INShOLAR TANLOVI GʻOLIBLARI RAGʻBATLANTIRILDI

“Mahalla” xayriya jamoat fondi Amudaryo tuman boʻlinmasi tomonidan “Obod mahallam” grant loyihasining ish rejasiga asosan joylarda turli uchrashuvlar, seminarlar, davra suhbatlari, tanlovlar oʻtkazilib kelinmoqda. Loyihaning maqsadi – atrof muhitni muhofaza qilish, tabiiy resurslardan oqilona foydalanish sohasidagi qonun hujjatlari talablari buzilishining oldini olish, uni aniqlash va unga chek qoʻyishga, tabiatni muhofaza qilish faoliyati samaradorligini oshirishga hissa qoʻshish maqsadida qonun hujjatlariga muvofiq fuqarolarning oʻzini oʻzi boshqarish organlari, nodavlat notijorat tashkilotlari va fuqarolar bilan hamkorlikda jamoatchilik ekologik nazoratini amalga oshirish, aholining ekologiyaga oid bilimlarini kengaytirish, hududlarni obodonlashtirish va koʻkalamzorlashtirish, atrof-muhit muhofazasiga hissa qoʻshishdir.

Shuningdek, “Yashil makon” umummilliy dasturi doirasida Toʻlqin ovulida 70 sotix, Bobur nomli ovulida 20 sotix, Qum yop ovulida 20 sotix, Choykoʻl ovulida 20 sotix, Qilichboy ovulida 10 sotix, Farovon mahallasida 5 sotix yerda “Mahalla bogʻi” yaratiladi.

Quvonarli joyi shundaki, loyihaning asosiy maqsadlarini amalga oshirish uchun “Mahalla” xayriya jamgʻarmasi Amudaryo tuman boʻlinmasi “Taraqqiyot koʻzgusi” gazetasi va Amudaryo televideniyesi tahririyatlari hamda “Jayxun ilhomlari” NNT bilan hamkorlikda ish olib borib katta natijalarni qoʻlga kiritmoqda. Ommaviy axborot vositalari bilan hamkorlikda ish olib borilib oʻrinlanayotgan ishlar natijasi butun respublika aholisiga tanishtirib borilmoqda.

Mazkur tashkilotlar birgalikda atrof-muhitni muhofaza qilish va tabiiy resurslardan oqilona foydalanish sohasidagi qonun hujjatlari talablarini aholining keng qatlamiga tushuntirish maqsadida ovul va mahalla fuqarolar yigʻinlari vakillari ishtirokida uchrashuvlar, fuqarolar yigʻinlari huzuridagi ekologiya va atrof-muhitni muhofaza qilish, obodonlashtirish va koʻklamzorlashtirish boʻyicha komissiyalar faoliyati samaradorligini yanada yaxshilash maqsadida soha mutaxassislari ishtirokida ovul va mahalla fuqarolar yigʻinlari komissiyalari vakillari uchun oʻquv seminarlar tashkil qilib kelmoqdalar.

Aholi, ayniqsa yoshlarni tabiatga ehtiyotkorona munosabatda boʻlish, tabiiy resurslarni tejashga daʼvat qilish, ularning ekologiyaga oid bilimlarini oshirish maqsadida tahririyatlar va jamoatchilik tashkilotlari bilan hamkorlikda tumanimizdagi umumtaʼlim maktablari oʻquvchilari oʻrtasida “Yashil tabiatni asrash – oʻz qoʻlimizda”, “Koʻchat ekish ezgu anʼana”, “Men ekkan nihol” mavzularidagi insholar tanlovlari, “Tabiat va biz”, “Mahallam jamoli” mavzularidagi rasmlar tanlovlarining oʻtkazilishi tumanimiz yoshlari orasida isteʼdod egalarining juda koʻp ekanligini namoyon qildi.

Shu yilning sentyabr oyida esa “Mahalla” xayriya jamoat fondi Amudaryo tuman boʻlinmasi “Jayxun ilhomlari” NNT bilan birgalikda Qipchoq hududida joylashgan umumtaʼlim maktablari oʻquvchilari oʻrtasida “Hashar – elga yarashar” mavzusida insholar tanlovini oʻtkazdi. Tanlovda hududdagi oʻn birta umumtaʼlim maktablaridan 31 nafar oʻquvchi ishtirok etdi.

Yuqorida aytib oʻtkanimizdek, bu insholar tanlovida ham ishtirokchilar oʻzlarining ekologiyaga oid bilimlarining yuqori darajada ekanligini yana bir bor namoyish qildilar.

Insholar tanlovining yakuni badiiy kengash aʼzolari tomonidan koʻrib chiqilib gʻolib va sovrindorlar aniqlandi. Unga koʻra tumanimizdagi 28-sonli maktabning 10-sinf oʻquvchisi Iroda Ozodboyeva “Mavzuga oid ravon fikrlari uchun” 1-oʻringa, 32-sonli maktabning 11-sinf oʻquvchisi Sabrina Tursunboyeva “Eng yaxshi, ezgulik targʻibotchiligi uchun” 2-oʻringa, 11-sonli maktabning 10-sinf oʻquvchisi Hakimbek Yoʻldoshev “Shaxsiy fikrini ravon bayon qilgani uchun” 3-oʻringa munosib deb topildi.

Shuningdek, 65-sonli maktabning 10-sinf oʻquvchisi Zilola Sattorberganova, 22-sonli maktabning 9-sinf oʻquvchisi Mahfuza Yaxshimurodova, 18-sonli maktabning 11-sinf oʻquvchisi Sevara Ismoilovalar insholar tanlovidagi “faol ishtiroki” uchun sovrindorlar safidan joy oldilar.

Gʻolib va sovrindorlarga tashkilotchilar tomonidan tayyorlangan sovgʻalar, “Faxriy yorliq”lar tantanali ravishda topshirildi.

Oʻrozali REYIMOV