“Манғит деҳқон бозори” МЧЖ ва бозор маъмурияти аҳолига сифатли савдо-сотиқ хизматларини кўрсатиб келмоқда

Деҳқон бозорлари, маҳаллий иқтисодиётнинг ривожланиши ва жамиятнинг тараққиёти учун муҳим аҳамиятга эга. Улар нафақат савдо-сотиқ учун қулай шароит яратиш орқали иқтисодиёт ривожига, балки ижтимоий ва маданий алоқаларни мустаҳкамлаш орқали жамият ривожига ҳам ҳисса қўшади.

Деҳқон бозорлари маҳаллий деҳқонларга ўз маҳсулотларини тўғридан-тўғри истеъмолчиларга сотиш имконини беради, бу эса оилаларнинг иқтисодий барқарорлигини оширади ва даромадларини кўтаришга ёрдам беради. Шунингдек, деҳқон бозорлари аҳоли бандлигини таъминлаш, янги иш ўринлари яратиш орқали иқтисодий фаолликни рағбатлантиради.

Ана шундай ижтимоий ва иқтисодий аҳамиятига эга бозорлардан бири – Амударё тумани марказида жойлашган “Манғит деҳқон бозори” масъулияти чекланган жамиятига қарашли бозор бўлиб, мазкур бозор биноси ва унга қарашли асосий иншоотлар 1993 йил 9 май куни ишга туширилган. “Манғит деҳқон бозори” масъулияти чекланган жамияти Амударё тумани хокимининг 2003 йил 2 октябрь кунги қарорига асосан қайта ташкил қилинган ҳамда Қорақалпоғистон Республикаси Адлия Вазирлиги томонидан давлат рўйхатидан ўтказилган.

Жамиятнинг асосий мақсади деҳқон бозори фаолиятини йўлга қўйиш орқали аҳолини деҳқончилик, чорвачилик маҳсулотлари ва бошқа зарур маҳсулотлар билан таъминлаш, бу борада деҳқонларнинг савдо-сотиқни амалга оширишлари учун барча зарур шарт-шароитларни яратиш ҳисобланади.

Манғит деҳқон бозори маъмуриятида бугунги кунда 23 нафар ходим ишлайди. Деҳқон бозори учун туман ҳокимининг 2010 йил 22 ноябрь кунги қарори асосида Навоий маҳалласи ҳудудидан жами 1,7 гектар ер майдони ажратиб берилган бўлиб, шундан қурилиш майдони 1 минг 934 квадрат метр, фойдаланиш майдони 1 минг 957 квадрат метрни ташкил қиладиган ёпиқ бозордаги савдо ўринлари сони 105тани ташкил қилади.

Бундан ташқари, дон маҳсулотларини сотишга мўлжалланган 129та, сабзавот маҳсулотларини сотишга ихтисослашган 82та, полиз маҳсулотларини сотишга мослаштирилган 16та ҳамда мева маҳсулотларини сотишда фойдаланиб келинаётган 92та ўринли бостирмалар мавжуд. Жами савдо расталари жами сони 424тани ташкил қилади.

Бозор ҳудудида 11та гўшт шохобчалари, 8та маиший хизмат кўрсатиш шохобчалари, 3та дори-дармон, 4та ветеринария ҳамда 89та хусусий озиқ-овқат дўконлари туман аҳолисига хизмат кўрсатмоқда.

Бозорлар маҳаллий қадрият ва анъаналарни сақлашда ҳам муҳим рол ўйнайди, чунки улар маҳаллий ҳунармандчилик ва миллий маҳсулотларни намойиш этиш учун муҳим платформа вазифасини ҳам бажаради. Деҳқон бозорида ҳунармандчилик маҳсулотлари, қўлдан ишланган рўзғор буюмларини сотиш учун ҳам алоҳида ўринлар мавжуд.

Бозор ҳудудида шунингдек, тарозихона, омборхона, сартарошхоналар фаолият юритмоқда. Туман солиқ инспекцияси ва Ички ишлар бўлимининг таянч пунклари эса аҳоли ва истеъмолчиларга зарур ёрдам кўрсатишга доимо шай.

Бозорда сотиладиган маҳсулотларнинг сифати ва хавфсизлиги, кўп жиҳатдан, санитария ва гигиена стандартларига қанчалик риоя қилинганига боғлиқ. Санитария қоидаларига амал қилиш, маҳсулотлар ифлосланишининг, яроқлилик муддати ўтган маҳсулотлар сотилишининг олдини олиш ва истеъмолчиларнинг соғлиғини ҳимоя қилишга катта эътибор қаратилади. Бу борада бозор ҳудудида ташкил қилинган санитария-ветеринария лабораториясининг аҳамияти катта.

Бозорга қарашли махсус савдо-харид корхонаси томонидан эса байрам кунлари арзонлаштирилган савдо ярмаркалари ташкил килинади. Бу эса қишлоқ хўжалиги ва озиқ-овқат маҳсулотларига талаб ортган даврда ҳам улар нархининг барқарорлигини таъминлашда муҳим омил ҳисобланади.

Бир сўз билан айтганда, “Манғит деҳқон бозори” масъулияти чекланган жамияти ва бозор маъмурияти барча амударёликлар ва туманимиз меҳмонларига сифатли савдо-сотиқ хизматларини кўрсатиб келмоқда.

Азамат Наримов, “Манғит деҳқон бозори” МЧЖ директори.