83-sonli maktabda “Kasblar festivali” tadbiri va ota-onalar yigʻilishi oʻtkazildi

Kasb tanlash inson hayotidagi eng muhim tanlovlardan biri hisoblanadi. Xalqimiz duo qilganida “Kasbingdan kamol top” degan jumlani bejiz ishlatmaydi. Sababi, shaxsning komil inson boʻlib voyaga yetishi, jamiyatda oʻz oʻrnini topib, yuksak darajaga erishishida kasb-korning oʻrni alohida.

Shuning uchun ham yosh avlodni bolalagidan oʻz qiziqishlari va iqtidoriga qarab kasbga yoʻnaltirish har bir ota-onaning, taʼlim muassasasining, davlat va jamiyatning vazifasidir. Bugun maktablar nafaqat taʼlim-tarbiya beradi, balki oʻquvchilarga kasb-hunar oʻrgatish borasidagi dastlabki qadamlar ham aynan maktablarda qoʻyiladi.

Shu maqsadda taʼlim maskanlarida turli tadbirlar, tanlovlar, festivallar oʻtkazib kelinmoqda. 18-aprel kuni Amudaryo tumanidagi 83-sonli maktabda ham “Kasbim – kelajagim” shiori ostida “Kasblar festivali” tadbiri va ota-onalar yigʻilishi oʻtkazildi.

Tadbir rejasiga asosan avvalo ota-onalar yigʻilishi oʻtkazilib, yigʻilishda mahalla faollari, maktabga biriktirilgan Milliy gvardiya xodimi, mahalla yoshlari yetakchisi qatnashdi. Yigʻilishda oʻquvchilarning tartib-intizomi, odob-ahloq qoidalariga amal qilishi, yoshlar oʻrtasida jinoyatchilik va huquqbuzarliklarning oldini olish masalalari boʻyicha suhbat oʻtkazildi.

Ota-onalar yigʻilishidan keyin ishtirokchilar “Kasblar festivali” tadbiriga taklif qilindi. Tadbirni maktab direktori Dilafruz Ismoilova ochib, mazkur festival yoshlarning kelajakdagi kasbiy tanlovlarini shakllantirish, qiziqishlari va isteʼdodlarini aniqlab, shunga mos kasbga yoʻnaltirishda muhim vosita boʻlishini taʼkidlab oʻtdi.

Soʻngra ishtirokchilar kasblar koʻrgazmalariga taklif qilindi. Maktab oʻquvchilari mehmonlarga sartaroshlik, toʻquvchilik, tikuvchilik, oʻqituvchilik, duradgorlik, rassomchilik, novvoylik, oshpazlik, hunarmandchilik, tadbirkorlik, bogʻbonchilik, dehqonchilik, kashtachilik va qoʻgʻirchoq teatri, gul bezaklari ustasi kabi kasblar egalarining ish jarayonini koʻrgazmali tarzda namoyish qilishdi.

“Kasbim – kelajagim” shiori ostida oʻtkazilgan tadbirda maktab psixologi Nafisa Toʻliboyeva, direktor oʻrinbosari, ona tili va adabiyot oʻqituvchisi, toʻquvchilik toʻgaragi va qoʻgʻirchoq teatri rahbari hamda maktab oʻqituvchilari, oʻquvchilar faol ishtirok qilishdi. Tegishli masʼullar tomonidan ishtirokchi oʻquvchilarga turli kasblar va ularning jamiyatdagi roli haqida keng tushunchalar berildi.

Tadbir davomida 9-, 10-, hamda 11-sinflar orasida “Osh damlash” marafoni ham oʻtkazildi. Maktab bogʻida oʻrnatilgan qozonlarda oʻquvchilar oʻzbekona osh damlashdi. Har bir sinf oʻquvchilarining tayyorlagan oshiga hakamlar hayʼati aʼzolari tomonidan xolisona baho berildi. Barcha mehmonlar va ota-onalar oshga taklif qilindi.

“Kasblar festivali” tadbiri maktab oʻquvchilarini hunar oʻrganishga, oʻz iqtidori, qiziqishi va salohiyatiga mos kasb tanlashga undagani bilan nihoyatda ahamiyatli boʻldi. Umid qilamizki, ushbu kasblar festivali yoshlarning kelajakdagi muvaffaqiyatli karerasi uchun mustahkam poydevor vazifasini oʻtaydi.

Anorgul Xolimbetova, maktab direktorining maʼnaviy-maʼrifiy ishlar boʻyicha oʻrinbosari