TARAQQIYoT ASOSI BOʻLGAN TINChLIKNI ASRAB-AVAYLASh – MASʼULIYaTLI VAZIFA

Tinch va osoyishta hayotning eng muhim jihatlaridan biri – bu har bir mahallani jinoyatchilikdan holi hududga aylantirish, aholi oʻrtasida jinoyatchilikka murosasiz munosabatni shakllantirish va jinoyatchilikni keskin kamaytirishdir. Ushbu maqsadni roʻyobga chiqarish maqsadida Amudaryo tumani Ichki ishlar boʻlimi xodimlari tomonidan 2023-yil davomida tuman hokimligi, sektor rahbarlari va jamoatchilik vakillari bilan hamkorlikda jinoyatchilik va huquqbuzarliklarning barvaqt oldini olish borasida bir qator ijobiy ishlar amalga oshirildi.

Bu borada oʻtkazilib kelinayotgan “Xavfsiz hudud”, “Turmush”, “Nazorat”, “Toʻr”, “Tun”, “Davomat” va “Qoradori” kabi bir qancha tadbirlar davomida jinoyatchilik va huquqbuzarliklarning oldini olishga erishildi. Mazkur tadbirlar natijasida tuman hududida joriy yilning 9 oyi davomida jinoyatchilik holati oʻtgan yilga nisbatan 190tadan 184taga, yaʼni 3,16 foizga, jinoyat-qidiruv yoʻnalishidagi jinoyatlar esa 132tadan 126taga, yaʼni 4,55 foizga kamaydi. Shuningdek, jinoyat turlaridan qotillik jinoyati 100 foizga, oʻgʻirlik jinoyati 31tadan 17taga, yaʼni 45,2 foizga, bezorilik jinoyati 6tadan 2taga, yaʼni 66,7 foizga, odam oʻlimi bilan bogʻliq yoʻl-transport hodisalari 11tadan 5taga, yaʼni 54,5 foizga kamaydi.

Tezkor tadbirlar natijasida 9ta giyohvandlik vositasi va psixotrop moddalarning noqonuniy aylanmasi bilan bogʻliq holatlar aniqlanib, jami 209 gramm opiy va geroin giyohvandlik vositalari ashyoviy dalil sifatida olindi, 13ta fosh etilmagan jinoyatlar fosh etildi, 11 nafar qidiruvdagi shaxslar ushlandi.

Huquqbuzarliklar profilaktikasi yoʻnalishida amalga oshirilgan ishlar natijasiga eʼtibor qaratsak, tumandagi profilaktika inspektorlari tomonidan joriy yilning oʻtgan 9 oyi mobaynida jami 1198 nafar shaxslar turli xildagi huquqbuzarliklarni sodir etganligi uchun profilaktik hisobga olinib, 626 nafari belgilangan tartibda hisobdan chiqarilgan va 1207tasi Ichki ishlar boʻlimining profilaktik hisobida qolgan. Shuningdek, tumandagi muqaddam sudlangan 39 nafar shaxslarning barchasi sud qaroriga asosan nazoratga olingan boʻlsa, shundan 13 nafari maʼmuriy nazorat qoidasini buzganligi uchun Maʼmuriy javobgarlik toʻgʻrisidagi Kodeksning 206-moddasi tartibida, 1 nafari esa Jinoyat Kodeksining 226-moddasi tartibida javobgarlikka tortildi.

Bundan tashqari, tumanda spirtli ichimlikka ruju qoʻygan 173 nafar shaxslarning 76 nafarini sogʻlom hayotga qaytarishga koʻmaklashish maqsadida mazkur shaxslar davolanish muassasalariga yotqizildi. Shuningdek, oʻtgan 9 oy davomida profilaktika inspektorlari tomonidan huquqbuzarlik sodir etgan shaxslarga nisbatan jami 4846ta maʼmuriy bayonnomalar rasmiylashtirilgan boʻlsa, shundan 136 nafariga maʼmuriy qamoq jazosi qoʻllanilgan.

Shu oʻrinda aytish joizki, keyingi yillarda ichki ishlar tizimini isloh qilishga ustuvor eʼtibor qaratilmoqda. Bu borada barcha hududlarimizda xavfsiz sharoit yaratish, tinchlik va osoyishtalikka qarshi tahdidlarga toʻliq barham berish maqsadida ishlab chiqilgan Oʻzbekiston Respublikasining Jamoat xavfsizligi kontseptsiyasi hamda 2022-2025-yillarda jamoat xavfsizligini taʼminlash tizimini rivojlantirish strategiyasi izchil amalga oshirilmoqda.

Yurtimizda aholining osoyishta umr kechirishi yoʻlida jamiyatda qonun ustuvorligini, jamoat xavfsizligini taʼminlash tizimida keng koʻlamli islohotlar amalga oshirilmoqda. Zero, yurt taraqqiyoti va barqaror rivojlanishimizning asosi boʻlgan tinchlikni asrab-avaylash ichki ishlar organlari xodimlarining zimmasidagi sharafli burch va masʼuliyatli vazifa sanaladi.

Biz – soha xodimlari elimizda tinchlik-osoyishtalik barqarorligi, jamiyatimizda qonun ustuvorligini taʼminlashga barcha kuch va imkoniyatlarimizni safarbar etamiz.

Fursatdan foydalanib, Vatanimiz va xalqimizga sadoqat bilan xizmat qilib kelayotgan ichki ishlar organlari xodimlari, barcha hamkasblarimni 25-oktyabr – Oʻzbekiston Respublikasi ichki ishlar organlari xodimlari kuni bilan tabriklayman. Oʻz xizmat vazifalariga sidqidildan yondashib, jinoyatchilikka qarshi kurashish va uning oldini olish, jamoat tartibini saqlashda fidoyilik koʻrsatib kelayotgan osoyishtalik himoyachilariga eng avvalo mustahkam sogʻlik, oilalariga fayzu-baraka, sharafli ishlarida ulkan yutuq va muvaffaqiyatlar tilab qolaman.

Jamoladdin Yusupov, Amudaryo tumani Ichki ishlar boʻlimi boshligʻi.