83-сонли мактабда “Касблар фестивали” тадбири ва ота-оналар йиғилиши ўтказилди

Касб танлаш инсон ҳаётидаги энг муҳим танловлардан бири ҳисобланади. Халқимиз дуо қилганида “Касбингдан камол топ” деган жумлани бежиз ишлатмайди. Сабаби, шахснинг комил инсон бўлиб вояга етиши, жамиятда ўз ўрнини топиб, юксак даражага эришишида касб-корнинг ўрни алоҳида.

Шунинг учун ҳам ёш авлодни болалагидан ўз қизиқишлари ва иқтидорига қараб касбга йўналтириш ҳар бир ота-онанинг, таълим муассасасининг, давлат ва жамиятнинг вазифасидир. Бугун мактаблар нафақат таълим-тарбия беради, балки ўқувчиларга касб-ҳунар ўргатиш борасидаги дастлабки қадамлар ҳам айнан мактабларда қўйилади.

Шу мақсадда таълим масканларида турли тадбирлар, танловлар, фестиваллар ўтказиб келинмоқда. 18 апрель куни Амударё туманидаги 83-сонли мактабда ҳам “Касбим – келажагим” шиори остида “Касблар фестивали” тадбири ва ота-оналар йиғилиши ўтказилди.

Тадбир режасига асосан аввало ота-оналар йиғилиши ўтказилиб, йиғилишда маҳалла фаоллари, мактабга бириктирилган Миллий гвардия ходими, маҳалла ёшлари етакчиси қатнашди. Йиғилишда ўқувчиларнинг тартиб-интизоми, одоб-аҳлоқ қоидаларига амал қилиши, ёшлар ўртасида жиноятчилик ва ҳуқуқбузарликларнинг олдини олиш масалалари бўйича суҳбат ўтказилди.

Ота-оналар йиғилишидан кейин иштирокчилар “Касблар фестивали” тадбирига таклиф қилинди. Тадбирни мактаб директори Дилафруз Исмоилова очиб, мазкур фестивал ёшларнинг келажакдаги касбий танловларини шакллантириш, қизиқишлари ва истеъдодларини аниқлаб, шунга мос касбга йўналтиришда муҳим восита бўлишини таъкидлаб ўтди.

Сўнгра иштирокчилар касблар кўргазмаларига таклиф қилинди. Мактаб ўқувчилари меҳмонларга сартарошлик, тўқувчилик, тикувчилик, ўқитувчилик, дурадгорлик, рассомчилик, новвойлик, ошпазлик, ҳунармандчилик, тадбиркорлик, боғбончилик, деҳқончилик, каштачилик ва қўғирчоқ театри, гул безаклари устаси каби касблар эгаларининг иш жараёнини кўргазмали тарзда намойиш қилишди.

“Касбим – келажагим” шиори остида ўтказилган тадбирда мактаб психологи Нафиса Тўлибоева, директор ўринбосари, она тили ва адабиёт ўқитувчиси, тўқувчилик тўгараги ва қўғирчоқ театри раҳбари ҳамда мактаб ўқитувчилари, ўқувчилар фаол иштирок қилишди. Тегишли масъуллар томонидан иштирокчи ўқувчиларга турли касблар ва уларнинг жамиятдаги роли ҳақида кенг тушунчалар берилди.

Тадбир давомида 9-, 10-, ҳамда 11-синфлар орасида “Ош дамлаш” марафони ҳам ўтказилди. Мактаб боғида ўрнатилган қозонларда ўқувчилар ўзбекона ош дамлашди. Ҳар бир синф ўқувчиларининг тайёрлаган ошига ҳакамлар ҳайъати аъзолари томонидан холисона баҳо берилди. Барча меҳмонлар ва ота-оналар ошга таклиф қилинди.

“Касблар фестивали” тадбири мактаб ўқувчиларини ҳунар ўрганишга, ўз иқтидори, қизиқиши ва салоҳиятига мос касб танлашга ундагани билан ниҳоятда аҳамиятли бўлди. Умид қиламизки, ушбу касблар фестивали ёшларнинг келажакдаги муваффақиятли карьераси учун мустаҳкам пойдевор вазифасини ўтайди.

Аноргул Холимбетова, мактаб директорининг маънавий-маърифий ишлар бўйича ўринбосари