48-сонли МТТда 8 март – Халқаро хотин-қизлар кунига бағишлаб "Зумрадойлар баҳси" ўтказилди
Баҳор – гўзаллик ва нафосат фасли, шу билан бирга бири-биридан жозибали ва дилларга ором бағишловчи айёмлар фасли ҳам. Шу боис, баҳорнинг илк санасида ўзбекнинг назокатли ва садоқатли фарзанди – Зулфияхоним таваллуди куни билан бошланадиган байрамлар бири-бирига уланиб кетади. 8 март – Халқаро хотин-қизлар айёми эса ҳар бир кўнгилга, ҳар битта хонадонга, мамлакатимизга файз-тароват бағишлайди.
Бу қутлуғ сана муносабати билан жажжи қизалоқлардан тортиб, мунис ва меҳрибон опажонларга, нуроний бувижонларга самимий ҳурмат ва эҳтиром кўрсатилади. Меҳнат жамоаларида, давлат ташкилотларида байрамона тадбирлар ўтказилиб, гўзал опа-сингиллар, азиз онажонларни шарафловчи куй-қўшиқлар янграйди.
Амударё туманидаги 48-сонли мактабгача таълим ташкилоти тарбияланувчилари иштирокида ташкиллаштирилган “Зумродойлар” адабий-мусиқий байрам она беллашув тадбирида ҳам фидойи ва меҳнаткаш, оилапарвар, мунис ва меҳрибон, латофатли аёл-қизлар шарафланди.
“Зумрадойлар” тадбирини 48-сонли мактабгача таълим ташкилоти раҳбари Хосият Қурбонбоева очди ва МТТ тарбияланувчиларини, уларнинг онажонлари ҳамда МТТ ходимларини 8 март – Халқаро хотин-қизлар куни айёми билан самимий муборакбод этди.
Шундан сўнг, турфа баҳор гуллари, сайроқи қушлар тасвирлари ҳамда баҳор ва аёлни шарафловчи шиорлар билан безатилган саҳнага “Зумрадойлар” таклиф этилди. Бири-биридан ширин тилли “Зумрадойлар” тарбиячи опалари ҳамроҳлигида эпчиллик, зукколик фазилатларини намойиш этиш учун навбатма-навбат 3та шарт бўйича баҳслашдилар. Тадбирда биринчи шарт талабига кўра, ўзларини шеърий нутқ асосида таништирдилар.
“Зумрадойлар” баҳсларига мазмунли ва жозибали тус бериш мақсадида ҳар бир шарт бўйича баҳсларидан кейин МТТ гуруҳларида тарбияланаётган кичкинтойлар томонидан рақслар ашулалар ижро этилди.
Тадбир давомида “Зумрадойлар” беллашувнинг иккинчи шартини ҳам аъло даражада бажаришга муваффақ бўлдилар. Ушбу шарт талабига мувофиқ жажжи қизалоқлар тадбирда ўзларини кузатиб ўтирган азиз онажонлари учун мустақил равишда шахсий совға тайёрлашди. Қизалоқлар ўз қўллари билан ясаган баҳор гуллари ва чизган расмларини онажонларига тақдим этишиб, уларнинг олқишларини олишди. Уларнинг эркин мавзудаги иккинчи шартни аъло даражада уддалашганларидан мамнун бўлган 17-сонли мактаб ўқитувчиси Гулнора Турсунова жажжи “Зумрадойлар”ни чин дилдан табриклади.
Тадбир давомида МТТнинг мактабга тайёрлов гуруҳи тарбияланувчилари ҳамда катта ва кичик гуруҳ тарбияланувчилари бири-биридан шўх рақслар ижро этишди, онажонлари учун шеърлар айтиб беришди. Тадбирнинг якуний учинчи шартига кўра, “Зумрадойлар” ўз онажонларига бўлган меҳр-муҳаббатини эркин тарзда ифода этишлари учун имкон берилди. Яъни ҳар бир иштирокчи байрам табрикларини изҳор этдилар ва “Олти халфа” рақсини биргаликда маҳорат билан ижро қилдилар.
8 март – Халқаро хотин-қизлар кунига бағишланган “Зумрадойлар” адабий-мусиқий беллашув тадбири орқали 48-сонли МТТ тарбияланувчиларининг доноликлари, эпчилликлари, соғлом ва баркамол вояга етаётгани намоён бўлди ва бу уларнинг ота-оналарини чексиз қувонтирди. Ўз фикрларини эмин-эркин ифода этиб, шеър ва топишмоқларни бурро тилда айтиб бераётган, маҳорат билан рақсга тушаётган жажжи болажонларнинг чиқишлари барчага хуш кайфият бағишлади.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
