AMUDARYo TUMANINING BOGʻ MAHALLASIDA MAʼNAVIY MUHIT AHVOLI QANDAY?

Inson ilk tarbiyani oʻz oilasida oladi, bu hech kimga sir emas. Tarbiyaning asl mohiyati ota-onaning oʻzaro munosabatiga va oiladagi maʼnaviy muhitga borib taqaladi. Qachonki, ota-ona farzandlari koʻz oldida yolgʻon soʻzlamasa, bir-biriga qoʻpol muomalada boʻlmasa, oʻzaro mehr-oqibatli boʻlsa, farzandlarda ham shunday ijobiy xislatlar shakllanadi. Shu boisdan ham ularga oilada, mahallada, taʼlim-tarbiya muassasalarida sogʻlom muhit yaratish bosh vazifadir.

Amudaryo tumanining “Bogʻ” mahallasida bu vazifa qay tarzda ado etilmoqda? amunews.uz veb-sayti tahririyati xodimlari bu boradagi ishlar bilan tanishish maqsadida shu yilning 10-yanvarida mazkur mahallada boʻldilar.

Tumanimizning 2-sektoriga qarashli mahallaning umumiy maydoni 2854 gektarni tashkil etadi. Hududda 892 oilada 3658 nafar aholi istiqomat qiladi. Aholi, ayniqsa yoshlarning turli diniy-ekstemistik va terrorchilik oqimlari taʼsiriga tushib qolishining oldini olish boʻyicha, yoshlar kamoli yoʻlida amalga oshirilayotgan ishlar boʻyicha mahallada boʻlib oʻtgan tadbirda batafsil soʻz yuritildi.

Oliy Majlis huzuridagi nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondining “Sogʻlom muhit – sogʻlom hayot” nomli grant loyihasi doirasida oʻtkazilgan tadbirga mahalla fuqarolar yigʻini masʼullari, faollari, nuroniy otaxonlar, onaxonlar, yoshlar ishtirok etdilar.

Tadbirni mahalla fuqarolar yigʻini raisi Mahmudjon Haytakov ochdi va yigʻilganlarga tadbir maqsadini tushuntirdi.

Kun tartibidagi mavzu yuzasidan amunews.uz veb-sayti muxbiri Oygul Rajabova maʼruza qildi. U oʻz soʻzida yoshlarning maʼnaviyatini yuksaltirish, ularning boʻsh vaqtlarini mazmunli oʻtkazish, mafkura maydonining turli xurujlaridan himoya qilish, maʼnaviy-ruhiy va intellektual salohiyatini oshirish uchun avvalo ularga sogʻlom hayot tarzi barqaror boʻlmogʻi, yoshlarning barkamol boʻlib voyaga yetishi uchun oila, mahalla, keng jamoatchilik, taʼlim muassasasi hamkorlikda harakat qilmogʻi lozimligini taʼkidladi.

Mahalla fuqarolar yigʻini xotin-qizlar faoli Raʼno Abdullayeva bu borada amalga oshirilayotgan ishlar xususida batafsil gapirdi. Taʼkidlanishicha, mahallada ijtimoiy-maʼnaviy muhit barqarorligiga salbiy taʼsir koʻrsatuvchi holatlarning sodir etilishining oldi olish, yoshlarning yot gʻoyalar taʼsiriga tushib qolishiga yoʻl qoʻymaslik borasida tizimli ishlar amalga oshirilgan. Natijada oʻtgan yilda yoshlarning turli diniy-ekstremistik va terrorchilik oqimlari taʼsiriga tushib qolish holatlari sodir etilmagan.

Tadbir kun tartibidagi mavzu yuzasidan hudud imomi, “Bir nuroniy oʻn yoshga masʼul” tamoyili asosida hududning turmushda muammolarga duch kelgan 10 nafar yoshlarini otaliqqa olib, amaliy yordamlar koʻrsatayotgan Qurol Eshchonov, yoshlar yetakchisi Azizbek Xudanovlar ham oʻz fikr-mulohazalarini bildirdilar.

Tadbirda yoshlar kamoli yoʻlida amalga oshirilishi lozim boʻlgan vazifalar ham belgilab olindi.

Sevara Ismoilova