30-SONLI MAKTABDA “HILPIRAYVER, BAYROGʻIM!” NOMLI ADABIY-MUSIQIY TADBIR OʻTKAZILDI

Bayroq har bir davlatning muqaddas ramzlaridan biri, xalqning gʻurur va iftixoridir. Shu bois, 18-noyabr – davlatimiz bayrogʻi qabul qilingan kun yurtimizning barcha goʻshalarida keng nishonlanadi.

Ushbu sana munosabati bilan Amudaryo tumanidagi 30-sonli maktabda ham “Hilpirayver, bayrogʻim!” mavzusida tadbir oʻtkazildi. Mazkur tadbirdan oldin maktabning ona tili va adabiyot fani oʻqituvchisi Umida Rahimboyeva 8-“v” sinfning maʼnaviyat soatida davlat ramzimiz boʻlmish bayrogʻimiz haqida davra suhbati oʻtkazib, oʻquvchilar bilan davlat ramzlari haqidagi tushunchalarini rivojlantiruvchi fikr almashuvlar tashkil etdi. Nazariy maʼlumotlar asosida ushbu tushunchalarni toʻliqtirdi. Shuningdek, oʻquvchilarni qiziqtirgan savollarga ham javob berib, bayrogʻimizni ulugʻlovchi taqdimotni namoyish etdi.

Shundan soʻng, oʻquvchilar davlatimizning muqaddas ramzlari bilan bezatilgan maktab sahnasida oʻz iqtidorlarini namoyon etishdi. Xususan, Oʻzbekiston bayrogʻi qabul qilingan sana, oʻzbek davlatchiligi tarixi, olis oʻtmishda xalqparvar, vatanparvar ajdodlarimiz davlat bayrogʻini qanday asraganlari, bayroqning xalqni buyuk marralar sari ruhlantirishdagi beqiyos katta ahamiyati haqida maʼruzalar qilishdi. Chunonchi, ulugʻ janhongashta bobomiz Amir Temur davlatchiligi davridagi bayroq, undan oldin Jaloliddin Manguberdi bobomizni boshi uzra baland koʻtarib oʻz ona yurtini himoya qilishga undagan davlat bayroqlarining tarixiy ahamiyati xususida oʻzaro fikr almashdilar.

Tadbirda oʻquvchilar vatanparvarlik ruhidagi, shuningdek, bayrogʻimizni madh etuvchi sheʼrlardan namunalar aytishdi, milliy musiqalarga raqslar ijro etishdi.

Bundan tashqari, tadbir davomida “Bilimdonlik bahsi” ham oʻtkazilib, bunda bayroq boʻlakchalaridan yaxlit rasm hosil qilish, berilgan bayroq rasmlari qaysi davlatga tegishli ekanligi haqidagi oʻquvchilarning bilimlari sinovdan oʻtkazildi. Bellashuvda oʻquvchilar oʻzlarining bilimlarini sinash bilan birgalikda jamoa boʻlib harakat qilish, oʻzaro doʻstona munosabat tuygʻularini ham rivojlantirdilar.

Bu kabi tadbirlar orqali oʻquvchilarga davlat ramzlari haqida kengroq tushuncha berish, bu ramzlarga nisbatan hurmat tuygʻusini oshirish asosiy maqsad qilib qoʻyilgan.

Chunki davlat bayrogʻiga nisbatan hurmat – ona Vatanga, xalqimizga hurmat va ehtirom namunasidir. Buni sportda, ilm-fan, adabiyot va sanʼat yoʻnalishlari boʻyicha xalqaro musobaqalarda ishtirok etib, yuqori natijalarga erishgan yoshlarimiz boshi uzra davlatimiz bayrogʻi koʻtarilgan lahzalarda chuqur his etamiz va qalblarimiz gʻurur va iftixorga toʻladi. Albatta, xalqaro maydonda davlatimiz ramzi – bayrogʻimizning hilpirashi jonajon Oʻzbekistonimizga nisbatan xayrixohlik va hurmat-eʼtiborning oshib borayotganidan dalolatdir.

Tadbir yakunida oʻquvchi-yoshlar Oʻzbekiston bayrogʻini boshlari uzra baland koʻtarib, mustaqil Vatanimizga sodiq farzandlar boʻlishga, ona Vatanimizning yanada gullab-yashnashi uchun xizmat qilishga qodir insonlar boʻlib voyaga yetishga soʻz berdilar. Tadbir barchaga zavq-shavq, gʻurur bagʻishladi.

Ravshan Bahromov.