ILMIY-AMALIY OʻQUV SEMINARIDA QORAQALPOQ TILI VA ADABIYoTI HAMDA GEOGRAFIYa FANLARI OʻQITUVChILARI MAHORATIGA BAHO BERILDI

Mamlakatimizda umumtaʼlim fanlarini oʻqitishni zamon talablari darajasida rivojlantirish, fan oʻqituvchilarining taʼlim-tarbiya sohasida erishayotgan yutuqlarini ragʻbatlantirish maqsadida soha vazirligi tomonidan tashkillashtirilayotgan ilmiy-amaliy va oʻquv seminarlari muhim ahamiyat kasb etmoqda. Oʻtkazilayotgan bu kabi tadbirlar orqali umumtaʼlim fanlari oʻqituvchilarining bilim va malakalari oshishiga ijobiy taʼsir oʻtkazib, iqtidorli oʻqituvchilar tomonidan taklif etilayotgan dars ishlanmalari, uslubiy qoʻllanmalar sohaga muvaffaqiyatli tatbiq etilmoqda.

Joriy yilning 31-oktyabr sanasida Amudaryo tumanidagi 1-sonli umumtaʼlim maktabida boʻlib oʻtgan “Ogʻzaki nutq koʻnikmalarini muvofiqlashtirish usullari: bilish, qoʻllanish, fikrlash” mavzusidagi Respublika ilmiy-amaliy oʻquv seminarida ham ishtirokchilar qoraqalpoq tilida dars oʻtish, oʻquvchilarda ushbu fanga nisbatan bilim va koʻnikmalarni rivojlantirish orqali ularning qoraqalpoq tili boyligini yuksaltirish borasidagi ilgʻor metodik tajribalar bilan yaqindan tanishdilar.

Qoraqalpogʻiston Respublikasi Maktabgacha va maktab taʼlimi Vazirligi hamda vazirlikning Amudaryo tuman boʻlimi hamkorligida tashkillashtirilgan mazkur ilmiy-amaliy oʻquv seminaridagi asosiy mavzu – “Ogʻzaki nutq koʻnikmalarini muvofiqlashtirish usullari: bilish koʻllanish va fikrlash” mavzusida Respublika taʼlim Markazi uslubchisi Zulfiya Ismoilova maʼruza qildi. U oʻz maʼruzasida oʻquvchining ogʻzaki nutqini zamonaviy innovatsion pedtexnologiyalarni qoʻllash, xususan qoraqalpoq tilida suhbatlashish, qiziqarli dialoglar, qoraqalpoq xalq maqol va matallari orqali rivojlantirish, oʻquvchining fikrlash qobiliyatini sinovdan oʻtkazish usulidan foydalanish vositasida badiiy til bilan qoraqalpoq ogʻzaki til (sheva)ning oʻziga xos xususiyatlarini bir-biriga muvofiqlashtirgan holda mashgʻulotlar olib borish toʻgʻrisida batafsil tushunchalar berdi.

Shundan soʻng, ilmiy-amaliy oʻquv seminari ishtirokchisi, Amudaryo tuman Maktabgacha va maktab taʼlimi boʻlimi tasarrufidagi 1-sonli maktabning oliy toifali qoraqalpoq tili va adabiyot fani oʻqituvchisi Aptabida Abdumuratova 8-A sinf oʻquvchilariga “Ustozlik qilgan zoriqmas” mavzusida samimiy suhbat tarzidagi ochiq dars oʻtkazdi. Ochiq dars jarayonida Oʻzbekiston Qahramoni, Oʻzbekiston va Qoraqalpogʻiston xalq shoiri Ibroyim Yusupovning “Oʻrtoq muallim” poemasi asosida oʻquvchilar bilan dildan suhbatlashdi va xalq shoirining oʻz asarida soʻz qoʻllash sanʼati, uning inson maʼnaviyatini yuksaltirishdagi katta ahamiyati yuzasidan oʻquvchilarning oʻzaro fikr almashishlari uchun sharoit yaratdi.

Ilmiy-amaliy oʻquv seminari davomida 40-sonli umumtaʼlim maktabining qoraqalpoq tili va adabiyot fani oʻqituvchisi Zamira Xudoyberganova 5-sinfda qoraqalpoq tilidan “Boʻgʻin va boʻgʻin koʻchirish” mavzusida ochiq dars oʻtkazdi. U oʻz darsida qoraqalpoq tili darslarida boʻgʻin koʻchirish borasida oʻquvchilar tomonidan yoʻl qoʻyiladigan imlo xatolarga barham berish yuzasidan qimmatli fikrlar bildirdi.

Seminar ishtirokchilari oʻtkazilgan har ikkala ochiq darsni ham yuqori baholadilar. Shu bilan birga mazkur ochiq darslar orqali qoraqalpoq tili va adabiyot fanini oʻqitish boʻyicha katta tajribaga ega Aptabida Abdumuratova hamda 40-sonli maktabning qoraqalpoq tili va adabiyot fani oʻqituvchisi Zamira Xudoyberganovalar tomonidan ochiq dars jarayonida ilgari surilgan innovatsion gʻoyalar muhim ahamiyatga ega ekanligini taʼkidladilar.

Ilmiy-amaliy oʻquv seminari ishtirokchilari oʻtilgan ochiq darslar yuzasidan oʻzlarini qiziqtirgan savollar bilan murojaat qildilar. Barcha savollarga masʼullar va tajribali oʻqituvchilar tomonidan javoblar taqdim etildi.

Seminar yakunida Aptabida Abdumuratova va Zamira Xudoyberganova Qoraqalpogʻiston Respublikasi Maktabgacha va maktab taʼlimi Vazirligining faxriy yorliqlari bilan taqdirlandilar.

Shu kuni Amudaryo tumanidagi 40-sonli umumtaʼlim maktabida ham “Geografiya darslarida yangi uslublardan hamda xaritalar (atlas va kontur)dan foydalanib dars oʻtish usuli va amaliy masalalar bilan ishlashish” mavzusida Respublika ilmiy-amaliy seminari oʻquv seminari oʻtkazilib unda Qoraqalpogʻiston taʼlim Markazi uslubchisi Rita Qalilayeva, mazkur Markazning uslubiy xizmat koʻrsatish boʻlimi uslubchisi Jamolatdin Oʻtepbergenovlar oʻtkazilayotgan ilmiy-amaliy oʻquv seminarining ahamiyati va undan kutilayotgan natijalar yuzasidan batafsil maʼlumot va tushunchalar berdilar.

Seminar davomida maktabning geografiya fani oʻqituvchisi Zokir Rahimov hamda 47-sonli maktabning geografiya fani oʻqituvchisi Gulbanu Almambetovalar tomonidan namunali ochiq darslar oʻtkazildi.

Ilmiy-amaliy oʻquv seminari yakunida oʻtkazilgan har ikkala ochiq dars ishtirokchilar tomonidan tahlil etilib, oʻqituvchilarning bilim va mahoratlariga dars oʻtishdagi oʻziga xos uslublariga yuqori baho berildi. Amudaryo tuman maktabgacha va maktab taʼlimi boʻlimining maktablar faoliyatini muvofiqlashtirish boʻlimi uslubchisi Rayhon Yakubova boʻlib oʻtgan ilmiy-amaliy oʻquv seminari taʼlim sifatini oshirishga ijobiy taʼsir qiluvchi omil boʻlganini alohida taʼkidladi.

Robiya YOʻLDOShEVA.