“Ahmedov Rajabboy” fermer xoʻjaligida paxta yigʻim-terimi avjida

Ayni kunlarda barcha joylarda boʻlgani kabi Amudaryo tumanidagi paxta dalalarida ham yil-oʻn ikki oy fidoyilik bilan qilingan mehnatlar evaziga bunyodga kelagn paxta hosilini yigʻib-terib olish uchun harakat qilayotgan fermer xoʻjaliklari xirmoni kun sayin yuksalmoqda.

Amudaryolik paxtakorlar kuzning quyoshli kunlarini gʻanimat bilib, dalalarda oppoq boʻlib ochilib turgan hosilni tezroq yigʻib-terib olish maqsadida tinimsiz mehnat qilmoqdalar. Uyushmagan ishsiz aholi ham paxta yigʻim-terimi mavsumida mehnat qilishib, yaxshigina daromad olishmoqda.

“Ahmedov Rajabboy” fermer xoʻjaligi aʼzolari ham mavsumni uyushqoqlik bilan oʻtkazmoqdalar. Fermer xoʻjaligi ayni kunlarda paxta topshirish boʻyicha yillik kontraktatsiya shartnomasi shartlarini bajarish arafasida turibdi.

Mazkur fermer xoʻjaligining 81 gektar maydoniga erta bahorda chigit ekilgan edi. Mazkur maydonlarda bir tekis unib chiqqan nihollar sifatli parvarish qilinib, moʻl hosil bunyodga kelishiga erishildi.

Shu kungacha xoʻjalik dalalaridan 180 nafar pudratchilari koʻmagida 250 tonna paxta terib olindi. Mazkur fermer xoʻjaligi masʼuliyati cheklangan jamiyat shaklidagi “Amudaryotex” xorijiy korxonasi paxta-toʻqimachilik klasteri bilan jami 275 tonna paxta topshirish boʻyicha kontraktatsiya shartnomasini tuzgan. Ushbu shartnomaga muvofiq shu kungacha 250 tonnaga yaqin paxta xom ashyosi yetkazib berildi. Terim shu surʼatda davom etsa, shartnoma shartlari yaqin kunlarda ado etiladi. Shu sababli ayni kunlarda fermer xoʻjaligi dalalarida paxta yigʻim-terimi ishlari qizgʻin davom etmoqda.

Kuz ­– dehqonlarning yil boʻyi qilgan mehnatlari sarhisobini qiladigan fasl hisoblanadi. Bu davrda yetishtirilgan hosil yigʻishtirib olinib, kelgusi yil dehqonchiligiga tayyorgarlik koʻriladi. Fermer-dehqonlarning yil boʻyi qilgan mehnati bugun oʻz samarasini bermoqda. Ularning mashaqqatli mehnati evaziga yetishtirilgan paxtani terimchilar yogʻin-sochinli kunlarga qoldirmasdan terib olish hamda oilalariga qoʻshimcha daromad keltirishga astoydil harakat qilishmoqda. Kuniga 80-100 kilogrammgacha paxta terib, tumanimiz paxta xirmoni yuksalishiga oʻz hissalarini qoʻshayotgan terimchilar talaygina. Maʼlumot oʻrnida aytish kerakki, joriy yilda amudaryolik paxtakorlar oʻz oldilariga ulkan marralarni qoʻygan. Masʼuliyati cheklangan jamiyat shaklidagi “Amudaryotex” xorijiy korxonasi paxta-toʻqimachilik klasteri bilan 348ta paxtachilik fermer xoʻjaliklari oʻrtasida shartnomalar tuzilib, jami 13 ming 900 gektar maydonga tumanimiz iqlim sharoitiga mos serhosil paxta navlari ekilgan edi.

Gʻoʻza tarbiyasi bilan bogʻliq barcha ishlar agrotexnika qoidalariga muvofiq tashkil etilgani, yetishtirilgan hosilni qisqa muddatlarda yigʻib-terib olish boʻyicha terim otryadlari tashkil qilinib, ularga yordamchi-terimchilar biriktirilgani amudaryoliklarning mehnat zafariga zamin yaratmoqda.

Yurtimizda paxta xirmonining yuksalishiga hissa qoʻshish oilaga foyda, roʻzgʻorga baraka keltiradigan daromad manbaiga aylanib bormoqda. Paxta yigʻim-terimida faol ishtirok etib, mablagʻ topib, roʻzgʻoriga baraka kiritayotgan terimchilar buni oʻz hayotlarida yaqqol his etishmoqda.

Terimchi, ishchi va hasharchilarga har kuni tushlik mahali issiq ovqat, choy beriladi. Terim pullarining oʻz vaqtida berib borilayotgani, ilgʻor terimchilarga ragʻbat sifatida taqdim etilayotgan turli sovgʻalar ularning gʻayratiga gʻayrat qoʻshmoqda.  

Sevara ISMOILOVA