AMUDARYo TUMANIDA “OLAM NURGA TOʻLSIN SEN BILAN, NAVROʻZ!” ShIORI OSTIDA BAYRAM TADBIRI OʻTKAZILDI
Navroʻz! Avesto davri, balki undan ham avvalroq mangu tiriklik mujdasi sifatida paydo boʻlgan, insoniyat tarixi bilan bogʻliq eng goʻzal, muborak va tabarruk ayyom. Turkiy davlatlar, hatto Rossiyaning turkiy xalqlari yashaydigan hududlari, Bolqon orollarigacha boʻlgan manzil va makonlarda, ayniqsa, Markaziy Osiyoda har bahor faslida intiqlik va shodiyonalik bilan nishonlanadigan bayram - Navroʻzni ayni davrda 300 milliondan ziyod turli millat va elatlar vakillari katta shodiyonalar bilan nishonlashadi.
Yangi kun – yangi dehqonchilik faslining boshlanishidan darak berib, oʻz nomi ila yangi rejalar, yangi ezgu niyatlar, yangi rizq-roʻz uchun qadamlar qoʻyiladigan Navroʻzi olam amudaryoliklar uchun ham qadrli. Yurtimizga Navroʻzi olam kirib kelishi arafasida oʻtkazilgan umumxalq hashari tufayli bugun tumanning har bir goʻshasi, har qarich yeri obod, koʻrkam. Koʻngillar quvonch va shodlik istab, Navroʻz sayliga chiqqan.
2024-yilda nishonlanayotgan Navroʻz ayyomining bosh gʻoyasi va shiori ham oʻzgacha! “Olam nurga toʻlsin sen bilan, Navroʻz!” Amudaryo tuman BOʻSM oʻyingohiga olib boruvchi yoʻl-u yoʻlaklar ushbu shiorga hamohang bezatilgan. Sertakalluf xalqimiz koʻnglini oʻzida mujassam etgan “Xush kelibsiz!” mulozamat shioriga “Navroʻz bayramingiz muborak boʻlsin!”, “Assalom Navroʻzi olam!”, “Istiqlolning koʻrkisan, Navroʻz!”, “2024-yil – Yoshlar va biznesni qoʻllab-quvvatlash yili” kabi quvonch va shodlik, mehr va eʼtirof tuygʻulari singdirilgan rang-barang shiorlar ulanib ketgan. Oʻyingoh misli kamalak ranglarga doʻngan, koʻzlarni quvontiradi. Turfa rang sharlar, gullar, charxpalaklar, argʻimchoqlar-u dorlar, xalq ertaklari qahramonlari kabi afsonalar bilan bezatilgan oʻyingoh osmoni varraklar parvozidan yanada goʻzallik kasb etgan.
Toʻrt tomonda bayramona ruh, atlas-u adras koʻrpachalar solingan supalarni toʻldirgan, bayram shukuhidan, dorilomon damlar shukronasidan koʻngillari yuksalgan nuroniy otaxon va onaxonlar qoʻllarini duoga ochib, el-yurtga omonlik, rizq-nasiba tilashadi. Nuroniylar duolaridan olam yorishib ketadi goʻyo. Shohsupalarda, nuroniy bobo va momolari bilan joʻr boʻlishib qadimiy xalq laparlari, aytishuv va oʻlanlarni maroq bilan kuylashayotgan yigit-qizlar, sochlariga jamalaklar taqib, qoshlariga oʻsma-yu koʻzlariga surmalar surgan, milliy xalq oʻyinlarini oʻynab, bir-birlariga zavq ulashayotgan qizaloqlar ham shunda, Navroʻz saylida!
Bu galgi Navroʻz sayliga ahli Amu eli koʻchib chiqqan goʻyo. Qator koʻrkam rastalarda oʻz hunarlarini namoyish etayotgan qoʻli gul hunarmandlar tomonidan tashkil etilgan xalq hunarmandchiligi koʻrgazmasi, milliy taomlar koʻrgazmalari, qator savdo rastalari, tumanning 49ta qishlogʻi va mahallasi ahlining oʻziga xos urf-odat va anʼanalari aks etgan shohsupalar toʻridagi noz-neʼmatlarga toʻla dasturxonlar koʻzlarni oladi. Bir tomonda dorboz-u masxarabozlik sanʼati namoyandalarining ajoyib oʻyinlari, bir tomonda amudaryolik saxovatpesha fermerlar tayyorlagan bahoriy tansiq taom - sumalak sayli! Sumalakning xushboʻyidan koʻngillar sarmast lahzalar naqadar farahli! Bu – tinchlik, bagʻrikenglik, nafosat va goʻzallik tantanasi!
Ushbu lahzalarda yangragan “Chorlov” musiqasi, karnay-surnay sadolari jarangi qalblarga tantanavorlik bagʻishlab, Navroʻz sayli boshlanadi. Amudaryo tumani hokimi Sobir Xoʻjametovning aziz Amu xalqiga tabrigida qayd etilganidek, tinchlik, doʻstlik, bagʻrikenglik hokim yurtda har kuni bayram, xalqimizning har bir kuni Navroʻz kabi tarovatli!
S.Xoʻjametov Navroʻz sayli ishtirokchilarini, butun Amudaryo tumani xalqini Yangi kun – Yangi dehqonchilik faslining boshlanishi bilan muborakbod etarkan, Navroʻzdan Navroʻzgacha Amudaryo tumanining turli sohalarida erishilgan yuksak natijalar, tobora obod va farovonlashib borayotgan zamonaviy qishloqlar, sportda, ijodda, taʼlim sohasida amudaryolik yoshlar erishayotgan yutuqlarni mamnuniyat bilan taʼkidladi. El-yurt obodligi va farovonligi yoʻlida fidoyilik bilan mehnat qilayotgan, qishloq va mahallalar hududlarini bogʻ-rogʻlarga aylantirayotgan fermerlarga, tadbirkor-u hunarmandlarga, sohibkor-u bogʻbonlar, taʼlim va sogʻliqni saqlash sohasi xodimlariga yanada yangi marralarni zabt etishlarida ulkan yutuqlar tiladi.
Shundan soʻng, Navroʻzona bezatilgan maydon uzra dillarni yayratuvchi Bahor taronalari yangradi. Qalblar entikdi, koʻzlar quvonchdan yayradi, yuzlarga bahoriy tabassum indi. Birlashgan millatlar tashkiloti tomonidan Xalqaro bayram sifatida eʼtirof etilgan Navroʻz sayli Amudaryo tumanida joʻshqinlik bilan davom etdi. “Olam nurga toʻlsin sen bilan, Navroʻz!” degan bosh gʻoya asosida Amudaryo tumani madaniyat boʻlimi sanʼatkorlari tomonidan tayyorlangan teatrlashtirilgan kontsert dasturi ijodkorlarining chiqishlari Navroʻz sayli ishtirokchilariga olam-olam zavq bagʻishladi. “Uchqun” ashula va raqs xalq ansambli, “Ofarin” folklor-etnografik xalq ansambli ijrochilarining har bir chiqishini xalq quvonch va olqishlar bilan kutib oldi.
Saylga goʻzallik va nafosat bagʻishlagan sportchilarning koʻrgazmali chiqishlari, badiiy gimnastika sporti malikalari boʻlgan amudaryolik qizaloqlarning shijoatlari, ular erishgan katta yutuqlar qalblarga faxr-u iftixor bagʻishladi.
Navroʻz sayli davomida har bir qishloq va mahalla oʻz polvonlari, mohir sportchilari bilan kurash, arqon tortishuv bahslarini qizitishdi. Kuyuk koʻpir-u mangʻitlik, Toʻlqin va qanglilik kuragi yerga tegmagan zabardast polvonlarga el-u xalq siltov boʻldilar. Qilichboyning, Doʻrman-u Xolimbegning, Boʻzsolma va Yuqori qishloq mahallalarining, Nazarxon-u Jumurovul, Oq oltin hamda Xitoy qishloqlarining shaʼnini himoya qilib kurash maydoniga belini bogʻlab tushgan polvonlar oʻrtasida doʻstlik, oʻzaro mehr-oqibat tamoyili baland tutildi. Arqon tortishuv musobaqalari, qoʻchqor urishtirish kabi Navroʻzga xos anʼanalar tomoshabinlar tomonidan olqishlar bilan qoʻllab-quvvatlandi. Barcha bellashuvlar gʻoliblariga Navroʻz sovgʻalari topshirildi.
Navroʻz – umumxalq bayrami tomoshalarida xalq oʻzaro mehr-muruvvatdan amudaryolik fermerlarning saxovatidan, qalblarga yashnash, yasharish, yaratish tuygʻularini baxsh etguvchi dilbar navolardan olam-olam zavq oldi. Oʻzbek, qoraqalpoq, qozoq, rus, turkman, tatar-u boshqird, koreys, ukrain va boshqa millat vakillari bir oila farzandlaridek ahil va inoq yashayotgan Amu zaminida Navroʻzi olam – Yangi kun – Yangi dehqonchilik fasli ana shunday shod-u xurramlik bilan kutib olindi.
Hamal kirganidan berib daraklar,
Yashillanib qoldi tol-u teraklar.
Turnalar ham qaytdi. Ezgu tilaklar,
Orzularni olib uchdi varraklar -
Vatan zavqqa toʻldi sen bilan, Navroʻz!
Navroʻz! Tashrifida ming bir sinoat,
Har dilni chulgʻamish ajib xalovat.
Qadamlari berib Yurtga salobat,
Yuraklar gul faslin etar qiroat -
Olam nurga toʻldi sen bilan, Navroʻz!
Robiya YOʻLDOShEVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
