“Yosh chegarachilar” harbiy-vatanparvarlik musobaqasining tuman bosqichi oʻtkazildi

Oʻzbekiston Respublikasi Vazirlar Mahkamasining 2023-yil 26-iyundagi qarori bilan tasdiqlangan Nizom asosida mamlakatimizning chegaraoldi shahar va tumanlardagi umumiy oʻrta taʼlim maktablarida “Yosh chegarachilar” klublari tashkil qilingan edi. Nizomga asosan Oʻzbekiston Respublikasi Davlat xavfsizlik xizmati Chegara qoʻshinlarining harbiy qismlariga biriktirilgan mazkur klublarga maktablarning 9-, 10- va 11-sinf oʻquvchilari oʻz xohishiga koʻra aʼzo boʻlishlari mumkin.

Shuningdek, yuqoridagi qaror bilan “Yosh chegarachilar” harbiy-vatanparvarlik musobaqasini oʻtkazish tartibi toʻgʻrisida”gi Nizom ham tasdiqlangan boʻlib, ushbu hujjatga koʻra har yili mazkur tanlovda chegaraoldi shahar va tumanlardagi umumiy oʻrta taʼlim maktablaridagi eng faol klublar aniqlanadi va taqdirlanadi.

Bu yilgi “Yosh chegarachilar” harbiy-vatanparvarlik musobaqasining Amudaryo tuman bosqichida tumanning chegaraoldi hududlaridagi 12 ta maktablarda tashkil qilingan klublar jamoalari oʻzaro kuch sinashdilar.

Musobaqa avvalida tashkiliy qoʻmita aʼzolari va Davlat xavfsizlik xizmati chegara qoʻshinlarining Mangʻit shahrida joylashgan harbiy qismi masʼullari ishtirokchilarni musobaqa shartlari bilan tanishtirdilar.

Tumandagi 1-, 4-, 15-, 20-, 25-, 35-, 36-, 48-, 59-, 69-, 70- va 83-sonli maktablar jamoalarining har biri gʻoliblikka munosib ekanini amalda namoyon etish uchun musobaqaga kirishdilar.

Dastlab xar bir jamoaning saf tayyorgarligi, harbiy varaqalar, albom, vimpel, jamoaning ramziy bayrogʻi va nomi yozilgan taxtacha, jamoalarning maxsus formasi koʻrikdan oʻtkazildi va baholandi.

Soʻngra umumtaʼlim fanlari boʻyicha test sinovi oʻtkazilib, Kalashnikov avtomatini notoʻliq qismlarga ajratish va yigʻish boʻyicha jamoa aʼzolarining chaqqonliklari sinovdan oʻtkazildi. Keyin esa oʻgʻil bolalar 1000 metrga, qizlar 100 metrga yugurish, jamoa aʼzolari turnikda tortilish, azimut boʻyicha harakatlanish, granata uloqtirish boʻyicha mahoratlarini namoyish qilishdi. Ishtirokchilar ayniqsa, zaharlangan hududdan, toʻsiqlar yoʻlagidan oʻtish, tibbiy yordam koʻrsatish musobaqalarini oʻzgacha hayajon bilan namoyish qildilar. Musobaqa soʻngida esa jamoa aʼzolarining oʻq-dorilarni tashish, Kalashnikov avtomatidan oʻq otish va mazkur avtomatning maketi boʻyicha bilim va koʻnikmalari, mahorati sinovdan oʻtkazildi.

Hakamlar hayʼatining yakuniy qaroriga koʻra 59-sonli maktab jamoasi 3-, 83-sonli maktab jamoasi esa 2-oʻrinni egalladi. 48-sonli maktabda tashkil qilingan  “Yosh chegarachilar” klubining aʼzolaridan iborat jamoa 1-oʻrinni egalladi va musobaqaning Qoraqalpogʻiston Respublikasi bosqichiga yoʻllanmani qoʻlga kiritdi.

Yoshlarni vatanparvarlik ruhida tarbiyalash, davlat manfaatlari va suverenitetini fidokorona himoya qilishga tayyorlash, jismonan sogʻlom va maʼnan yetuk yosh avlodni kamol toptirish, ular oʻrtasida sogʻlom turmush tarzini targʻib qilish, oʻz yurti va xalqining taqdiri uchun yuksak masʼuliyat va javobgarlik hissini shakllantirish maqsadida tashkil qilingan mazkur musobaqaning tantanali yopilish marosimida 1-, 2- va 3-oʻrinni egallagan jamoalar tashkiliy qoʻmita tomonidan diplom, kubok va sovgʻalar bilan mukofotlanadi. “Eng ilgʻor” nominatsiyasi gʻoliblari esa tashkiliy qoʻmita tomonidan alohida sovgʻalar bilan taqdirlandi.

Gʻ.Yeshniyozov