1-SONLI MAKTABDA “BOBUR – BUYuK SIYMO” DEB NOMLANGAN TADBIR OʻTKAZILIB, BOBOKALONGA EHTIROM KOʻRSATILDI

Yurtimizda buyuk bobokalonimiz shoh va shoir, ulugʻ sarkarda Zahiriddin Muhammad Bobur tavalludining 541-yilligi keng nishonlandi. Sana munosabati bilan Amudaryo tumanidagi umumtaʼlim muassasalarida ham maʼnaviy-maʼrifiy tadbirlar, adabiy kechalar oʻtkazildi.

14-fevral kuni 1-sonli umumtaʼlim maktabida ulugʻ ajdodimiz tavalludiga bagʻishlab “Bobur – buyuk siymo” deb nomlangan katta tadbir tashkil etildi. Maktabning ona tili va adabiyot, tarix va tarbiya fanlari oʻqituvchilari tomonidan oʻquvchilar bilan hamkorlikda tayyorlangan ushbu tadbirda dastlab bobokalonimiz hayoti va ijodi toʻgʻrisida keng maʼlumotlar berildi. Shoh va shoir Zahiriddin Muhammad Bobur oʻz hayotining asosiy qismini harbiy yurishlar va janglarda oʻtkazgani, u Movaraunnahrning tarqoq viloyatlarini birlashtirish va buyuk temuriylar davlatini yangidan tiklashga uringani haqida soʻz yuritilib, ulugʻ ajdodimizning ulkan davlat yaratish orzusi Hindistonda amalga oshgani, Buyuk Boburiylar imperiyasiga asos solishga muyassar boʻlgani faxr bilan eʼtirof etildi.

Tadbirni maktabning 6-sinf oʻquvchilari Zarnigor Yusufboyeva, Kumushoy Otamurodova, Umida Qodirberganova, Gulzoda Bahodirovalar bobokalon qalamiga mansub boʻlgan gʻazal va ruboiylar bilan davom ettirdi. Shuningdek, 5-sinf oʻquvchilari Zilola Bahromova, Doston Qozoqboyev, Bahodir Shukurullayev, Barchinoy Yakubova, Diyorbek Ikromov, Shaydo Ibragimova hamda boshqalar ham Bobur ruboiylaridan ifodali oʻqib berdilar. Maktabning 7-sinf oʻquvchilari ijrosidagi “Atlas koʻylagim” deb nomlangan qoʻshiqqa ijro etgan ajoyib raqslar ham tadbir ishtirokchilarini yanada xushnud etdi.

Tadbir davomida maktabning 7-sinf oʻquvchilari “Bobur Hindistonda” deb nomlangan sahna koʻrinishini namoyish etdilar va tarixiy shaxslar obrazlarini jonlantirishga harakat qilib, oʻz iqtidorlarini koʻrsatdilar. Ayniqsa, Javohir Shomurodov shoh Bobur, Shohruh Ibrohimov va Jahongir Alimboyevlar vazirlar, Alixont Charshamov elchi rollarini mahorat bilan ijro etdilar.

Sahna koʻrinishi davomida qariyb uch yuz yil hukm surgan Boburiylar hukmronligi xalqlar oʻrtasida hamjihatlikni oʻrnatish, shuningdek, aholining barcha qatlamlarini maʼrifatli qilishga yoʻnaltirilganligi ifoda etilib, shunday kuchli davlat barpo etgan va buyuk sulolaga asos solgan shoh Boburning Vatan sogʻinchi aks etgan ijod namunalarining yaratilish tarixi gavdalantirildi.

Oʻquvchilar tadbir davomida Boburning buyuk shoir va shu bilan birga isteʼdodli harbiy va siyosatchi boʻlganligini, uning ruboiylari hozirgi kunda ham koʻplab sheʼrxonlarni hayratlantirishi va ilhomlantirishini bilib olishdi.

Taʼkidlab oʻtilganidek, Bobur Mirzo 47-yillik hayoti mobaynida boy adabiy va ilmiy meros qoldirgan. U jahon miqyosida eʼtirof etilgan mashhur “Boburnoma”, ajoyib gʻazallar va ruboiylar, musulmon qonunchiligiga oid “Mubayyin”, sheʼriyat qoidalariga bagʻishlangan “Aruz risolasi”, musiqa va harbiy sanʼatga bagʻishlangan asarlar, shuningdek, “Xatti Boburiy” maxsus alifbosini yaratgan.

Tadbir soʻngida maktabning 6-sinf oʻquvchilari tomonidan Boburning “Lola” gʻazaliga sahnalashtirilgan raqs ham namoyish etildi va barchaga zavq ulashildi.

Zahiriddin Muhammad Bobur tavalludining 541-yilligiga bagʻishlab oʻtkazilgan “Bobur – buyuk siymo” nomli tadbir oʻquvchi-yoshlarning buyuk siymo haqidagi bilimlarini yana boyitgani bilan ahamiyatli boʻldi.

O.Xudoyberganova.