QORAQALPOQ TILIGA DAVLAT TILI MAQOMI BERILGANINING 34 YILLIGI KENG NIShONLANDI
Til – millat koʻzgusi, milliy-maʼnaviy iftixori. Har qanday xalqning jahon hamjihamiyatidagi oʻrni va nufuzi uning tili, til orqali milliy-maʼnaviy qadriyatlari nechogʻlik qadr topgani bilan belgilanadi. Shu bois, har bir xalq oʻz tilining umri boqiyligi, zamonlar silsilasidan sof va oʻziga xos jarangi bilan avloddan-avlodga oʻtib, buyuk maʼnaviy meros, iftixor timsoli sifatida oʻtib, qadr topishi uchun intiladi va davlat ramzlari qatorida hamisha yuksak maqomda boʻlishi uchun intiladi.
Shu nuqtai nazardan olib qaraydigan boʻlsak, qoralpoq tili ham oʻzining leksik boyligi, goʻzal jarangi bilan koʻplab yondosh va qardosh xalqlarni oʻziga maftun etib keladi. Xususan, qoraqalpoq tili aforizmlarga boyligi, sinonimik qatorlarining xilma-xilligi, antonim, paronim, omonim soʻzlarning oʻziga xos jozibasi bilan ajralib turadi va ana shu oʻziga xoslik tufayli qoraqalpoq shoir va yozuvchilari yaratgan badiiy asarlar namunalari xalq orasida juda tez ommalashib ketadi.
Amudaryo tumanidagi 30-sonli umumtaʼlim maktabida qoraqalpoq tiliga davlat tili maqomi berilganining 34 yilligi munosabati bilan boʻlib oʻtgan “Til – millat oynasi” mavzusidagi adabiy-musiqiy va maʼnaviy-maʼrifiy tadbirda qoraqalpoq tilining nufuzi, qadr-qimmati xususida mufassal soʻz yuritildi.
Avvalo tadbir oʻtkaziladigan maktab sahnasi qoraqalpoq shoir va yozuvchilarining yetuk asarlari, qoraqalpoq tilining taraqqiyot bosqichlari haqidagi qoraqalpoq olimlarining ilmiy maqolalari, shuningdek, qoraqalpoq xalqining oʻziga xos, betakror urf-odat va anʼanalarini aks ettiruvchi koʻrgazmali vositalar, oʻquvchilar tomonidan tayyorlangan suratlar, albomlar va gullar bilan bezatildi.
Tadbirda oʻquvchi-yoshlar qoraqalpoq xalqining urf-odat va anʼanalari xalqidagi sahna koʻrinishlarini namoyish etib, toʻy-marosimlar va bayramlarda yigit va qizlarning topqirligi, epchilligi va hozirjavobliklarini oʻzida mujassam etgan aytishuvlarini nihoyatda jozibadorlik bilan ijro qilib berdilar.
Shundan soʻng, har bir sinf oʻquvchilari tomonidan tayyorlangan qoraqalpoq xalq raqslari, milliy oʻyinlar, sheʼriy bahslar maromiga yetkazib ijro etildi. Ayniqsa, xalqona, baxshiyona tarzdagi sheʼriy bahslar, qoraqalpoqcha kuy-qoʻshiqlar, faqat qoraqalpoqlargagina xos boʻlgan aytishuvlar tadbir ishtirokchilariga koʻtarinki kayfiyat bagʻishlab, har bir qalbda qoraqalpoq tilining oʻziga xos tovlanishlariga, serjarang ohangiga cheksiz mehr-muhabbat uygʻotdi.
Boʻlib oʻtgan mazkur tadbir oʻquvchi-yoshlar qalbida qoraqalpoq tiliga nisbatan mehr-muhabbat, bagʻrikenglik, millatlararo totuvlik va ushbu tilda soʻzlashishdan faxrlanish tuygʻularini yanada mustahkamladi.
Robiya YOʻLDOShEVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
