48-sonli MTTda 8-mart – Xalqaro xotin-qizlar kuniga bagʻishlab "Zumradoylar bahsi" oʻtkazildi

Bahor – goʻzallik va nafosat fasli, shu bilan birga biri-biridan jozibali va dillarga orom bagʻishlovchi ayyomlar fasli ham. Shu bois, bahorning ilk sanasida oʻzbekning nazokatli va sadoqatli farzandi – Zulfiyaxonim tavalludi kuni bilan boshlanadigan bayramlar biri-biriga ulanib ketadi. 8-mart – Xalqaro xotin-qizlar ayyomi esa har bir koʻngilga, har bitta xonadonga, mamlakatimizga fayz-tarovat bagʻishlaydi.

Bu qutlugʻ sana munosabati bilan jajji qizaloqlardan tortib, munis va mehribon opajonlarga, nuroniy buvijonlarga samimiy hurmat va ehtirom koʻrsatiladi. Mehnat jamoalarida, davlat tashkilotlarida bayramona tadbirlar oʻtkazilib, goʻzal opa-singillar, aziz onajonlarni sharaflovchi kuy-qoʻshiqlar yangraydi.

Amudaryo tumanidagi 48-sonli maktabgacha taʼlim tashkiloti tarbiyalanuvchilari ishtirokida tashkillashtirilgan “Zumrodoylar” adabiy-musiqiy bayram ona bellashuv tadbirida ham fidoyi va mehnatkash, oilaparvar, munis va mehribon, latofatli ayol-qizlar sharaflandi.

“Zumradoylar” tadbirini 48-sonli maktabgacha taʼlim tashkiloti rahbari Xosiyat Qurbonboyeva ochdi va MTT tarbiyalanuvchilarini, ularning onajonlari hamda MTT xodimlarini 8-mart – Xalqaro xotin-qizlar kuni ayyomi bilan samimiy muborakbod etdi.

Shundan soʻng, turfa bahor gullari, sayroqi qushlar tasvirlari hamda bahor va ayolni sharaflovchi shiorlar  bilan bezatilgan sahnaga “Zumradoylar” taklif etildi. Biri-biridan shirin tilli “Zumradoylar” tarbiyachi opalari hamrohligida  epchillik, zukkolik fazilatlarini namoyish etish uchun navbatma-navbat 3ta shart boʻyicha bahslashdilar. Tadbirda birinchi shart talabiga koʻra, oʻzlarini sheʼriy nutq asosida tanishtirdilar.

“Zumradoylar” bahslariga mazmunli va jozibali tus berish maqsadida har bir shart boʻyicha bahslaridan keyin MTT guruhlarida tarbiyalanayotgan kichkintoylar tomonidan raqslar ashulalar ijro etildi.

Tadbir davomida  “Zumradoylar” bellashuvning ikkinchi shartini ham aʼlo darajada bajarishga muvaffaq boʻldilar. Ushbu shart talabiga muvofiq jajji qizaloqlar tadbirda oʻzlarini kuzatib oʻtirgan aziz onajonlari uchun mustaqil ravishda shaxsiy sovgʻa tayyorlashdi. Qizaloqlar oʻz qoʻllari bilan yasagan bahor gullari va chizgan rasmlarini onajonlariga taqdim etishib, ularning olqishlarini olishdi. Ularning erkin mavzudagi ikkinchi shartni aʼlo darajada uddalashganlaridan mamnun boʻlgan 17-sonli maktab oʻqituvchisi Gulnora Tursunova jajji “Zumradoylar”ni chin dildan tabrikladi.

Tadbir davomida MTTning maktabga tayyorlov guruhi tarbiyalanuvchilari hamda katta va kichik  guruh tarbiyalanuvchilari biri-biridan shoʻx raqslar ijro etishdi, onajonlari uchun sheʼrlar aytib berishdi. Tadbirning yakuniy  uchinchi shartiga koʻra, “Zumradoylar” oʻz onajonlariga boʻlgan mehr-muhabbatini erkin tarzda ifoda etishlari uchun imkon berildi. Yaʼni har bir ishtirokchi bayram tabriklarini izhor etdilar va “Olti xalfa” raqsini birgalikda mahorat bilan ijro qildilar.

8-mart – Xalqaro xotin-qizlar kuniga bagʻishlangan “Zumradoylar”  adabiy-musiqiy bellashuv tadbiri orqali 48-sonli MTT tarbiyalanuvchilarining donoliklari, epchilliklari, sogʻlom va barkamol voyaga yetayotgani namoyon boʻldi va bu ularning ota-onalarini cheksiz quvontirdi. Oʻz fikrlarini emin-erkin ifoda etib, sheʼr va topishmoqlarni burro tilda aytib berayotgan, mahorat bilan raqsga tushayotgan jajji bolajonlarning chiqishlari barchaga xush kayfiyat bagʻishladi.

Robiya YOʻLDOShEVA.