ТУМАН ТИББИЁТ БИРЛАШМАСИГА ЗАМОНАВИЙ ТEЗ ТИББИЙ ЁРДАМ МАШИНАЛАРИ ТОПШИРИЛДИ

Давлатимиз раҳбарининг раислигида 2022 йил 5 май куни ўтказилган йиғилишида тез тиббий ва шошилинч ёрдам хизмати фаолиятини такомиллаштириш масалалари илгари сурилган эди. Президентимиз таъкидлаганидек, тиббиёт соҳаси инсон соғлиғи ва ҳаётини сақлаб қолишда “олтин соат” оралиғида биринчи ёрдам кўрсатувчи муҳим бўғиндир. Сўнгги йилларда бу йўналишларнинг моддий таъминоти ва кадрлар салоҳиятини яхшилаш бўйича кўп ишлар қилинди.

Амударё туманида ҳам ҳудуд аҳолисига кўрсатилаётган тиббий хизматлар сифати ва самарадорлигини янада яхшилаш мақсадида қатор амалий ишлар қилинмоқда. Шу ишларнинг мантиқий давоми сифатида 23 сентябрь куни туман тиббиёт бирлашмасининг шошилинч тез ёрдам бўлимига 3та махсус жиҳозланган тез тиббий ёрдам автомашиналари топширилди.

Тадбирда туман ҳокими Собир Хўжаметов, Қорақалпоғистон Республикаси Жўқорғи Кенгесининг қўмита раиси Шарапат Отемисов, ҳокимлик масъул ходимлари, туман тиббиёт бирлашмаси бош шифокори Фахриддин Абдуллаев ҳамда соҳа вакиллари иштирок этишди.

Тадбирда туман ҳокими Собир Хўжаметов сўзга чиқиб, бугун кунда тиббиёт соҳасидаги ютуқлар, шу билан бирга мавжуд камчиликлар ҳамда уларни бартараф этиш бўйича кўрилаётган чора-тадбирлар ҳақида тўхталиб ўтди.

Жўқорғи Кенгеснинг қўмита раиси Шарапат Отемисов аҳолига ўз вақтида шошилинч тез тиббий ёрдам кўрсатиш борасида замонавий тез ёрдам автомобилларининг аҳамияти ҳақида айтиб ўтди.

Мамлакатимиз бўйича ўтган йиллар мобайнида бутун республикамиз бўйлаб 3 мингга яқин янги тез ёрдам машиналари харид қилинган. Замонавий реанимация машиналари сони 400тадан ошган. Шунингдек, тез ёрдам станциялари ва бригадалари сони ҳам кўпайтирилган. Битта чақириқ учун дори-дармонга ажратилаётган маблағлар миқдори 16 бараварга, дори турлари эса 20тадан 45тагача оширилган.

Шудан кейин тез тиббий ёрдам автомашиналари калитлари туман тиббиёт бирлашмаси раҳбарияти ва ҳайдовчиларга тантанали тарзда топширилди.

Туман тиббиёт бирлашмаси бош шифокори Фахриддин Абдуллаев ушбу тез тиббий ёрдам машинасида барча зарур тиббий асбоб-анжомлар мавжудлигини, шифокорлар ҳаракат пайтида ҳам беморларга биринчи тиббий ёрдам кўрсатиш имкониятига эга эканлигини алоҳида таъкидлаб ўтди.

Шунингдек, Президентимизнинг “Тиббиётдаги ислоҳотлар – инсон қадри учун” мавзусидаги ўтказилган тиббиёт ходимлари билан очиқ мулоқоти доирасида белгиланган вазифалар ижросини таъминлаш мақсадида туманимизда амалга оширилаётган ишлар ҳақида маълумот берди.

Хусусан, кейинги йилларда Амударё туманида ҳам тиббиёт соҳасидаги эзгу ишларнинг кўлами кенгаймоқда. Ҳудудлардаги тиббиёт муассасаларининг моддий-техник базаси янада мустаҳкамланиб, замонавий тиббий жиҳозлар билан таъминланмоқда. Тиббиёт бирлашмасида янгидан қиймати 14,4 млрд. сўмга тенг бўлган 90 ўринли 4 қаватли туғруқ комплекси қурилаётгани репродуктив ёшдаги аёллар, ҳомиладорлар ва болаларга кўрсатиладиган тиббий ёрдам сифатини янада ошириш ва кўламини кенгайтириш имконини бериши қайд қилинди.

Тез тиббий ёрдам бўлими ходимлари шу куниёқ янги автомашиналарда “103” рақами орқали тушган чақирувлар бўйича беморларга хизмат қилишга киришдилар. Бу каби эзгу ишлар туман аҳолиси саломатлигини мустаҳкамлаш, беморларга ғамхўрлик кўрсатиш, энг муҳими, инсон қадрини улуғлашга қаратилгани билан аҳамиятлидир.

Амударё туман ҳокимлиги Ахборот хизмати