OBODLIK KOʻNGILDAN BOShLANADI

Qilichboy zamini Amudaryo tumanining mehnatkash, mirishkor dehqon-u oqil farzandlari bilan taniqli goʻshasi. Bugungi kunda mamlakatimizda barcha jabhalardagi amalga oshirilayotgan islohotlar, yangilanishlar, oʻzgarishlar ushbu hudud aholisi hayotida ham yaqqol namoyon boʻlmoqda. Inson qadrini yuksaltirish, uning turmush sifatini oshirish orqali hayotdan rozi boʻlib yashashiga erishish borasida keng koʻlamli ishlar amalga oshirilmoqda.

Qilichboy ovuli hududi 1464 gektarni tashkil etadi. Tarkibidagi 82ta koʻchadagi 8ta koʻpqavatli uylarda, 1089ta yakka tartibdagi hovlilarda 1549ta oila istiqomat qiladi. Ulardagi oʻzbek, qoraqalpoq, qozoq, rus tatar, qirgʻiz va boshqa millatga mansub 5689 nafar aholi hamjihatlikda, biri birining urf-odatlari, anʼanalari va qadriyatlarini hurmat qilgan holda quda-anda, qarindosh boʻlib yashab kelishayapti.

Jami aholining 270 nafari turli korxona va tashkilotlarda mehnat qiladi, 42 nafari tadbirkorlik, 2 nafari savdo-sotiq bilan, 37 nafari chorvachilik, parrandachilik, asalarichilik bilan, 73 nafari tadbirkorlikning boshqa turlari bilan shugʻullanishadi. Shuningdek, ovul aholisining 12 nafari oʻzini oʻzi band qilgan, 247 nafari mavsumiy ishlarda ishlaydi. Intiluvchan, ilmga chanqoq 110 nafar yoshlar yurtimizdagi turli oliygohlarda taʼlim olishadi.

Ovul aholisi mamlakatimizda amalga oshirilayotgan barcha sohalardagi islohotlarda, aholi turmush farovonligini oshirish borasidagi saʼy-harakatlarda faol ishtirok etishib, kelgusi hayoti yanada yorqin va farovon boʻlishiga intilmoqdalar.

Yaqinda “Mahalla” xayriya jamoat fondi Amudaryo tuman boʻlinmasining “Obod mahallam” nomli davlat granti loyihasi ish rejasiga muvofiq loyiha hamkorlari – Ekologik partiya tuman Kengashi va Amudaryo televideniyesi tahririyati hamkorligida mazkur ovulda oʻrganish ishlari olib borildi. Oʻrganishlar davomida aholi oʻrtasida sogʻlom turmush tarzini targʻib qilish, aholining tibbiy va ekologik madaniyatini oshirish, hududda obodlik va farovonlikni taʼminlash, fuqarolar yigʻini tomonidan atrof-muhitni muhofaza qilish, hududning sanitariya holatini yaxshilash borasida amalga oshirilayotgan ishlar koʻzdan kechirildi.

Shuni eʼtirof etish kerakki, obodlik, farovonlikka intilish avvalo ovul aholisining ustuvor maqsadiga aylangan. Koʻchalar boʻylari obodonlashtirilib, koʻklamzorlashtirilgan, turli daraxtlar, gullar atrofga fayz berib turibdi.

“Obodlik koʻngildan boshlanadi” deganlariday, har bir xonadon atrofidagi yashillik, tomorqadan unumli foydalanish, qoʻshimcha daromad topish borasidagi saʼy-harakatlar natijasi koʻrgan koʻzni quvontiradi.

Ovuldagi Ikkinchi jahon urushida halok boʻlgan qilichboylik jangchilar xotirasiga oʻrnatilgan yodgorlik yosh avlodga otalar jasoratidan saboq beradi.

Baxtiyor Matkarimov bunyod etgan bogʻ, sunʼiy qoplamali kichik futbol maydonchasi, fitnes klub chekka hududlarda ham tadbirkorlik faoliyati keng rivojlanayotganini koʻrsatib turibdi.

Bahrom Qodirov, Qoʻchqor Qoʻshimmatov xonadonlaridagi obodlik, yashillik, Qilichboy madaniyat markazi atrofidagi xushmanzara gulzorlar, 22-sonli, 27-sonli maktabgacha taʼlim tashkilotlari, 7-sonli oilaviy poliklinika 15-sonli maktab fasadlari obodligi, yashilligi davlatimizning yashil hududlarni koʻpaytirishga oid siyosatining ijrosini koʻz-koʻz qilib turganday.

Yashil daraxtlar – tirikligimiz manbai. Shunday ekan, chor-atrofni koʻkalamzorlashtirish hududimizda ekologik holatni yaxshilashga munosib hissa boʻlib qoʻshilishini unutmasligimiz darkor.

Ichki koʻchalarni taʼmirlash, tosh-shagʻal yotqizish, qishloq aholisi uchun munosib turmush sharoitlari yaratish borasida tumanimizda olib borilayotgan ishlar tufayli ovulning Chigʻatoy, Avesto, Bahouddin Naqshband, Baraka, Toza yop koʻchalariga tosh yotqizilmoqda.

Xalqimizning asrlar osha yashab kelayotgan, maʼnaviy boyligimizga aylangan shunday hunarlari borki, ular bugungi kunda ham yuksak qadrlanib, davom ettirib kelinayapti. Quroq va kashta tikish hunarlari shular jumlasidandir. Qilichboylik onaxonlarning bu hunarlarni asrab-avaylab davom ettirib kelayotganliklari, yoshlarga oʻrgatib, yosh qizlarning hunarli boʻlishiga gʻamxoʻrlik qilayotganlari tahsinga sazovor.

Loyiha ijodkorlari shu kuni ovulning obroʻ-eʼtiborli ayollaridan biri Sanamjon Najmiddinova xonadonida boʻlishib, chevarlik bilan koʻrpa tikayotgan bir guruh ayollar mehnatini ham kuzatishdi.

Bir umr aholining tinch-totuv, osoyishta yashashlarini taʼminlash yoʻlida ovul fuqarolar yigʻinida samarali mehnat qilib kelayotgan Amina opa Yusupova boshchiligida Gavhar Qilicheva, Muqaddas Ollaberganova, Turgʻunoy Otaqoʻziyeva, Gulshahar Oʻrozmatova, Jumagul Tilavovalar koʻrpa tikish jarayonida laparlar, oʻlanlar aytishib, xalq ogʻzaki ijodidan yaxshi xabardor ekanliklarini ham namoyish etdilar. Birgalikda joʻrovoz boʻlib lapar aytayotgan onaxonlarning yuzlaridagi joʻshqinlikda ertagi kunga yuksak ishonch aks etadi.

“Obod mahallam” loyihasi doirasida ovulda kelgusida “Yashil makon” umummilliy dasturiga muvofiq 10 sotix yerda “Mahalla bogʻi” bunyod etish koʻzda tutilgan. Bu Qilichboy ovuli koʻrkiga koʻrk boʻlib qoʻshiladi, albatta.

Shu kuni loyiha ijrochilari atrof-muhitni muhofaza qilish, tabiiy resurslardan oqilona foydalanish sohasidagi qonun hujjatlarini aholiga keng targʻib etishdi, aholini, ayniqsa yoshlarning tabiatga ehtiyotkorona munosabatda boʻlishga daʼvat qildilar, ularning ekologiyaga oid bilimlari oshirildi, ovul fuqarolar yigʻini masʼullarining hududning sanitariya holatini yaxshilash, obodonlashtirish va koʻkalamzorlashtirish ishlarini namunali tashkil etish yuzasidan masʼuliyati yanada oshdi.

Loyiha doirasida tumanning boshqa hududlarida ham shunday tadbirlar oʻtkazish rejalashtirilgan.

Oygul RAJABOVA