“USTOZ – TAʼLIM BUNYoDKORI” ShIORI OSTIDA OʻQITUVChILAR QURULTOYI BOʻLIB OʻTDI

Tumandagi taʼlim tizimi xodimlari ishtirokida “Ustoz – taʼlim bunyodkori” shiori ostida taʼlim sohasidagi islohotlarni birgalikda amalga oshirish, oʻqituvchilarni yagona kuchga aylantirish, mavjud muammolarni muhokama qilish va ularning yechimini topishga bagʻishlangan Oʻqituvchilar qurultoyi boʻlib oʻtdi.

7-noyabr kuni 76-sonli umumtaʼlim maktabida boʻlib oʻtgan ushbu tadbirda Qoraqalpogʻiston Respublikasi Maktabgacha va maktab taʼlimi vazirligining metodik xizmat koʻrsatish boʻlimi metodisti Oʻtkir Matmuradov hamda tumandagi Maktab va maktabgacha taʼlim boʻlimi masʼullari, umumtaʼlim maktablari oʻqituvchilari qatnashdilar.

Qurultoy toʻrt yoʻnalish boʻyicha – boshlangʻich taʼlim, aniq, tabiiy, ona tili va adabiyot fanlari yoʻnalishlarida seminar-trening, davra suhbatlari tarzida oʻtkazildi. Seminar-treninglar davomida trener-oʻqituvchilar oʻquv mashgʻulotlarini tashkil qilib, oʻqituvchilarga metodik tushunchalar berdilar. Shu bilan birga oʻqiutvchilarning darsda zamonaviy texnologiyalar va uslublardan samarali foydalanish boʻyicha fikr-mulohazalarini tinglab, mavjud muammolarni muhokama qildilar.

Taʼkidlash joizki, Maktabgacha va maktab taʼlimi vazirligi tomonidan taʼlim islohotlarini birgalikda amalga oshirish, oʻqituvchilarni yagona kuchga aylantirish, mavjud muammolarni muhokama qilish va ularning yechimi boʻyicha aniq takliflar ishlab chiqish maqsadida kuzgi taʼtil davrida oʻqituvchilar ishtirokida oʻquv seminarlar va uchrashuvlar tashkil etilishi belgilangan edi. Shunga koʻra yurtimizning barcha hududlarida Oʻqituvchilar qurultoyi tashkil etilib, boshlangʻich taʼlim, aniq va tabiiy, ona tili va adabiyot fanlaridan treninglar, ochiq muloqotlar boʻlib oʻtdi, har bir yoʻnalish boʻyicha 341 nafardan jami 1 364 nafar trener-oʻqituvchilar qatnashishdi.

Respublika boʻyicha boʻlib oʻtgan seminar-treninglar hamda ochiq muloqotlarda ushbu trener-oʻqituvchilar tomonidan fan oʻqituvchilariga oʻz fanlaridan yangi metodlarni qoʻllash boʻyicha tushunchalar berildi. Seminar-treninglar davomida pedagoglar oʻquvchilarni fanlarga qiziqtirish yoʻllari, loyihaga asoslangan taʼlimning mohiyati, oʻqish savodxonligi va fanlar doirasida 4K modelini qoʻllash, XXI asrda sifatli oʻqitishning asosiy tamoyillari yuzasidan muhim maʼlumotlarga ega boʻldilar. Shuningdek, davra suhbatlari oʻtkazilib, mavjud muammolar va ularni yechimi boʻyicha fikr-mulohazalar oʻrtaga tashlandi.

 Amudaryo tumanida boʻlib oʻtgan Oʻqituvchilar qurultoyida ham umumtaʼlim maktablarining boshlangʻich taʼlim, aniq fanlar, tabiiy fanlar, ona tili va adabiyoti yoʻnalishi metodbirlashma rahbarlari va fan oʻqituvchilari kerakli maʼlumotlarga ega boʻldilar.

Qoraqalpogʻiston Respublikasi Maktabgacha va maktab taʼlimi vazirligining metodik xizmat koʻrsatish boʻlimi metodisti Oʻtkir Matmuradov hamda tumandagi Maktab va maktabgacha taʼlim boʻlimining boshlangʻich taʼlim, aniq fanlar, tabiiy fanlar, ona tili va adabiyoti yoʻnalishi metodistlari koʻrgazmali tarzda oʻquv mashgʻulotlarini oʻtkazishdi. Mashgʻulotlardan soʻng, ochiq muloqot oʻtkazilib, mavjud muammolar muhokama qilindi va ularning yechimi boʻyicha aniq takliflar ishlab chiqildi.

Qurultoyga tashrif buyurgan tumnadagi umumtaʼlim maktablarining mazkur yoʻnalishlar boʻyicha metodbirlashma rahbarlari va fan oʻqituvchilari kerakli maʼlumotlarga ega boʻldilar. Bu kabi treninglar oʻqituvchilar malakasini oshirishda muhim ahamiyat kasb etadi.

O.Xudoyberganova.