“Kamalak yulduzlari” festivalining tuman bosqichi gʻoliblari aniqlandi

Isteʼdodli bolalarni aniqlash, ularni har tomonlama qoʻllab-quvvatlash, isteʼdod va mahoratlarini namoyon qilishlari uchun imkoniyat yaratish, yosh avlodning maʼnaviy olamini boyitish, madaniy saviyasini yuksaltirish, sanʼat va goʻzallikka intilishini kuchaytirish maqsadida yurtimizda har yili anʼanaviy tarzda “Kamalak yulduzlari” Respublika bolalar ijodiyoti festivali oʻtkazilib kelinmoqda.

Festivalning joriy yilgi Amudaryo tumani bosqichi 28-noyabr kuni 9-sonli Bolalar musiqa va sanʼat maktabi hamda tuman Maktabgacha va maktab taʼlimi boʻlimiga qarashli umumtaʼlim maktablarida boʻlib oʻtdi.

Tanlov shaklida oʻtkaziladigan “Kamalak yulduzlari” Respublika bolalar ijodiyoti festivalining asosiy maqsadi iqtidorli bolalarning ijodi, tashabbuslarini keng ommaga ayniqsa, yoshlar orasida targʻib etish, havaskor va professional jamoalarning ijodiy faoliyatini ragʻbatlantirishdir.

Oʻzbekiston Yoshlar ittifoqi Amudaryo tuman boʻlimi qoshidagi “Kamalak” bolalar tashkiloti, tuman Maktabgacha va maktab taʼlimi boʻlimi hamda tuman Madaniyat boʻlimi hamkorligida umumtaʼlim maktablari oʻquvchilari orasidan yosh isteʼdod egalarini izlab topish va ularni qoʻllab-quvvatlash maqsadida oʻtkazilgan mazkur festivalining Amudaryo tuman bosqichida 85ta maktabdan jami 525 nafar oʻquvchi-yoshlar ishtirok etdilar.

Festivalning tuman bosqichida 6 yoshdan 15 yoshgacha boʻlgan ijodkor va iqtidorli bolalar ishtirok etishdi.

Bolalar oʻrtasida madaniyat, adabiyot va sanʼatni targʻib qilishga yoʻnaltirilgan mazkur festival 6ta yoʻnalish va 6ta nominatsiya boʻyicha oʻtkazildi. “A” yoʻnalishda oʻquvchilar fortepiano, torli cholgʻular, damli va zarbli cholgʻular, “B” yoʻnalishda estrada cholgʻu ijrochiligi, xalq cholgʻulari, anʼanaviy cholgʻu ijrochiligi, “C” yoʻnalishda anʼanaviy xonandalik, akademik xonandalik, estrada xonandaligi, folklor va xor jamoalari, “D” yoʻnalishda xoreografiya, milliy raqs, ball raqsi hamda zamonaviy raqslar boʻyicha oʻz iqtidorlarini namoyish qildilar. Ishtirokchilar “E” yoʻnalishida tasviriy sanʼat – grafika, rang tasvir, haykaltaroshlik, amaliy sanʼat, kulolchilik, zardoʻzlik, quroqchilik, gilamdoʻzlik, biser toʻqish, dizaynerlik, yumshoq oʻyinchoqsozlik, naqqoshlik, kashtachilik, yogʻoch oʻymakorligi, “F” yoʻnalishida esa nasr – hikoya, ertak, nazm yoʻnalishi, yaʼni sheʼr, gʻazal, dostonchilik yoʻnalishlari boʻyicha oʻzaro bellashdilar.

Festivalda ishtirokchi oʻgʻil-qizlar tomonidan namoyish etilgan sanʼat namunalari hayʼat aʼzolari tomonidan haqqoniy baholab borildi.

“Kamalak yulduzlari” Respublika bolalar ijodiyoti festivalining tuman bosqichida barcha yoʻnalishlar boʻyicha jami 18 nafar gʻoliblar aniqlandi va ular festivalning Qoraqalpogʻiston Respublikasi bosqichiga yoʻllanmani qoʻlga kiritdilar.

Gʻoliblar Oʻzbekiston yoshlar ittifoqi Amudaryo tuman boʻlimi tomonidan diplom hamda esdalik sovgʻalari bilan taqdirlandi.

Iqtidorning kashf etilishi yer bagʻridan otilib chiqqan buloqqa oʻxshaydi. U yuz ochdimi, koʻngillarga xushnudlik ulashadi. Insonda hayrat va havas tuygʻusini uygʻotadi. Yosh iqtidorlarni aniqlashda “Kamalak yulduzlari” tanlovining ham ahamiyati nihoyatda katta.

Mamlakatimizda yosh avlodga koʻrsatilayotgan eʼtibor va gʻamxoʻrlik tufayli, qolaversa, oʻtkazilayotgan turli tanlov va festivallar ularning iqtidor va salohiyatini toʻlaqonli namoyon etishlari uchun keng imkoniyatlar eshigini ochib bermoqda, qalblarida ona Vatanga muhabbat, istiqlol gʻoyalariga hurmat va sadoqat tuygʻularini mustahkamlashga xizmat qilmoqda.

Sevara Ismoilova