JUMURTOV ETAGIDAGI MAʼRIFAT MASKANI

Vatanimiz ravnaqi, millatimiz kelajagini ilmli, iqtidorli, yurtiga fidoyi va vatanparvar yoshlar timsolida koʻramiz. Dunyoda iqtidorsiz bola boʻlmasligi ayon. Faqat oilada, taʼlim muassasasida bolaning iqtidorini aniqlab, uni shu yoʻnalishda rivojlantirishga eʼtiborni kuchaytirish lozim.

Oq oltin ovulidagi Toza bosuv mahallasida joylashgan 50-sonli umumiy oʻrta taʼlim maktabi pedagogik jamoasi zimmalaridagi bunday sharafli va masʼuliyatli vazifani yorugʻ yuz bilan uddalab kelayotganlardan deb bemalol ayta olamiz.

Ushbu taʼlim dargohining quvvati 220 oʻquvchi oʻringa moʻljallangan boʻlib, ayni kunda ikki smenada 402 nafar oʻquvchilar taʼlim-tarbiya olishmoqda. 1971-yilda qurilib, foydalanishga topshirilgan maktab binosi 2018-yilda mahalliy byudjet hisobidan joriy taʼmirlandi.

Izlagan imkon topadi deganlariday, 40 nafar oliy maʼlumotli oʻqituvchilar ushbu muassasada oʻquvchi yoshlarga fan asoslarini chuqur oʻrgatishga, ularning ilmli, iqtidorli va salohiyatli boʻlib voyaga yetishiga intilmoqda. Eʼtiborlisi ushbu jamoaning salmoqli qismi maktabning oʻz sobiq oʻquvchilari.

Maktabda “Besh tashabbus” doirasidagi fan toʻgaraklari faoliyati yoʻlga qoʻyilgan boʻlib, ularda malakali oʻqituvchilar mashgʻulot olib borishadi. Xususan, “Kitobxon yoshlar” toʻgaragida ona tili va adabiyot fani oʻqituvchisi Dildora Davlatboyeva, kutubxonachi Nilufar Erimbetova, boshlangʻich sinf oʻqituvchisi Gulnoza Rahimovalar, “Mohir qoʻllar” toʻgaragida Ozoda Boltaboyeva, “Qizlarjon” klubida Adolat Abdullayeva, badiiy havaskorlik toʻgaragida Islom Yusupov, “Yosh rassomlar” toʻgaragida Roza Kujanovalar oʻquvchilarning iqtidorini rivojlantirishga erishmoqdalar.

Fan toʻgaraklarida oʻquvchilarning dars mashgʻulotlarida olgan bilimlari mustahkamlanib, boyitib borilayotganligi oʻzining quvonarli natijalarini berayotir. 2022-2023 oʻquv yilida maktabdan uchirma boʻlgan 19 nafar bitiruvchilarning 15 nafari oliy taʼlim muassasalarining talabalari boʻlishgani oʻqituvchilar darslar samaradorligiga qay darajada erishayotgani koʻrsatib turibdi.

Joriy oʻquv yilgi asosiy fanlar olimpiadasida 9-sinf oʻquvchisi Bayansuluv Madiyarova, 9-sinf oʻquvchisi Dilnura Yursinova, 10-sinf oʻquvchisi Umida Soliyevalar yuqori ball toʻplab, gʻoliblikka erishdilar. Oliy taʼlim, fan va innovatsiyalar vazirligi huzuridagi bilim va malakalarni baholash Agentligi tomonidan oʻtkazilgan sinovda 10-sinf oʻquvchisi Shahzoda Qurbonboyeva ingliz tili fanidan yuqori natija qayd etib, V1 darajali sertifikatga ega boʻldi.

Muassasa oʻqituvchilari oʻquvchilarga fan asoslarini chuqur oʻrgatishga erishish bilan bir qatorda, oʻz ustlarida ham ijodiy ishlab, iqtidorini rivojlantirishga intilmoqdalar. Natijada Feruza Ajmagʻambetova rus tili, Shoira Erkaboyeva matematika, Dildor Karimboyeva ona tili va adabiyot, Dildora Davlatboyeva ona tili va adabiyot fanidan xalqaro va unga tenglashtirilgan milliy sertifikatga ega boʻldilar.

Erishilayotgan yutuqlar muassasa direktori Alisher Oʻrozboyev, oʻquv ishlari boʻyicha direktor oʻrinbosari Roziya Rajabova, maʼnaviy-maʼrifiy ishlar boʻyicha direktor oʻrinbosari Akram Qurbonboyevlarning hamjihatlikda oʻqituvchilar, oʻquvchilar orasida sogʻlom maʼnaviy muhit yaratganligi, ularni yaxshi ishlash, oʻqishga ragʻbatlantira olishganligi samarasi desak, adashmagan boʻlamiz. Chunki intilish bor joydagina muvaffaqiyatlar boʻladi.

Biz maʼrifat va maʼnaviyat beshigi boʻlgan maktab oʻqituvchilar jamoasining kelgusi ishlarida ham yutuqlar tilab qolamiz.

Oygul RAJABOVA.