Жайхун илҳомлари

Бир келиб кетинг, қишлоғимизга!

Республика бўйича ўтказилган “Бир нуроний ўн ёшга масъул” кўрик-танловининг

туман босқичи ғолибаси, бўзсолмалик  Саломат Мадаминова тилидан.

(Танловнинг республика босқичида ҳамюртимиз 2-ўринни эгаллаб, қимматбаҳо совға соҳибаси бўлди).

Ассалому алайкум,

Сўрасангиз агар менинг маконим,

Амударё туман, “Бўз солма” элим.

 

Уч ярим мингдан кўп аҳолимиз бор,

Пахтакор, чорвадор, боғбон миришкор.

 

Кексалари доно, гўёки Хизр,

Гурунгин тинглаган қилади ҳузур.

 

Момолар кайвони, фаришта юзли,

Йўриғидан чиқмас – қобил ул-қизи.

 

Ёшуллилар тўрда, ҳурматда мудом,

Ёшкиччилар чаққон, хизматда мудом.

 

Меҳнат самараси – ривожда экин,

Шу сабаб эл обод, дастурхон тўкин.

 

ТошДУни битказиб, яйраб ёш дилим,

Кўнгил бериб бўлдим, шу элга келин.

 

Халқим, Ватаним деб ишлашар эдик,

Ҳалол меҳнат нонин шукур айлаб едик.

 

Ёш авлоднинг ақл-зеҳнин саралаб,

Қирқ йил умрим кечди парта оралаб,

 

Таъсир қилиб, ал-жабрдан дарсларим,

Шогирдим кўп ал-Хоразмий ворислари!

 

Меҳнатим самари кетмади бекор,

Кўксимни безади орденлар қатор.

 

Бир кун келиб, момо бўлиб қолибман,

Жарақ-жарақ пенсия пул олибман!

 

“Зерикаман энди – бекорчи”, – дедим,

Уйимга қамалиб ётмоқчи эдим.

 

Юртбошим қилдилар ажойиб тадбир,

Бизларга айлади хўп катта таъсир.

 

“Нуронийлар фаол бўлсин, керак бизга!

Уларнинг ўгити – нур элимизга!"

 

Президент даъвати – алқиссаки, шул:

“Бир нуроний бўлсин, ўн ёшга масъул!

 

“Ёшларга ишонинг, қудратли улар,

Янги Ўзбекистон эгаси – шулар!”

Бел бойлаб, қайтадан киришдик ишга,

Қарамай баҳор-у, ёз-у, куз-қишга!

 

Тўй-маърака, тадбир – барида бормиз.

Маслаҳат, кенгаш-га доим тайёрмиз!

 

Маҳалламиз аҳли тотув, феъли кенг,

Элдаги ҳар бир ёш фарзандимга тенг!

 

Тинмай хабар олгач, йиллар ва ойлар,

Биламиз қозонда неча мош қайнар!

 

Қайси қиз билади чеварлик сирин,

Қайси йигит ерни яшнатар – пири.

 

“Ҳей, ўғлим, тадбиркор бўлиб иш бошла,

"Алкаш" бўлма, безори қилиғинг ташла!

 

Ма, асбоб-ускуна – давлатдан ёрдам,

Ялқовликни итқит – бўлмагайсан кам!”

 

Кун-кундан озаяр йўқсил сафлари,

“Темир дафтар” эмас – “Нажот дафтари!”

 

Баъзан чиқиб қолса, турмушнинг “мушти”,

Мушукнинг “пишт”и-ю, товуқнинг “кишт”и

 

Гаплашиб, самимий эзгу дил билан,

Гоҳ қиличдай, гоҳи болдай тил билан.

 

Чора, илож излаб қараштирамиз,

Тил топиб, кўплашиб яраштирамиз!

 

“Ажралиш сўзини тилингга олма,

Арши Аълоларни ларзага солма!”

 

Оғзибирчиликдан кўнглимиз тўқдир,

“Бўз солма” элида ажрашиш йўқдир!

 

Бу тадбир баҳона чиқдим ўртага,

Бугунча шоирман, “матем” эртага.

 

Кўп нарса ўргатиб бердилар баҳо,

Марҳаматли вазир – Турсунбой оға!

 

Таърифим оз бўлди – ҳеч кўнглим тўлмас,

Рост-да, минг эшитган кўргандай бўлмас,

 

Баралла айтайин қулоғингизга:

“Бир келиб кетинг, жон қишлоғимизга!”

Турсунбой Абдуллаев.

 

Шеърларин ўқиб...

(О.Шомуродовнинг “Оила муқаддас” деб аталган китобини ўқиб чиққандан сўнг айтмоқчи бўлган дил сўзларим)

Шеър ҳар кимнинг эрмаги эмас,

Ҳар билганин демаги эмас.

Шеър – Аллоҳдан берилган оҳанг,

Бўлса ҳамки, бегона соҳанг.

 

Тортгач топиб, адабиётга,

Унда ҳар кун машққа – ижодга.

Одилбекнинг шеърларин ўқиб,

Олдим маъни ўзимга уқиб.

 

Қуруқ гап йўқ айтганларида,

Айтмагани қалбида қайнар.

Қулоқ  тутсанг дардинг аритар,

Сўзлар равон, булбулдек сайрар.

 

Мақтамасам тўлмайди кўнглим,

Бу шеърларда туйғу бор, ҳис бор.

Жим қолишга кўнмайди кўнглим,

Олқишладим қувониб юз бор.

 

Одилбекда маҳорат зўри,

Байтларини десанг қандайин.

Тўкилибди бунда қалб қўри.

Гўзал байтлар янграр шундайин.

 

Кутаяпман янги асарин,

Зўр шоирнинг кўнгил дафтарин.

Жумабой ҲИДОЯТОВ,

Қизилчоли маҳалласи.

 

ТУҒИШГАНМИЗ, БИР-БИРОВДАН КЕЧМАЙЛИК!

Пули борга ялтоқланиб бормайлик,

Йўқсил ҳориб-йиқилганда тиклайлик.

Иймонли бўл, ўзимиздан кетмайлик,

Туғишганмиз, бир-бировдан кечмайлик!

 

Қўлдан келса гар, яхшилик қилайлик,

Яхши кунни бир ўтириб эслайлик.

Сабр ила бори билан эплайлик,

Туғишганмиз, бир-бировдан кечмайлик.

 

Ёши улуғ йўлин кесиб ўтмайлик,

Бемаслаҳат муаммони ечмайлик.

Она юртдан ёт элларга кўчмайлик,

Туғишганмиз, бир-бировдан кечмайлик!

 

Бир сўзни деб, сўнг бу сўздан тонмайлик,

Ўгит бермай, амал қилиб ишлайлик.

Одамзотга ҳеч бир кулфат солмайлик,

Туғишганмиз, бир-бировдан кечмайлик.

 

Кўнгилларга совуқчилик солмайлик,

Оқилларга асло қарши бормайлик.

Яқин-йироқ даврасидан қолмайлик,

Туғишганмиз, бир-бировдан кечмайлик.

Ангсатбой Қаражанов, ҳуқуқшунос.

Қорақалпоқ тилидан Ойгул Ражабова таржимаси.

 

ОНА

Илк бора сўзлашни ўргатган она,

Қўлда қалам тутиб, чизишни яна.

Ҳар тонгда уйғотиб, сочларим ўриб,

Жонга жон сирдошим, ўзингсан она.

Эрталаб еттида тўққиз бўлди деб,

Шошиб уйғотгувчи сендирсан она.

Ақлли, меҳрибон, доно қизим деб,

Суйиб эркаловчи ўзингсан она.

Зумрад Бекчанова.

 

Манзара

Ортда қолди ғам-андуҳларим,

Бугун яна порлади қуёш.

Майин куйлаб, шивирлар шамол:

"Қачон ақлинг киради бебош?"

 

Жилғалар ҳам менга сўз отиб,

Ҳол сўрайди қалдирғочлар ҳам.

Вақт тез ўтар, қуёш ҳам ботиб,

Куйлайверди шўх булбуллар ҳам.

 

Орзуларим кўзлаб самони,

Юксакларда қилмоқда парвоз.

Пок ниятли инсонлар доим,

Орзусига етса, қандай соз!

Севинчой Умрбоева,

85-сонли мактаб ўқувчиси.