SEMINARDA BOTULIZM KASALLIGINING OLDINI OLIShGA DOIR MAʼLUMOTLAR BERILDI

Botulizm ovqatdan zaharlanishning ogʻir turi hisoblanadi. Juda ogʻir kechadigan ushbu kasallikning oldini olish boʻyicha aholi oʻrtasida tushuntirish-targʻibot ishlari muntazam ravishda oʻtkaziladi.

29-sentyabr kuni tumandagi 38-sonli maktabda “Kuz-qish mavsumida yuzaga kelishi mumkin boʻlgan favqulodda vaziyatlar, tarqalishi mumkin boʻlgan kasalliklar va ularning oldini olish” mavzusida seminar tashkil etildi. Ushbu seminarda Qoraqalpogʻiston Respublikasi Favqulodda vaziyatlar boshqarmasi boʻlim boshligʻi Siroj Abduvohidov, Qoraqalpogʻiston Respublikasi Sanitariya epidemiologik osoyishtalik va jamoat salomatligi boshqarmasi boʻlim boshligʻi Ilhom Boynazarov, tuman FVB hamda SEO va JS boʻlimlari masʼullari qatnashishdi.

Seminarda ovqatdan zaharlanish, botulizm va quturish kasalligini keltirib chiqaruvchi sabablar, ulardan saqlanish va oldini olish choralari xususida soʻz yuritildi.

Taʼkidlanganidek, asosan qishda aholi tomonidan konservalangan mahsulotlar isteʼmoli koʻpayishi, hayvonlarning migratsiya jarayoni kuchayishi va urchish jarayoni kechishi fuqarolar salomatligi muhofazasiga jiddiy eʼtibor qaratishni taqozo etadi. Ovqatdan zaharlanishning eng ogʻir shakli boʻlgan botulizm kasalligining qoʻzgʻatuvchisi tabiatda keng tarqalgan. Bu mikrob kislorodsiz muhitda, yaʼni konservalangan mahsulotlarda koʻpayadi. Botulizm ogʻir kechishi va oʻlim koʻrsatkichlari yuqoriligi sababli unga qarshi jiddiy chora koʻrish talab etiladi. Bu kasallikni emlab yoki antibiotiklar bilan davolab boʻlmaydi. Shu sababli oldini olish choralarini koʻrishga alohida eʼtibor qaratilishi muhim ahamiyat kasb etadi.

Seminar davomida aholi oʻrtasida keyingi paytlarda ovqatdan zaharlanish holatlari haqidagi xabarlar koʻpaygani, tibbiyot xodimlari uy sharoitida konserva mahsulotlari tayyorlamaslik haqida koʻp bora ogohlantirishiga qaramasdan bunday holatlar sodir boʻlishi kamaymayotgani eʼtirof etildi. Botulizmning oldini olish uchun sanitariya talablariga javob beradigan mahsulotlardan tayyorlangan taomlarni isteʼmol qilish lozimligi, har bir oila aʼzosi shaxsiy gigiyena qoidalariga rioya etishi, ovqat tayyorlaydigan inson mahsulotlarni isteʼmolga yaroqliligiga ishonch hosil qilgandan soʻng ishlatishi kerakligini keng aholi qatlamiga yetkazish choralarini koʻrish boʻyicha tavsiyalar berildi.

Maʼlumki, konserva qilinadigan ayrim sabzavot mahsulotlari, yaʼni piyoz, sarimsoqpiyoz, karam, pomidor, bodring, baqlajon, har xil koʻkatlar yerda oʻsgani uchun mikroblar bilan ifloslanadi. Ishlov berish texnologiyasi buzilganda shu mikroblar tayyor mahsulotga oʻtib, unda koʻpaya boshlaydi. Sabzavot va meva konservalari mikroblar oʻsishi uchun qulay sharoit hisoblanadi. Shuning uchun ham bunday ifloslangan mahsulotlarni bilmasdan isteʼmol qilish zaharlanishga olib kelishi, ayrim hollarda kuchli zaharlanishdan oʻlim roʻy berishi ham mumkin.

Seminarda ishtirok etgan soha xodimlari ana shunday vaziyatlarda zudlik bilan shifokorga murojaat qilish kerakligini, aks holda, kasallikning ogʻir shakllari – yurak, qon-tomir va nafas tizimi xastaliklari yuzaga kelishi, buning natijasida bemorning hayoti xavf ostida qolishi, kasallikni uy sharoitida davolash ogʻir oqibatlarga olib kelishi mumkinligini aholi oʻrtasida imkon qadar kengroq tushuntirib borish lozimligini taʼkidlashdi. Shuningdek, sogʻlom turmush tarziga, sogʻlom ovqatlanish qoidalariga rioya qilish, botulizm kasalligining oldini olish boʻyicha profilaktik tadbirlar haqida tushunchalar berib oʻtishdi. Odamlar va hayvonlar orasida kuz-bahor oylarida uchraydigan yana bir kasallik – quturishning oldini olish borasida ham hamkorlikda harakat qilish, mavjud muammolarni joyida bartaraf qilish, qolaversa, quturish kasalligining alomatlari paydo boʻlganda, ushbu kasallikning oldini olish choralari toʻgʻrisida ham atroflicha soʻz yuritildi.

Seminarda ishtirokchilar kuz-qish mavsumida tarqalishi mumkin boʻlgan kasalliklar va ularning oldini olish choralari haqida batafsil maʼlumotlarga ega boʻldilar.

A.Utebayev, tuman FVB boʻlinma boshligʻi