SAYYoR SUDDA BELGILANMAGAN YeR MAYDONIDA NOQONUNIY BINO QURGAN FUQAROGA JAZO TAYINLANDI

Doʻstlik mahallasida Jinoyat ishlari boʻyicha tuman sudi tomonidan sayyor sud majlisi oʻtkazildi. Ushbu sayyor sud majlisida yer uchastkalarini oʻzboshimchalik bilan egallab olish jinoyatini sodir qilgan fuqaroga nisbatan qoʻzgʻatilgan ish koʻrib chiqildi.

Sud majlisi davomida jinoyat sodir qilganlikda ayblangan fuqaro X.M. (ism oʻzgartirilgan) 2022-yil dekabr oyida tumanimiz hududida joylashgan, oʻziga tegishli boʻlgan koʻp tarmoqli fermer xoʻjaligiga davlat tomonidan foydalanish uchun ijaraga berilgan sugʻoriladigan ekin maydonining tegishli konturidagi sugʻoriladigan yer maydonini oʻzboshimchalik bilan egallab olgani, mazkur yer maydonida noqonuniy qurilish ishlarini amalga oshirib, chorvachilik bilan shugʻullanish uchun 178 kv/metr kenglikda molxona va yem saqlash uchun omborxona binosini qurgani maʼlum boʻldi.

Ishni koʻrib chiqish mobaynida toʻplangan dalillar va boshqa tegishli hujjatlar oʻrganildi, himoyachi va taraflarning soʻzlari tinglandi. Shundan kelib chiqib, fuqaro X.M.ga Oʻzbekiston Respublikasi JKning 229-1-moddasining 2-qismida koʻrsatilgan jinoyatni sodir etganlikda aybdor deb topildi va unga 2-yil ozodlikni cheklash jazosi tayinlandi. Shuningdek, sudlanuvchidan yetkazilgan 7671755 soʻm zarar miqdorining  7288167 soʻm 25 tiyini Respublika byudjetiga,  383587 soʻm 75 tiyini Qishloq xoʻjaligi vazirligi huzuridagi Qishloq xoʻjaligini rivojlantirish va oziq-ovqat taʼminoti jamgʻarmasiga undirildi.

Tayinlangan jazo X.M.ning yashash joyida oʻtashi belgilandi va soat 21:00 dan ertalabki soat 06:00 ga qadar boshqa hududga chiqishi taqiqlandi. Shuningdek, jazo ustidan nazorat qiluvchi organ ruxsatisiz yashash joyini oʻzgartirmaslik va Amudaryo tumani hududidan ruxsatsiz chiqmaslik majburiyatlari yuklatildi.

Asqar Safarov, Jinoyat ishlari boʻyicha Amudaryo tuman sudi raisi.