“IJOD ZAVQI” MAVZUSIDAGI VIDEOROLIKLAR TANLOVI GʻOLIBLARI TAQDIRLANDI

Amudaryo televideniyesi tahririyatining “Yuksak maʼnaviyatli va axloqli yoshlar — kelajak poydevori” nomli grant loyihasi doirasida yoshlarning maʼnaviyatini yuksaltirish, ularni kitobxonlikka, adabiyotga qiziqtirish va ijod qilishga undash, oʻz fikrlarini boshqalarga taʼsirchan uslublarda yetkaza olish mahoratini shakllantirish maqsadida “Ijod zavqi” videoroliklar tanlovi oʻtkazildi. Ushbu tanlov shartiga koʻra, unda ishtirok etishni istagan yoshlar oʻz ijod namunalaridan oʻqib, estetik did bilan videotasvirga olishlari, videorolik koʻrinishida tayyorlab, tahririyatga 5-noyabrdan 20-noyabrgacha boʻlgan davr mobaynida taqdim etishlari kerak edi.

Tahririyatimizning elektron manziliga tumanimiz hududidagi umumtaʼlim maktablarida taʼlim olayotgan oʻquvchilar, yosh ijodkorlar tayyorlagan biri-biridan ajoyib videoroliklar kelib tushdi. Videoroliklarda yosh ijodkorlar oʻzlari, qiziqishlari haqida maʼlumot berish bilan birga ilhomlanib yozgan Vatan, ona, tabiat haqidagi sheʼrlarini ifodali oʻqib berishgan, har tomonlama did bilan tasvirga olishga harakat qilishgan. Tanlovga taqdim etilgan yoshlarning ijod namunalari tahririyat jamoasida tashkil qilingan hakamlar hayʼati tomonidan koʻrib chiqildi.

Hayʼat qaroriga koʻra, 13-sonli maktabning 9-sinf oʻquvchisi Madina Komiljonovaga 1-oʻrin, Amudaryo tumani Ixtisoslashtirilgan maktabining 10-sinf oʻquvchisi Hilola Kamolovaga 2-oʻrin, 41-sonli maktabning 6-sinf oʻquvchisi Oksana Sharipovaga 3-oʻrin berildi. Tanlov gʻoliblariga tahririyat tomonidan Faxriy yorliq va sovgʻalar topshirildi.                    

O.Xudoyberganova.