Jayxun ilhomlari

Bir kelib keting, qishlogʻimizga!

Respublika boʻyicha oʻtkazilgan “Bir nuroniy oʻn yoshga masʼul” koʻrik-tanlovining

tuman bosqichi gʻolibasi, boʻzsolmalik  Salomat Madaminova tilidan.

(Tanlovning respublika bosqichida hamyurtimiz 2-oʻrinni egallab, qimmatbaho sovgʻa sohibasi boʻldi).

Assalomu alaykum,

Soʻrasangiz agar mening makonim,

Amudaryo tuman, “Boʻz solma” elim.

 

Uch yarim mingdan koʻp aholimiz bor,

Paxtakor, chorvador, bogʻbon mirishkor.

 

Keksalari dono, goʻyoki Xizr,

Gurungin tinglagan qiladi huzur.

 

Momolar kayvoni, farishta yuzli,

Yoʻrigʻidan chiqmas – qobil ul-qizi.

 

Yoshullilar toʻrda, hurmatda mudom,

Yoshkichchilar chaqqon, xizmatda mudom.

 

Mehnat samarasi – rivojda ekin,

Shu sabab el obod, dasturxon toʻkin.

 

ToshDUni bitkazib, yayrab yosh dilim,

Koʻngil berib boʻldim, shu elga kelin.

 

Xalqim, Vatanim deb ishlashar edik,

Halol mehnat nonin shukur aylab yedik.

 

Yosh avlodning aql-zehnin saralab,

Qirq yil umrim kechdi parta oralab,

 

Taʼsir qilib, al-jabrdan darslarim,

Shogirdim koʻp al-Xorazmiy vorislari!

 

Mehnatim samari ketmadi bekor,

Koʻksimni bezadi ordenlar qator.

 

Bir kun kelib, momo boʻlib qolibman,

Jaraq-jaraq pensiya pul olibman!

 

“Zerikaman endi – bekorchi”, – dedim,

Uyimga qamalib yotmoqchi edim.

 

Yurtboshim qildilar ajoyib tadbir,

Bizlarga ayladi xoʻp katta taʼsir.

 

“Nuroniylar faol boʻlsin, kerak bizga!

Ularning oʻgiti – nur elimizga!"

 

Prezident daʼvati – alqissaki, shul:

“Bir nuroniy boʻlsin, oʻn yoshga masʼul!

 

“Yoshlarga ishoning, qudratli ular,

Yangi Oʻzbekiston egasi – shular!”

Bel boylab, qaytadan kirishdik ishga,

Qaramay bahor-u, yoz-u, kuz-qishga!

 

Toʻy-maʼraka, tadbir – barida bormiz.

Maslahat, kengash-ga doim tayyormiz!

 

Mahallamiz ahli totuv, feʼli keng,

Eldagi har bir yosh farzandimga teng!

 

Tinmay xabar olgach, yillar va oylar,

Bilamiz qozonda necha mosh qaynar!

 

Qaysi qiz biladi chevarlik sirin,

Qaysi yigit yerni yashnatar – piri.

 

“Hey, oʻgʻlim, tadbirkor boʻlib ish boshla,

"Alkash" boʻlma, bezori qiligʻing tashla!

 

Ma, asbob-uskuna – davlatdan yordam,

Yalqovlikni itqit – boʻlmagaysan kam!”

 

Kun-kundan ozayar yoʻqsil saflari,

“Temir daftar” emas – “Najot daftari!”

 

Baʼzan chiqib qolsa, turmushning “mushti”,

Mushukning “pisht”i-yu, tovuqning “kisht”i

 

Gaplashib, samimiy ezgu dil bilan,

Goh qilichday, gohi bolday til bilan.

 

Chora, iloj izlab qarashtiramiz,

Til topib, koʻplashib yarashtiramiz!

 

“Ajralish soʻzini tilingga olma,

Arshi Aʼlolarni larzaga solma!”

 

Ogʻzibirchilikdan koʻnglimiz toʻqdir,

“Boʻz solma” elida ajrashish yoʻqdir!

 

Bu tadbir bahona chiqdim oʻrtaga,

Buguncha shoirman, “matem” ertaga.

 

Koʻp narsa oʻrgatib berdilar baho,

Marhamatli vazir – Tursunboy ogʻa!

 

Taʼrifim oz boʻldi – hech koʻnglim toʻlmas,

Rost-da, ming eshitgan koʻrganday boʻlmas,

 

Baralla aytayin qulogʻingizga:

“Bir kelib keting, jon qishlogʻimizga!”

Tursunboy Abdullayev.

 

Sheʼrlarin oʻqib...

(O.Shomurodovning “Oila muqaddas” deb atalgan kitobini oʻqib chiqqandan soʻng aytmoqchi boʻlgan dil soʻzlarim)

Sheʼr har kimning ermagi emas,

Har bilganin demagi emas.

Sheʼr – Allohdan berilgan ohang,

Boʻlsa hamki, begona sohang.

 

Tortgach topib, adabiyotga,

Unda har kun mashqqa – ijodga.

Odilbekning sheʼrlarin oʻqib,

Oldim maʼni oʻzimga uqib.

 

Quruq gap yoʻq aytganlarida,

Aytmagani qalbida qaynar.

Quloq  tutsang darding aritar,

Soʻzlar ravon, bulbuldek sayrar.

 

Maqtamasam toʻlmaydi koʻnglim,

Bu sheʼrlarda tuygʻu bor, his bor.

Jim qolishga koʻnmaydi koʻnglim,

Olqishladim quvonib yuz bor.

 

Odilbekda mahorat zoʻri,

Baytlarini desang qandayin.

Toʻkilibdi bunda qalb qoʻri.

Goʻzal baytlar yangrar shundayin.

 

Kutayapman yangi asarin,

Zoʻr shoirning koʻngil daftarin.

Jumaboy HIDOYaTOV,

Qizilcholi mahallasi.

 

TUGʻIShGANMIZ, BIR-BIROVDAN KEChMAYLIK!

Puli borga yaltoqlanib bormaylik,

Yoʻqsil horib-yiqilganda tiklaylik.

Iymonli boʻl, oʻzimizdan ketmaylik,

Tugʻishganmiz, bir-birovdan kechmaylik!

 

Qoʻldan kelsa gar, yaxshilik qilaylik,

Yaxshi kunni bir oʻtirib eslaylik.

Sabr ila bori bilan eplaylik,

Tugʻishganmiz, bir-birovdan kechmaylik.

 

Yoshi ulugʻ yoʻlin kesib oʻtmaylik,

Bemaslahat muammoni yechmaylik.

Ona yurtdan yot ellarga koʻchmaylik,

Tugʻishganmiz, bir-birovdan kechmaylik!

 

Bir soʻzni deb, soʻng bu soʻzdan tonmaylik,

Oʻgit bermay, amal qilib ishlaylik.

Odamzotga hech bir kulfat solmaylik,

Tugʻishganmiz, bir-birovdan kechmaylik.

 

Koʻngillarga sovuqchilik solmaylik,

Oqillarga aslo qarshi bormaylik.

Yaqin-yiroq davrasidan qolmaylik,

Tugʻishganmiz, bir-birovdan kechmaylik.

Angsatboy Qarajanov, huquqshunos.

Qoraqalpoq tilidan Oygul Rajabova tarjimasi.

 

ONA

Ilk bora soʻzlashni oʻrgatgan ona,

Qoʻlda qalam tutib, chizishni yana.

Har tongda uygʻotib, sochlarim oʻrib,

Jonga jon sirdoshim, oʻzingsan ona.

Ertalab yettida toʻqqiz boʻldi deb,

Shoshib uygʻotguvchi sendirsan ona.

Aqlli, mehribon, dono qizim deb,

Suyib erkalovchi oʻzingsan ona.

Zumrad Bekchanova.

 

Manzara

Ortda qoldi gʻam-anduhlarim,

Bugun yana porladi quyosh.

Mayin kuylab, shivirlar shamol:

"Qachon aqling kiradi bebosh?"

 

Jilgʻalar ham menga soʻz otib,

Hol soʻraydi qaldirgʻochlar ham.

Vaqt tez oʻtar, quyosh ham botib,

Kuylayverdi shoʻx bulbullar ham.

 

Orzularim koʻzlab samoni,

Yuksaklarda qilmoqda parvoz.

Pok niyatli insonlar doim,

Orzusiga yetsa, qanday soz!

Sevinchoy Umrboyeva,

85-sonli maktab oʻquvchisi.