ЖУМУРТОВ ЭТАГИДАГИ МАЪРИФАТ МАСКАНИ

Ватанимиз равнақи, миллатимиз келажагини илмли, иқтидорли, юртига фидойи ва ватанпарвар ёшлар тимсолида кўрамиз. Дунёда иқтидорсиз бола бўлмаслиги аён. Фақат оилада, таълим муассасасида боланинг иқтидорини аниқлаб, уни шу йўналишда ривожлантиришга эътиборни кучайтириш лозим.

Оқ олтин овулидаги Тоза босув маҳалласида жойлашган 50-сонли умумий ўрта таълим мактаби педагогик жамоаси зиммаларидаги бундай шарафли ва масъулиятли вазифани ёруғ юз билан уддалаб келаётганлардан деб бемалол айта оламиз.

Ушбу таълим даргоҳининг қуввати 220 ўқувчи ўринга мўлжалланган бўлиб, айни кунда икки сменада 402 нафар ўқувчилар таълим-тарбия олишмоқда. 1971 йилда қурилиб, фойдаланишга топширилган мактаб биноси 2018 йилда маҳаллий бюджет ҳисобидан жорий таъмирланди.

Излаган имкон топади деганларидай, 40 нафар олий маълумотли ўқитувчилар ушбу муассасада ўқувчи ёшларга фан асосларини чуқур ўргатишга, уларнинг илмли, иқтидорли ва салоҳиятли бўлиб вояга етишига интилмоқда. Эътиборлиси ушбу жамоанинг салмоқли қисми мактабнинг ўз собиқ ўқувчилари.

Мактабда “Беш ташаббус” доирасидаги фан тўгараклари фаолияти йўлга қўйилган бўлиб, уларда малакали ўқитувчилар машғулот олиб боришади. Хусусан, “Китобхон ёшлар” тўгарагида она тили ва адабиёт фани ўқитувчиси Дилдора Давлатбоева, кутубхоначи Нилуфар Эримбетова, бошланғич синф ўқитувчиси Гулноза Раҳимовалар, “Моҳир қўллар” тўгарагида Озода Болтабоева, “Қизларжон” клубида Адолат Абдуллаева, бадиий ҳаваскорлик тўгарагида Ислом Юсупов, “Ёш рассомлар” тўгарагида Роза Кужановалар ўқувчиларнинг иқтидорини ривожлантиришга эришмоқдалар.

Фан тўгаракларида ўқувчиларнинг дарс машғулотларида олган билимлари мустаҳкамланиб, бойитиб борилаётганлиги ўзининг қувонарли натижаларини бераётир. 2022-2023 ўқув йилида мактабдан учирма бўлган 19 нафар битирувчиларнинг 15 нафари олий таълим муассасаларининг талабалари бўлишгани ўқитувчилар дарслар самарадорлигига қай даражада эришаётгани кўрсатиб турибди.

Жорий ўқув йилги асосий фанлар олимпиадасида 9 синф ўқувчиси Баянсулув Мадиярова, 9-синф ўқувчиси Дилнура Юрсинова, 10-синф ўқувчиси Умида Солиевалар юқори балл тўплаб, ғолибликка эришдилар. Олий таълим, фан ва инновациялар вазирлиги ҳузуридаги билим ва малакаларни баҳолаш Агентлиги томонидан ўтказилган синовда 10-синф ўқувчиси Шаҳзода Қурбонбоева инглиз тили фанидан юқори натижа қайд этиб, В1 даражали сертификатга эга бўлди.

Муассаса ўқитувчилари ўқувчиларга фан асосларини чуқур ўргатишга эришиш билан бир қаторда, ўз устларида ҳам ижодий ишлаб, иқтидорини ривожлантиришга интилмоқдалар. Натижада Феруза Ажмағамбетова рус тили, Шоира Эркабоева математика, Дилдор Каримбоева она тили ва адабиёт, Дилдора Давлатбоева она тили ва адабиёт фанидан халқаро ва унга тенглаштирилган миллий сертификатга эга бўлдилар.

Эришилаётган ютуқлар муассаса директори Алишер Ўрозбоев, ўқув ишлари бўйича директор ўринбосари Розия Ражабова, маънавий-маърифий ишлар бўйича директор ўринбосари Акрам Қурбонбоевларнинг ҳамжиҳатликда ўқитувчилар, ўқувчилар орасида соғлом маънавий муҳит яратганлиги, уларни яхши ишлаш, ўқишга рағбатлантира олишганлиги самараси десак, адашмаган бўламиз. Чунки интилиш бор жойдагина муваффақиятлар бўлади.

Биз маърифат ва маънавият бешиги бўлган мактаб ўқитувчилар жамоасининг келгуси ишларида ҳам ютуқлар тилаб қоламиз.

Ойгул РАЖАБОВА.