“Камалак юлдузлари” фестивалининг туман босқичи ғолиблари аниқланди

Истеъдодли болаларни аниқлаш, уларни ҳар томонлама қўллаб-қувватлаш, истеъдод ва маҳоратларини намоён қилишлари учун имконият яратиш, ёш авлоднинг маънавий оламини бойитиш, маданий савиясини юксалтириш, санъат ва гўзалликка интилишини кучайтириш мақсадида юртимизда ҳар йили анъанавий тарзда “Камалак юлдузлари” Республика болалар ижодиёти фестивали ўтказилиб келинмоқда.

Фестивалнинг жорий йилги Амударё тумани босқичи 28 ноябрь куни 9-сонли Болалар мусиқа ва санъат мактаби ҳамда туман Мактабгача ва мактаб таълими бўлимига қарашли умумтаълим мактабларида бўлиб ўтди.

Танлов шаклида ўтказиладиган “Камалак юлдузлари” Республика болалар ижодиёти фестивалининг асосий мақсади иқтидорли болаларнинг ижоди, ташаббусларини кенг оммага айниқса, ёшлар орасида тарғиб этиш, ҳаваскор ва профессионал жамоаларнинг ижодий фаолиятини рағбатлантиришдир.

Ўзбекистон Ёшлар иттифоқи Амударё туман бўлими қошидаги “Камалак” болалар ташкилоти, туман Мактабгача ва мактаб таълими бўлими ҳамда туман Маданият бўлими ҳамкорлигида умумтаълим мактаблари ўқувчилари орасидан ёш истеъдод эгаларини излаб топиш ва уларни қўллаб-қувватлаш мақсадида ўтказилган мазкур фестивалининг Амударё туман босқичида 85та мактабдан жами 525 нафар ўқувчи-ёшлар иштирок этдилар.

Фестивалнинг туман босқичида 6 ёшдан 15 ёшгача бўлган ижодкор ва иқтидорли болалар иштирок этишди.

Болалар ўртасида маданият, адабиёт ва санъатни тарғиб қилишга йўналтирилган мазкур фестивал 6та йўналиш ва 6та номинация бўйича ўтказилди. “A” йўналишда ўқувчилар фортепиано, торли чолғулар, дамли ва зарбли чолғулар, “B” йўналишда эстрада чолғу ижрочилиги, халқ чолғулари, анъанавий чолғу ижрочилиги, “C” йўналишда анъанавий хонандалик, академик хонандалик, эстрада хонандалиги, фольклор ва хор жамоалари, “D” йўналишда хореография, миллий рақс, балл рақси ҳамда замонавий рақслар бўйича ўз иқтидорларини намойиш қилдилар. Иштирокчилар “E” йўналишида тасвирий санъат – графика, ранг тасвир, ҳайкалтарошлик, амалий санъат, кулолчилик, зардўзлик, қуроқчилик, гиламдўзлик, бисер тўқиш, дизайнерлик, юмшоқ ўйинчоқсозлик, наққошлик, каштачилик, ёғоч ўймакорлиги, “F” йўналишида эса наср – ҳикоя, эртак, назм йўналиши, яъни шеър, ғазал, достончилик йўналишлари бўйича ўзаро беллашдилар.

Фестивалда иштирокчи ўғил-қизлар томонидан намойиш этилган санъат намуналари ҳайъат аъзолари томонидан ҳаққоний баҳолаб борилди.

“Камалак юлдузлари” Республика болалар ижодиёти фестивалининг туман босқичида барча йўналишлар бўйича жами 18 нафар ғолиблар аниқланди ва улар фестивалнинг Қорақалпоғистон Республикаси босқичига йўлланмани қўлга киритдилар.

Ғолиблар Ўзбекистон ёшлар иттифоқи Амударё туман бўлими томонидан диплом ҳамда эсдалик совғалари билан тақдирланди.

Иқтидорнинг кашф этилиши ер бағридан отилиб чиққан булоққа ўхшайди. У юз очдими, кўнгилларга хушнудлик улашади. Инсонда ҳайрат ва ҳавас туйғусини уйғотади. Ёш иқтидорларни аниқлашда “Камалак юлдузлари” танловининг ҳам аҳамияти ниҳоятда катта.

Мамлакатимизда ёш авлодга кўрсатилаётган эътибор ва ғамхўрлик туфайли, қолаверса, ўтказилаётган турли танлов ва фестиваллар уларнинг иқтидор ва салоҳиятини тўлақонли намоён этишлари учун кенг имкониятлар эшигини очиб бермоқда, қалбларида она Ватанга муҳаббат, истиқлол ғояларига ҳурмат ва садоқат туйғуларини мустаҳкамлашга хизмат қилмоқда.

Севара Исмоилова