TOʻQSONBOSTI USULIDA EKILGAN EKINLAR XALQIMIZ DASTURXONI TOʻKIN BOʻLIShIGA XIZMAT QILADI

Dehqonlarimiz uchun yilning barcha fasllari ham sinovli. Goh suv kamligidan, goh tabiat injiqliklaridan, bahor-u kuzning bemavrid yogʻin-sochinlari-yu izgʻirinlaridan aziyat chekadigan asl dehqonlar qishloq xoʻjaligidagi muammolarni omilkorlik bilan yengib oʻtishning sirlarini yaxshi bilishadi. Bu borada qilichboylik dehqonlarning tajribasi koʻplarga oʻrnak.

Keyingi yillarda Amudaryo tumanida oziq-ovqat xavfsizligini taʼminlash, aholining kundalik ehtiyojlari uchun zarur boʻlgan sabzavot mahsulotlari yetishtirishni koʻpaytirish maqsadida toʻqsonbosti usulida piyoz, sarimsoqpiyoz, sabzi va kichik sigʻimli issiqxonalarda turli oshkoʻklar yetishtirishga alohida eʼtibor qaratilmoqda. Shu maqsadda tumandagi  barcha toifa xoʻjaliklarda jami  1777 gektar maydonga toʻqsonbosti usulida sabzavot ekinlari ekildi. Shundan fermer xoʻjaliklarida 110 gektar, dehqon xoʻjaliklarida 791 gektar va aholi tomorqalarida 876 gektar maydonga piyoz va sarimsoqpiyoz ekinlari sifatli qilib ekildi.

Toʻqsonbosti usulida sabzavot ekinlarini ekish ishlariga Toshqalʼa mahallasi hududidagi fermer xoʻjaliklarida barvaqt kirishildi. Ayniqsa, hududdagi “Nurimbetov Xursandbek”, “Erkinboy Qoʻziboyevich”, “Xursandbek Xoʻjakov” fermer xoʻjaliklari dalalarida avgust oyining oxiri va sentyabr oyida ekilgan piyoz va sarimsoqpiyoz allaqachon unib chiqib, yashil maydonlar hosil qilgan. Xususan, “Xursand Nurumbetov” fermer xoʻjaligida 30 sotix piyoz, 10 sotix sarimsoqpiyoz, “Erkinboy Qoʻziboyevich” fermer xoʻjaligida 30 sotix piyoz va 10 sotix sarimsoqpiyoz, “Xursandbek Xoʻjakov” fermer xoʻjaligida esa 25 sotix piyoz va 10 sotix maydonga ekilgan sarimsoqpiyoz maysalari baravj rivojlanmoqda.

Bundan tashqari, toshqalʼaliklar  mahalla hududini  obod va koʻkalamzor goʻshaga aylantirish maqsadida tuman hokimligi va MFY tomonidan yetkazib berilgan koʻchatlarni belgilangan hududlarga oʻtqazishib, “Yashil makon” umummilliy loyihasida faol ishtirok etishmoqda.

Shuningdek, mahalla hududida istiqomat qiluvchi aholi tomorqalarida ham toʻqsonbosti usulida sabzavot mahsulotlarini yetishtirishga alohida eʼtibor qaratiladi. Ular erta bahordanoq barra piyoz, sabzi va sarimsoqpiyoz mahsulotlarini bozorga olib chiqishadi. Rahimboy ogʻa Rajabov ana shunday mohir tomorqachilardan. U oila aʼzolari bilan bahamjihat oʻz tomorqa yerida bunyod etgan issiqxonasida ertagi sabzavotlarni barvaqt yetishtirishda oʻziga xos ish tajribasiga ega tomorqa yer egalaridan.

Ayni paytda Rahimboy ogʻaning tomorqa yerida toʻqsonbosti usulida ekilgan 2 sotix  piyoz, issiqxonasida esa 2 sotix oshkoʻk, 1 sotix rediska va 2 sotix bulgʻor qalampiri koʻzni quvontiradigan darajada  rivojlanmoqda. Issiqxonaga ekilgan rediska va bulgʻor qalampirining hosili esa pishib yetilmoqda. Oshkoʻklar allaqachon bozor rastasini bezaganidan tomorqachi xursand. Toʻqsonbosti ekini piyoz va sarimsoqpiyoz maysalarini begona oʻtlardan tozalab, kuzgi oziqlantirish ishlari olib borilgani bois, baravj oʻsmoqda.

– Erta bahorda bozorga birinchi olib chiqadigan mahsulotimiz barra piyoz boʻladi, – deydi mohir tomorqachi. – Vitaminga boy, ishtaha ochuvchi koʻkpiyozning issiqxona sharoitida  yetishtirilganidan ochiq dalada, toʻqsonbosti usulida ekib, yetishtirilgani juda foydali.

Haqiqatan ham ochiq dalada yetishtirilgan toʻqsonbosti ekinlari erta bahorda barvaqt unib chiqadi va quyosh nuriga toʻyinib, tez yetiladi.

Shu kunlarda Amudaryo tumanining barcha fermer va dehqon xoʻjaliklari, tomorqa xoʻjaliklarida ekilgan toʻqsonbosti ekinlarini kuzgi sugʻorish, oziqlantirish ishlari nihoyasiga yetkazilgan va ekinlar yam-yashil maysalar hosil qilgan. Bu esa xalqimiz dasturxonini erta bahordanoq ertagi sabzavotlar bilan toʻldirish imkonini beradi.

Robiya YOʻLDOShEVA.