53-sonli maktabda “Ona yurtimizni madh qilamiz” shiori ostida maʼnaviy-maʼrifiy tadbir oʻtkazildi

Inson qalbiga bolaligidanoq ota-onaga, yaqinlarga hamda Vatanga muhabbat tuygʻularini singdirish uning kelgusida barkamol shaxs boʻlib voyaga yetishida muhim ahamiyat kasb etadi. Shu sababli ham maktabgacha taʼlim tashkilotlarida, maktablarda tarbiyalanuvchilar va oʻquvchilar ishtirokida turli tadbirlar, maʼnaviy kechalar oʻtkazilib, vatanparvarlik, chin insoniylik kabi olijanob tuygʻularni ularning qalbiga bolaligidan jo qilishga eʼtibor qaratiladi.

Amudaryo tumanidagi 53-sonli maktabda “Ona yurtimizni madh qilamiz” shiori ostida boʻlib oʻtgan maʼnaviy-maʼrifiy tadbir ham oʻqituvchilarning Vatanga boʻlgan muhabbatini yanada kuchaytirishda muhim vosita boʻldi, deyish mumkin.

Tadbir avvalida davlat madhiyalari yangrab, oʻquvchilar yurt ramzlariga hurmat bajo keltirishdi. Soʻzga chiqqanlar taʼkidlaganlaridek, Vatan ona kabi muqaddas, uni asrash, taraqqiyotiga hissa qoʻshish barchamizning farzandlik burchimizdir.

Maktab direktorining maʼnaviy-maʼrifiy ishlar boʻyicha oʻrinbosari Izzatbek Yusufov qayd etib oʻtganidek, Vatanga muhabbat va sadoqat bilan xizmat qilish, unga munosib farzand boʻlish oʻquvchilarning chuqur bilim olishi, namunali xulqli va odobli boʻlib, kasb-hunar egallashi orqali boʻladi.

Tadbirda maktabning 1-A sinf oʻquvchilari ijrosida yangragan Vatanni madh etuvchi kuy va qoʻshiqlar ularning chinakam vatanparvar avlod ekanini amalda namoyish qildi.

Tadbirda ishtirok etgan oʻqituvchilar, yaʼni Malohat Matsapoyeva, Fazilat Ollaberganova, Qadamboy Ayboʻlsinov, Lobar Oʻrozmetova, Madina Rajabova, Ixlosbek Ahmedov kabi tajribali pedagoglar oʻquvchilarga ilm sirlarini puxta egallash orqali Vatanga munosib farzand boʻlishga chaqirdilar.

Aytish joizki, boshlangʻich sinf oʻquvchilarining vatanparvarlik tuygʻularini yuksaltirish jarayonida ularni milliy qadriyatlarga, boy tariximiz va madaniy merosimizga hurmat ruhida, Vatanga sadoqatli, yurtga muhabbatli qilib tarbiyalash muhim ahamiyat kasb etadi.

Taʼlim muassasalarida bu maqsadlarga erishish uchun turli pedagogik usullar, jumladan, maktab dasturlariga milliy bayramlar, anʼanalar va qahramonlar haqidagi maʼlumotlarni kiritish, shuningdek, oʻquvchilarni turli ijtimoiy loyihalar hamda tadbirlarga faol jalb qilish tavsiya qilinadi.

Maktab va oila hamkorligida bolalarga vatanparvarlik tuygʻusini singdirish, ularning shaxsiy rivojlanishi va jamiyatdagi oʻrnini anglashlariga yordam beradi. Bundan tashqari, folklor, milliy musiqa va sanʼat orqali bolalarning estetik hissiyotlarini rivojlantirish, ularda milliy iftixor va oʻzlikni anglash jarayonini jadallashtiradi.

“Ona yurtimizni madh qilamiz” shiori ostida oʻtkazilgan mazkur maʼnaviy-maʼrifiy tadbir ham oʻquvchilarning Vatanga boʻlgan muhabbatini oshirishga va ularni kelajakda jamiyatning faol aʼzolari boʻlishga ruhlantirgani bilan ahamiyatli boʻldi.

Bunday tarbiyaviy ishlarning samarasi kelgusida oʻquvchilarning komil inson boʻlib, el-yurt manfaati yoʻlida fidokorona xizmat qilishlarida, jamiyatning faol va masʼuliyatli aʼzolari boʻlib yetishishlarida oʻz samarasini berishi shubhasiz.

Tadbirda yakunida ota-onalar nomidan Gulnora Shomuratova va Oysha Oʻrazboyevalar, shuningdek 1-A sinf rahbari Bahrom Jiyanov soʻzga chiqib, oʻqituvchilarga, oʻquvchilarga va barcha tadbir ishtirokchilariga minnatdorchilik bildirdi.