“Mangʻit dehqon bozori” MChJ va bozor maʼmuriyati aholiga sifatli savdo-sotiq xizmatlarini koʻrsatib kelmoqda

Dehqon bozorlari, mahalliy iqtisodiyotning rivojlanishi va jamiyatning taraqqiyoti uchun muhim ahamiyatga ega. Ular nafaqat savdo-sotiq uchun qulay sharoit yaratish orqali iqtisodiyot rivojiga, balki ijtimoiy va madaniy aloqalarni mustahkamlash orqali jamiyat rivojiga ham hissa qoʻshadi.

Dehqon bozorlari mahalliy dehqonlarga oʻz mahsulotlarini toʻgʻridan-toʻgʻri isteʼmolchilarga sotish imkonini beradi, bu esa oilalarning iqtisodiy barqarorligini oshiradi va daromadlarini koʻtarishga yordam beradi. Shuningdek, dehqon bozorlari aholi bandligini taʼminlash, yangi ish oʻrinlari yaratish orqali iqtisodiy faollikni ragʻbatlantiradi.

Ana shunday ijtimoiy va iqtisodiy ahamiyatiga ega bozorlardan biri – Amudaryo tumani markazida joylashgan “Mangʻit dehqon bozori” masʼuliyati cheklangan jamiyatiga qarashli bozor boʻlib, mazkur bozor binosi va unga qarashli asosiy inshootlar 1993-yil 9-may kuni ishga tushirilgan. “Mangʻit dehqon bozori” masʼuliyati cheklangan jamiyati Amudaryo tumani xokimining 2003-yil 2-oktyabr kungi qaroriga asosan qayta tashkil qilingan hamda Qoraqalpogʻiston Respublikasi Adliya Vazirligi tomonidan davlat roʻyxatidan oʻtkazilgan.

Jamiyatning asosiy maqsadi dehqon bozori faoliyatini yoʻlga qoʻyish orqali aholini dehqonchilik, chorvachilik mahsulotlari va boshqa zarur mahsulotlar bilan taʼminlash, bu borada dehqonlarning savdo-sotiqni amalga oshirishlari uchun barcha zarur shart-sharoitlarni yaratish hisoblanadi.

Mangʻit dehqon bozori maʼmuriyatida bugungi kunda 23 nafar xodim ishlaydi. Dehqon bozori uchun tuman hokimining 2010-yil 22-noyabr kungi qarori asosida Navoiy mahallasi hududidan jami 1,7 gektar yer maydoni ajratib berilgan boʻlib, shundan qurilish maydoni 1 ming 934 kvadrat metr, foydalanish maydoni 1 ming 957 kvadrat metrni tashkil qiladigan yopiq bozordagi savdo oʻrinlari soni 105tani tashkil qiladi.

Bundan tashqari, don mahsulotlarini sotishga moʻljallangan 129ta, sabzavot mahsulotlarini sotishga ixtisoslashgan 82ta, poliz mahsulotlarini sotishga moslashtirilgan 16ta hamda meva mahsulotlarini sotishda foydalanib kelinayotgan 92ta oʻrinli bostirmalar mavjud. Jami savdo rastalari jami soni 424tani tashkil qiladi.

Bozor hududida 11ta goʻsht shoxobchalari, 8ta maishiy xizmat koʻrsatish shoxobchalari, 3ta dori-darmon, 4ta veterinariya hamda 89ta xususiy oziq-ovqat doʻkonlari tuman aholisiga xizmat koʻrsatmoqda.

Bozorlar mahalliy qadriyat va anʼanalarni saqlashda ham muhim rol oʻynaydi, chunki ular mahalliy hunarmandchilik va milliy mahsulotlarni namoyish etish uchun muhim platforma vazifasini ham bajaradi. Dehqon bozorida hunarmandchilik mahsulotlari, qoʻldan ishlangan roʻzgʻor buyumlarini sotish uchun ham alohida oʻrinlar mavjud.

Bozor hududida shuningdek, tarozixona, omborxona, sartaroshxonalar faoliyat yuritmoqda. Tuman soliq inspektsiyasi va Ichki ishlar boʻlimining tayanch punklari esa aholi va isteʼmolchilarga zarur yordam koʻrsatishga doimo shay.

Bozorda sotiladigan mahsulotlarning sifati va xavfsizligi, koʻp jihatdan, sanitariya va gigiyena standartlariga qanchalik rioya qilinganiga bogʻliq. Sanitariya qoidalariga amal qilish, mahsulotlar ifloslanishining, yaroqlilik muddati oʻtgan mahsulotlar sotilishining oldini olish va isteʼmolchilarning sogʻligʻini himoya qilishga katta eʼtibor qaratiladi. Bu borada bozor hududida tashkil qilingan sanitariya-veterinariya laboratoriyasining ahamiyati katta.

Bozorga qarashli maxsus savdo-xarid korxonasi tomonidan esa bayram kunlari arzonlashtirilgan savdo yarmarkalari tashkil kilinadi. Bu esa qishloq xoʻjaligi va oziq-ovqat mahsulotlariga talab ortgan davrda ham ular narxining barqarorligini taʼminlashda muhim omil hisoblanadi.

Bir soʻz bilan aytganda, “Mangʻit dehqon bozori” masʼuliyati cheklangan jamiyati va bozor maʼmuriyati barcha amudaryoliklar va tumanimiz mehmonlariga sifatli savdo-sotiq xizmatlarini koʻrsatib kelmoqda.

Azamat Narimov, “Mangʻit dehqon bozori” MChJ direktori.