MAMLAKATIMIZ KELAJAGINI ZAKOVATLI YoShLAR BUNYoD ETADILAR

56-sonli umumtaʼlim  maktabi yaqin-yaqinlargacha tumandagi eng qoloq, shu bilan birga moddiy-texnika bazasi, infratuzilmasi jihatidan anchagina past darajadagi maktablardan biri edi. Men ushbu maktabda 2007-yilda ingliz tili fani oʻqituvchisi sifatida oʻz faoliyatimni boshlaganimda sinfxonalarining qishda sovuq, yozda issiq boʻlishidan tashqari, zamonaviy kompyuter texnologiyalari bilan jihozlanmaganidan koʻngildagiday dars oʻtish imkoni ham yoʻq edi. Lekin maktab oʻqituvchilar jamoasi oʻrtasidagi ahillik, maʼnaviy sogʻlom muhit tufayli biz yaxshi sharoit yaratilishini kutib oʻtirmay, aksincha, ana shunday sharoitda ham koʻngildagiday ishlash, samarali natijalarga erishish mumkinligini amalda namoyon etdik. Shu bois, nafaqat menda, balki butun maktab pedagogika jamoasi oʻrtasida hamkasblarimizdan faxrlanish tuygʻusi shakllandi. Nazarimda ana shu tuygʻu maktabimiz jamoasini yangi marralar sari ruhlantirdi.

Maktab direktori sifatidagi faoliyatimni boshlagan 2016-yilda, eng avvalo, bilimdon, oʻz kasbining fidoyisi boʻlgan oʻqituvchilar salohiyatidan oqilona foydalanish orqaligina yaxshi natijalarga erishish mumkinligini his qilgan holda alohida qobiliyatli oʻquvchilardan iborat bilimdonlar toʻgaraklari faoliyatini jonlantirish, fan oʻqituvchilarining malakasini bosqichma-bosqich oshirib borishga harakat qildim.

Koʻpchilik: “maktab direktoriga oson, oʻqituvchilarga ishni buyuradi, talablar qoʻyadi, ijrosini nazorat qiladi”, deb oʻylashadi. Aksincha, umumtaʼlim maktablarida taʼlim-tarbiyaning eng zalvorli yuki direktor zimmasiga tushadi. Fan oʻqituvchilarini bilim va salohiyatiga yarasha tanlash, joy-joyiga qoʻyish, agar yaxshi natijalarga erishayotgan boʻlsa, hech boʻlmaganda maktab maʼmuriyati tomonidan maʼnaviy ragʻbatlantirib turish, uning samarali ishlashi uchun zarur sharoit yaratib berish maktab rahbaridan bilim va tajriba, tashabbuskorlik, shu bilan birga ijtimoiy adolatli boʻlishni talab etadi.

Ana shu tamoyil asosiga qurilgan taʼlim va tarbiya, albatta, oʻz samarasini beradi. Nazarimda, biz ahil jamoamiz bilan birgalikda bunga erishdik.

Ayni paytda maktabimizda 570 nafar oʻquvchi-yoshlar taʼlim-tarbiya olishmoqda. 58 nafar pedagoglarning 54 nafari oliy maʼlumotli, 4 nafari garchi oʻrta maxsus maʼlumotli boʻlsalar-da, oʻz sohasining yetuk mutaxassislaridir. Ulardan 5 nafari oliy, 14 nafari birinchi, 13 nafari ikkinchi toifaga ega, 22 nafari esa yuqori malakali mutaxassis fan oʻqituvchilari.

Shunisi quvonchliki, oʻqituvchilardan N.Saidova, G.Joʻldiboyeva, L.Kenjayevalar S1, H.Qodirboyev V2 sertifikatlarga ega yuqori malakali fan oʻqituvchilari boʻlsa, informatika fani oʻqituvchilari M.Boltaboyeva, G.Bekchanovalar LEVEL 1,2 xorijiy sertifikatlari, ona tili fani oʻqituvchisi M.Rajabova milliy sertifikat sohibalari boʻlishdi. Ana shunday malakali oʻqituvchilarimiz mehnati tufayli soʻnggi yillarda maktabimizda taʼlim-tarbiya sohasida yuqori natijalarga erishildi.

Xususan, ingliz tili boʻyicha 10-sinf oʻquvchisi K.Jumaniyozov, 11-sinf oʻquvchisi S.Oʻrozimbetova, Ya.Rajabova V2 sertifikatlariga ega boʻldilar.

2021-2022 oʻquv yilida Prezident sovrini uchun “Xorijiy tillarni oʻqitish boʻyicha eng yaxshi maktab” tanlovida maktabimizning 7-, 8-, 9-sinf oʻquvchilari ishtirok etib, tumanda 2-oʻrinni egalladilar va 75 mln. soʻm mukofot pulini qoʻlga kiritdilar.

2022-2023 oʻquv yilida ham Prezidentimiz sovrini uchun “Xorijiy tillarni oʻqitish boʻyicha eng yaxshi maktab” tanlovida maktabimizning 7-, 8-, 9-sinf oʻquvchilari jamoasi 3-oʻrinni egalladilar va 50 mln. soʻm pul mukofotini olishga muvaffaq boʻldilar.

Asosiy fanlar olimpiadasida esa 2022-2023 oʻquv yilida maktabimiz oʻquvchilari ona tili va adabiyot, matematika, fizika, ingliz tili, kimyo, rus tili fanlaridan Qoraqalpogʻiston bosqichida ishtirok etib, faxrli oʻrinlarni egalladilar.

Bundan tashqari, NDPI rektori kubogi, QDU rektori kubogi musobaqalarida maktabimizning fizika fani oʻqituvchisi Xushnud Chorshamov oʻz oʻquvchilari bilan birinchi oʻrinlarni qoʻlga kiritdilar.

Oʻtgan oʻquv yilida sport sohasi boʻyicha oʻqituvchi A.Mavlenovning shogirdi L.Madaminova “Besh tashabbus olimpiadasi”ning stol tennisi boʻyicha Qoraqalpogʻiston Respublikasi bosqichida 1-oʻrinni egalladi. Sportning yengil atletika turi boʻyicha musobaqalarda esa maktab terma jamoasi tumanda 1-oʻrin sohibi boʻldi.

2021-2022 oʻquv yilida maktabimizni 58 nafar bitiruvchi tamomlab, 31 nafar bitiruvchi, yaʼni 53 foiz yoshlar OTMlar talabasi boʻlishdi. 2022-2023 oʻquv yilida 72 nafar bitiruvchidan 53 nafari oliy taʼlim muassasalari talabalari boʻldilar. Ulardan 33 nafari davlat granti, 20 nafari kontrakt asosida oʻqishga qabul qilinib, 73 foiz koʻrsatkichga erishildi. Maktabda mavjud boʻlgan variativ sinflarning 25 nafar bitiruvchisining barchasi OTM talabasi boʻldilar. 

Albatta, bunday natijalarga erishishda pedagoglarimizdan matematika fani oʻqituvchisi A.Saparbayev, fizika fani oʻqituvchisi X.Chorshamov, ona tili va adabiyot fani oʻqituvchisi N.Tilovbayeva, ingliz tili fani oʻqituvchisi N.Saidova, kimyo fani oʻqituvchisi N.Sobirova, rus tili fani oʻqituvchisi G.Joʻldiboyevalarning mehnati katta.

Boshlangʻich sinf oʻqituvchilarimizdan Z.Sobirova, G.Yusupova, S.Xolmurodova, D.Safarbayeva, G.Saidovalarning oʻquvchilarga boshlangʻich sinfda bergan puxta taʼlim-tarbiyasi natijalari tufayli yuqoridagi yutuqlarga erishdik.

Investitsiya dasturi doirasida maktabimizga qoʻshimcha 180-oʻrinli bino qurib berildi. Yaratilgan bu imkoniyat maktabimiz jamoasini yanada yaxshiroq ishlashga undashi tabiiy.

2023-2024 oʻquv yilini yanada yangi orzu va rejalar bilan boshladik. Mazkur oʻquv yilida oʻquvchilar uchun fanlarni tanlab oʻqish imkoniyati berilgani bois, maktabda 10-B sinf ona tili-ingliz tili, 11-A sinf ona tili-biologiya yoʻnalishlari boʻyicha variativ sinflarga aylantirildi. Bundan tashqari, oʻquvchilarning matematika, fizika, kimyo fanlarini chuqur oʻzlashtirish imkoniyatini yaratish ham rejalashtirilmoqda. Maqsadimiz – maktabimizni mamlakatimiz miqyosidagi ilgʻor taʼlim muassasalari darajasiga koʻtarishdir. Shiorimiz esa: “Oʻqi, izlan, oʻrgat, oʻrgan va zakovatli boʻl!” Chunki mamlakatimiz kelajagini faqat va faqat zakovatli insonlar bunyod etadilar.

Men barcha hamkasblarimni, taʼlim-tarbiya sohasi fidoyilarini Oʻqituvchi-murabbiylar kuni – umumxalq bayrami bilan chin dildan tabriklayman! 

Orzigul XUDOYBERGANOVA, 56-sonli maktab direktori.