TUMAN TIBBIYoT BIRLAShMASIGA ZAMONAVIY TEZ TIBBIY YoRDAM MAShINALARI TOPShIRILDI

Davlatimiz rahbarining raisligida 2022-yil 5-may kuni oʻtkazilgan yigʻilishida tez tibbiy va shoshilinch yordam xizmati faoliyatini takomillashtirish masalalari ilgari surilgan edi. Prezidentimiz taʼkidlaganidek, tibbiyot sohasi inson sogʻligʻi va hayotini saqlab qolishda “oltin soat” oraligʻida birinchi yordam koʻrsatuvchi muhim boʻgʻindir. Soʻnggi yillarda bu yoʻnalishlarning moddiy taʼminoti va kadrlar salohiyatini yaxshilash boʻyicha koʻp ishlar qilindi.

Amudaryo tumanida ham hudud aholisiga koʻrsatilayotgan tibbiy xizmatlar sifati va samaradorligini yanada yaxshilash maqsadida qator amaliy ishlar qilinmoqda. Shu ishlarning mantiqiy davomi sifatida 23-sentyabr kuni tuman tibbiyot birlashmasining shoshilinch tez yordam boʻlimiga 3ta maxsus jihozlangan tez tibbiy yordam avtomashinalari topshirildi.

Tadbirda tuman hokimi Sobir Xoʻjametov, Qoraqalpogʻiston Respublikasi Joʻqorgʻi Kengesining qoʻmita raisi Sharapat Otemisov, hokimlik masʼul xodimlari, tuman tibbiyot birlashmasi bosh shifokori Faxriddin Abdullayev hamda soha vakillari ishtirok etishdi.

Tadbirda tuman hokimi Sobir Xoʻjametov soʻzga chiqib, bugun kunda tibbiyot sohasidagi yutuqlar, shu bilan birga mavjud kamchiliklar hamda ularni bartaraf etish boʻyicha koʻrilayotgan chora-tadbirlar haqida toʻxtalib oʻtdi.

Joʻqorgʻi Kengesning qoʻmita raisi Sharapat Otemisov aholiga oʻz vaqtida shoshilinch tez tibbiy yordam koʻrsatish borasida zamonaviy tez yordam avtomobillarining ahamiyati haqida aytib oʻtdi.

Mamlakatimiz boʻyicha oʻtgan yillar mobaynida butun respublikamiz boʻylab 3 mingga yaqin yangi tez yordam mashinalari xarid qilingan. Zamonaviy reanimatsiya mashinalari soni 400tadan oshgan. Shuningdek, tez yordam stantsiyalari va brigadalari soni ham koʻpaytirilgan. Bitta chaqiriq uchun dori-darmonga ajratilayotgan mablagʻlar miqdori 16 baravarga, dori turlari esa 20tadan 45tagacha oshirilgan.

Shudan keyin tez tibbiy yordam avtomashinalari kalitlari tuman tibbiyot birlashmasi rahbariyati va haydovchilarga tantanali tarzda topshirildi.

Tuman tibbiyot birlashmasi bosh shifokori Faxriddin Abdullayev ushbu tez tibbiy yordam mashinasida barcha zarur tibbiy asbob-anjomlar mavjudligini, shifokorlar harakat paytida ham bemorlarga birinchi tibbiy yordam koʻrsatish imkoniyatiga ega ekanligini alohida taʼkidlab oʻtdi.

Shuningdek, Prezidentimizning “Tibbiyotdagi islohotlar – inson qadri uchun” mavzusidagi oʻtkazilgan tibbiyot xodimlari bilan ochiq muloqoti doirasida belgilangan vazifalar ijrosini taʼminlash maqsadida tumanimizda amalga oshirilayotgan ishlar haqida maʼlumot berdi.

Xususan, keyingi yillarda Amudaryo tumanida ham tibbiyot sohasidagi ezgu ishlarning koʻlami kengaymoqda. Hududlardagi tibbiyot muassasalarining moddiy-texnik bazasi yanada mustahkamlanib, zamonaviy tibbiy jihozlar bilan taʼminlanmoqda. Tibbiyot birlashmasida yangidan qiymati 14,4 mlrd. soʻmga teng boʻlgan 90-oʻrinli 4 qavatli tugʻruq kompleksi qurilayotgani reproduktiv yoshdagi ayollar, homiladorlar va bolalarga koʻrsatiladigan tibbiy yordam sifatini yanada oshirish va koʻlamini kengaytirish imkonini berishi qayd qilindi.

Tez tibbiy yordam boʻlimi xodimlari shu kuniyoq yangi avtomashinalarda “103” raqami orqali tushgan chaqiruvlar boʻyicha bemorlarga xizmat qilishga kirishdilar. Bu kabi ezgu ishlar tuman aholisi salomatligini mustahkamlash, bemorlarga gʻamxoʻrlik koʻrsatish, eng muhimi, inson qadrini ulugʻlashga qaratilgani bilan ahamiyatlidir.

Amudaryo tuman hokimligi Axborot xizmati