Yoshlarga yer berish orqali ularning daromadlari oshiriladi va bandligi taʼminlanadi

Amudaryo tumani hokimligining katta majlislar zalida Oʻzbekiston Respublikasi Prezidentining 2024-yil 5-aprel kungi “Yoshlarga yer ajratish orqali ularning daromadlarini oshirish va bandligini taʼminlash, shuningdek yangi yer maydonlarini oʻzlashtirish chora-tadbirlari toʻgʻrisida”gi qarori mazmun-mohiyatiga bagʻishlangan yigʻilish boʻlib oʻtdi.

Yigʻilishda tumandagi ovul va mahalla fuqarolar yigʻinlaridagi “yettilik” aʼzolariga mazkur qarorda belgilangan ustuvor vazifalar boʻyicha keng tushunchalar berildi.

Yigʻilishda Oʻzbekiston Respublikasi Qishloq xoʻjaligi vazirligi boshqarma boshligʻi Asror Joʻrayev mazkur qaror bilan yoshlar uchun keng imkoniyatlar eshigi ochilganligi, yoshlar bandligini taʼminlash borasida ularga yer ajratib berish, yangi yerlarni oʻzlashtirish yuzasidan ustuvor vazifalar belgilab berilganligi toʻgʻrisida soʻz yuritdi.

Qayd etlishicha “Yoshlarga yer ajratish orqali ularning daromadlarini oshirish va bandligini taʼminlash, shuningdek, yangi yer maydonlarini oʻzlashtirish chora-tadbirlari toʻgʻrisida”gi Prezident qaroriga koʻra tuman hokimliklari zaxirasidagi jami 60 ming gektar yer maydoni elektron onlayn auktsion savdolariga qoʻyilib, dehqon xoʻjaliklarini tashkil etish uchun yoshlarga ijaraga beriladi hamda qishloq xoʻjaligi mahsulotlarini yetishtirishdan sotishgacha boʻlgan zanjirni qamrab oluvchi yangi tizim joriy etiladi.

Xususan, 60 ming gektar yer maydonini ijaraga berish boʻyicha elektron onlayn auktsion savdolari “E-auksion” elektron savdo platformasi orqali “mahalla yettiligi”ning tavsiyasi bilan shakllantiriladigan roʻyxatga kiritilgan yoshlar oʻrtasida oʻtkaziladi.

Bunda yer maydonlarini ijaraga berish boʻyicha elektron onlayn auktsion savdolari gʻoliblariga yer uchastkasi narxini 10-yil muddatga teng ulushlarda foizsiz boʻlib-boʻlib toʻlashga ruxsat beriladi. Shuningdek, yer maydonlarini elektron onlayn auktsion savdolari orqali ijaraga olgan yoshlar “Temir daftar”, “Ayollar daftari”, “Yoshlar daftari”dan chiqarilmaydi va ular uchun qonunchilikda belgilangan barcha imtiyoz va preferentsiyalar saqlab qolinadi.

Qarorga koʻra talabgorlarga 30-yil muddatgacha kichik lotlarda “bir massiv – bir mahsulot” tamoyili asosida sabzavot, kartoshka, poliz ekinlari, gul, koʻkatlar, makkajoʻxori doni, dukkakli va moyli ekinlar yetishtirishga sugʻoriladigan ekin maydonlari, bogʻdorchilik-uzumchilik yoʻnalishlari uchun koʻp yillik daraxtzorlar yoki samarasiz bogʻlar yer maydonlari, dorivor oʻsimliklar yetishtirish, chorvachilik yoʻnalishlari uchun chorva ozuqasi ekinlarini yetishtirishga moʻljallangan, lalmi, boʻz, yaylov va yangi oʻzlashtirilgan yer maydonlari ijaraga beriladi.

Talabgorlarga ajratiladigan yer maydonlari oʻlchamlari “mahalla yettiligi” taklifiga koʻra aniqlanadi. Talabgorlar tomonidan yer maydonlarida yetishtiriladigan ekin turlari va ular miqdorining doimiy monitoringi Yoshlar ishlari agentligining “Yosh fermerlar” platformasi orqali amalga oshiriladi.

Yigʻilishda ovul va mahalla fuqarolar yigʻinlari raislari hamda “mahalla yettiligi”ning boshqa aʼzolariga ushbu yangi tizim asosida ishlarni samarali tashkil qilish, yer maydoni olish istagidagi yoshlar roʻyxatini shakllantirish, onlayn auktsion natijalariga koʻra ijaraga yer olgan yoshlarning dehqonchilik faoliyatlarini boshlashlariga amaliy yordam koʻrsatish boʻyicha tegishli koʻrsatma va tavsiyalar berildi.

Charos Arslonova, tuman hokimligining Axborot xizmati rahbari.