda 16 nafar ikkinchi toifali oʻqituvchilar dars beradi. 34 nafar oʻqituvchilarimiz xalqaro va milliy sertifikatlarga ega.

Oʻquvchilarimizning bilimlarini oshirishda tajribali oʻqituvchilarning oʻrni beqiyosdir. Ular nafaqat bilim berish, balki oʻquvchilarning shaxsiy rivojlanishi va motivatsiyasini oshirishga ham katta eʼtibor qaratishadi. Oʻz sohasining yetuk bilimdoni boʻlgan pedagoglarimiz oʻquvchilarga murakkab mavzularni tushunishda yordam beradi, ularning fikrlash qobiliyatini rivojlantiradi va mustaqil ishlash koʻnikmalarini shakllantiradi. Shuningdek, ular oʻquvchilarning individual xususiyatlarini hisobga olib, har bir oʻquvchiga mos keladigan oʻqitish usullarini qoʻllaydi. Bu esa oʻquvchilarning bilimlarini mustahkamlash va ularning zaif tomonlarini aniqlash hamda bartaraf etishda muhim rol oʻynaydi.

Mana shunday fidoyi ustozlarimizning saʼy-harakatlari bilan oʻtgan oʻquv yilida maktabimiz bitiruvchilarining 85 foizi talaba boʻldi. Bu – katta koʻrsatkich. Maktabni tamomlagan yili oʻzlari istagan oliy taʼlim dargohlariga kira olmagan oʻquvchilar ham bu yil albatta talaba boʻlishlariga ishonamiz.

Oʻquvchilarimizning yutuqlari haqida toʻxtalar ekanmiz, ular birgina joriy oʻquv yilida asosiy fanlar olimpiadasining III bosqichida 5ta sovrinli oʻrin egalari boʻlishganini, 2 nafari olimpiadaning Respublika bosqichida ishtirok etganini alohida taʼkidlash lozim. Qolaversa, STEAM fanlari olimpiadasida maktab oʻquvchilari jami 7ta sovrinli oʻrinlarni egallab, ularning 4 nafari Respublika bosqichida ishtirok etdi. Shuningdek, qizlar oʻrtasida tashkil qilingan matematika olimpiadasida ham 2 nafar oʻquvchi Respublika bosqichida ishtirok etib, bilimlarini sinovdan oʻtkazdi.

Maktabning 11-sinf oʻquvchisi Botirjon Kamolov muddatidan oldin 4ta xalqaro oliygohga oʻqishga qabul qilindi. Maktab boʻyicha umumtaʼlim fanlaridan sertifikatlarni qoʻlga kiritgan oʻquvchilar soni esa 70 nafardan ortiq. Bu kabi yutuqlar maktabimiz reytingini koʻtarishi bilan birga ushbu taʼlim dargohida kelgusida tumanimiz, Qoraqalpogʻiston va Oʻzbekiston miqyosida xalq xoʻjaligining turli sohalarida faoliyat yuritib, davlat va jamiyat rivojiga hissa qoʻshadigan yoshlar kamolga yetayotganining yorqin dalilidir.

Maktab muhiti oʻquvchilarning taʼlim olishida muhim rol oʻynaydi, chunki ularning akademik yutuqlari va shaxsiy rivojlanishiga katta taʼsir koʻrsatadi.

Shu sababli ham Amudaryo tuman ixtisoslashtirilgan maktabida taʼlim sifatini oshirish va oʻquvchilarga zamonaviy bilim berish maqsadida barcha sharoitlar yaratilgan. Taʼlim jarayonida zamonaviy oʻquv materiallari va pedagogik texnologiyalardan foydalanilib, oʻquvchilarning ijodiy va tanqidiy fikrlash qobiliyatlarini rivojlantirishga qaratilgan dasturlar joriy etilmoqda.

Bundan tashqari, oʻqituvchilarning malakasini oshirish va ularga oʻquvchilar bilan ishlashda zarur boʻlgan resurslarni taqdim etishga ham katta eʼtibor berilmoqda. Shuningdek, oʻquvchilarning maktabdagi muhitga moslashishi va ularning ijtimoiy hamda emotsional farovonligini taʼminlash uchun maktabda turli xil toʻgaraklar faoliyati yoʻlga qoʻyilgan.

Maktabda 120-oʻrinli faollar zali, zamonaviy kompyuterlar bilan jihozlangan 2ta informatika xonasi, amaliy mashgʻulotlar oʻtkazishga moʻljallangan va toʻliq jihozlangan kimyo, biologiya, fizika laboratoriya xonalari mavjud. Bu kabi jihozlangan xonalar oʻquvchilarga amaliy koʻnikmalarni rivojlantirish va fanlarni yanada chuqurroq oʻrganish imkonini beradi. Shuningdek, bu oʻquvchilarning ijodiy va intellektual salohiyatini oshirishga ham xizmat qiladi.

Taʼlim maskanimizda kelgusi 2024-2025 oʻquv yili uchun qabul jarayoniga ham puxta tayyorgarlik koʻrilmoqda. Maktabning 5-sinfiga aniq fanlar yoʻnalishi boʻyicha, 7-sinfiga esa tabiiy fanlar yoʻnalishi boʻyicha iqtidorli oʻquvchilar test sinovlar asosida qabul qilinadi.

Aniq fanlar yoʻnalishida matematika va mantiqiy fikrlash hamda ingliz tili, tabiiy fanlar yoʻnalishida esa tegishli tabiiy fan hamda ingliz tili fanlaridan test sinovlari oʻtkaziladi. Belgilangan kvota doirasida kirish imtihonlari natijalariga koʻra eng yuqori ball toʻplagan oʻquvchilar oʻqishga qabul qilinadi.

Ixtisoslashtirilgan maktabga oʻquvchilarning quyidagi hujjatlari onlayn shaklda Agentlikning rasmiy veb-sayti orqali qabul qilinadi:

- tegishli oʻquv yili natijasiga koʻra baholar tabelining maktab direktori tomonidan tasdiqlangan nusxasi;

- oxirgi 2 oy davomida tushgan fotosurati;

- tugʻilganlik haqida guvohnomasi va ota-onasi yoki qonuniy vakilining fuqarolik pasporti maʼlumotlari, bogʻlanish uchun telefon raqamlari.

Tumanimizdagi barcha umumtaʼlim maktablarining 4- va 6-sinflarini tamomlayotgan, aniq va tabiiy fanlarga qiziquvchi iqtidorli oʻquvchilarni Amudaryo tuman ixtisoslashtirilgan maktabiga oʻqishga taklif qilamiz! Buning uchun qabul jarayoni boshlangach maxsus veb-sayt – ariza.piima.uz orqali hujjatlaringizni topshiring. Kirish imtihonlari natijasiga koʻra eng yuqori ball toʻplagan oʻquvchilar belgilangan qabul kvotasi doirasida ballar ketma-ketligida oʻquvchilar safiga qabul qilinadi.

Taʼlim muassasasining maqsadi – keng dunyoqarashga ega boʻlgan lider yoshlarni tarbiyalash, ularga xalqaro taʼlim standartlari asosida bilim berish, oʻz sohasining eng bilimdon kadrlari boʻlib yetishishlariga imkoniyat yaratishdir.

Amudaryo tuman ixtisoslashtirilgan maktabi – imkoniyatlar maskanidir.

Otabek Yoʻldoshov, Amudaryo tuman ixtisoslashtirilgan maktabi direktori.