“Serikboyev Soliy” fermer xoʻjaligi paxtakorlari tumanda birinchi boʻlib paxta tayyorlash boʻyicha kontraktatsiya shartnomasi shartlarini bajardi

Dehqonlar uchun kuz faslining har daqiqasi gʻanimat. Boisi, shu faslda yil-oʻn ikki oy qishning qahratoni-yu yozning jaziramasida dalalarda qilingan mashaqqatli mehnatlar samarasi – yetishtirilgan hosil yigʻib-terib olinadi.

Respublikamizning barcha hududlarida boʻlgani kabi Amudaryo tumanidagi fermer xoʻjaliklarida ham yigʻim-terim ishlari kun sayin avj olmoqda. Dalalarda oppoq boʻlib ochilgan paxtalarni chevar qoʻlli, chaqqon terimchilar imkon qadar tezroq yigʻib-terib olishga intilmoqdalar. Kuzning quyoshli, iliq kunlarini gʻanimat bilib, bugun kechagidan unumli ishlashga harakat qilmoqdalar.

Ana shunday saʼy-harakatlar tufayli Toshyop ovulidagi Soliy Serikboyev rahbarlik qilayotgan “Serikboyev Soliy” fermer xoʻjaligi paxtakorlari joriy yilning 24-sentyabrida kontraktatsiya shartnomasi shartlarini ortigʻi bilan bajardilar. 17 gektar paxta maydonidan ilk terimning oʻzidayoq 55 tonnadan ziyod paxta hosili terib olindi.

24-sentyabr kuni xoʻjalikda erishilgan mehnat natijasiga bagʻishlab tantanali tadbir tashkil etildi. Unda tuman hokimi Sobir Xoʻjametov, sektorlar rahbarlari, Qoraqlpogʻiston Respublikasi Joʻqorgʻi Kengesi deputatlari, qishloq xoʻjaligi, ovul fuqarolar yigʻini masʼullari ishtirok etdilar. Tuman hokimi, sektorlar rahbarlari yigʻim-terimda faol ishtirok etgan barchani erishgan mehnat gʻalabasi bilan qizgʻin qutladilar, ilgʻorlarga qimmatbaho sovgʻalar hadya etdilar.

fermer xoʻjaligining bu yutugʻi oʻz-oʻzidan boʻlmadi. 12 nafar pudratchilar erta bahordan paxta dalalarda toʻliq nihol olishga, unib chiqqan gʻoʻzalarni agrotexnika qoidalari asosida parvarish qilishga alohida eʼtibor qaratdilar. Natijada kuzga kelib, har bir niholda moʻl hosil toʻplanishiga erishildi.

Yigʻim-terim mavsumini yuqori kayfiyatda boshlagan 12 nafar pudratchilarga hududning 48 nafar uyushmagan aholisi yaqindan koʻmakdosh boʻlib, xoʻjalik paxta xirmonining barvaqt yuksalishiga munosib hissa qoʻshdilar. Olmagul Reyimova, Nasiba Oʻrozboyeva, Umida Kamolova, Qarligʻash Ibodullayeva, Sanobar Japaqova, Jumabika Xolboyeva, Zebogul Yusupova, Umida Yusupova, Muqaddas Olloberganova, Pardagul Qozoqboyevalar paxta terimida ilgʻorlikni qoʻldan bermay kelmoqdalar.

Erishilgan muvaffaqiyatga terimchilar uchun tushda dala boshida issiq ovqat, choy tashkil etilib, unumli ishlashga sharoit yaratilgani muhim asos boʻldi. Terim pullari oʻz vaqtida hisob-kitob qilib borilgani ham terimchilarni moddiy jihatdan ragʻbatlantirib, yanada faol boʻlishga chorladi.

Tumanimizning barcha fermer xoʻjaliklari paxta dalalarida ham hosil yigʻim-terimi kun sayin avjiga chiqayapti. Pudratchilar bilan bir safda ish bilan band boʻlmagan aholi ham paxta terib, oilasi uchun daromad topayotir. Terilgan paxta ayni vaqtning oʻzida tarozida tortilib, terim haqi hisob-kitob qilinayapti.

Amalga oshirilayotgan buningdek saʼy-harakatlar paxta terimi kunlik surʼati oshishini taʼminlayotir. Kontraktatsiya shartnomalari shartlarini bajarish uchun harakat qilib, marradan oshayotgan xoʻjaliklar soni esa tobora koʻpaymoqda. Dalalarda hamjihatlikda qilinayotgan mehnat tufayli qimmatbaho xomashyo – oppoq paxtalardan zalvorli xirmonlar bunyodga kelmoqda.

Tumanda birinchilardan boʻlib paxta tayyorlash rejasi ado etilgan xoʻjalikda yigʻim-terim hali qizgʻin davom etayotir.

Oygul RAJABOVA