ИНШОЛАР ТАНЛОВИ ҒОЛИБЛАРИ РАҒБАТЛАНТИРИЛДИ

“Маҳалла” хайрия жамоат фонди Амударё туман бўлинмаси томонидан “Обод маҳаллам” грант лойиҳасининг иш режасига асосан жойларда турли учрашувлар, семинарлар, давра суҳбатлари, танловлар ўтказилиб келинмоқда. Лойиҳанинг мақсади – атроф муҳитни муҳофаза қилиш, табиий ресурслардан оқилона фойдаланиш соҳасидаги қонун ҳужжатлари талаблари бузилишининг олдини олиш, уни аниқлаш ва унга чек қўйишга, табиатни муҳофаза қилиш фаолияти самарадорлигини оширишга ҳисса қўшиш мақсадида қонун ҳужжатларига мувофиқ фуқароларнинг ўзини ўзи бошқариш органлари, нодавлат нотижорат ташкилотлари ва фуқаролар билан ҳамкорликда жамоатчилик экологик назоратини амалга ошириш, аҳолининг экологияга оид билимларини кенгайтириш, ҳудудларни ободонлаштириш ва кўкаламзорлаштириш, атроф-муҳит муҳофазасига ҳисса қўшишдир.

Шунингдек, “Яшил макон” умуммиллий дастури доирасида Тўлқин овулида 70 сотих, Бобур номли овулида 20 сотих, Қум ёп овулида 20 сотих, Чойкўл овулида 20 сотих, Қиличбой овулида 10 сотих, Фаровон маҳалласида 5 сотих ерда “Маҳалла боғи” яратилади.

Қувонарли жойи шундаки, лойиҳанинг асосий мақсадларини амалга ошириш учун “Маҳалла” хайрия жамғармаси Амударё туман бўлинмаси “Тараққиёт кўзгуси” газетаси ва Амударё телевидениеси таҳририятлари ҳамда “Жайхун илҳомлари” ННТ билан ҳамкорликда иш олиб бориб катта натижаларни қўлга киритмоқда. Оммавий ахборот воситалари билан ҳамкорликда иш олиб борилиб ўринланаётган ишлар натижаси бутун республика аҳолисига таништириб борилмоқда.

Мазкур ташкилотлар биргаликда атроф-муҳитни муҳофаза қилиш ва табиий ресурслардан оқилона фойдаланиш соҳасидаги қонун ҳужжатлари талабларини аҳолининг кенг қатламига тушунтириш мақсадида овул ва маҳалла фуқаролар йиғинлари вакиллари иштирокида учрашувлар, фуқаролар йиғинлари ҳузуридаги экология ва атроф-муҳитни муҳофаза қилиш, ободонлаштириш ва кўкламзорлаштириш бўйича комиссиялар фаолияти самарадорлигини янада яхшилаш мақсадида соҳа мутахассислари иштирокида овул ва маҳалла фуқаролар йиғинлари комиссиялари вакиллари учун ўқув семинарлар ташкил қилиб келмоқдалар.

Аҳоли, айниқса ёшларни табиатга эҳтиёткорона муносабатда бўлиш, табиий ресурсларни тежашга даъват қилиш, уларнинг экологияга оид билимларини ошириш мақсадида таҳририятлар ва жамоатчилик ташкилотлари билан ҳамкорликда туманимиздаги умумтаълим мактаблари ўқувчилари ўртасида “Яшил табиатни асраш – ўз қўлимизда”, “Кўчат экиш эзгу анъана”, “Мен эккан ниҳол” мавзуларидаги иншолар танловлари, “Табиат ва биз”, “Маҳаллам жамоли” мавзуларидаги расмлар танловларининг ўтказилиши туманимиз ёшлари орасида истеъдод эгаларининг жуда кўп эканлигини намоён қилди.

Шу йилнинг сентябрь ойида эса “Маҳалла” хайрия жамоат фонди Амударё туман бўлинмаси “Жайхун илҳомлари” ННТ билан биргаликда Қипчоқ ҳудудида жойлашган умумтаълим мактаблари ўқувчилари ўртасида “Ҳашар – элга ярашар” мавзусида иншолар танловини ўтказди. Танловда ҳудуддаги ўн бирта умумтаълим мактабларидан 31 нафар ўқувчи иштирок этди.

Юқорида айтиб ўтканимиздек, бу иншолар танловида ҳам иштирокчилар ўзларининг экологияга оид билимларининг юқори даражада эканлигини яна бир бор намойиш қилдилар.

Иншолар танловининг якуни бадиий кенгаш аъзолари томонидан кўриб чиқилиб ғолиб ва совриндорлар аниқланди. Унга кўра туманимиздаги 28-сонли мактабнинг 10-синф ўқувчиси Ирода Озодбоева “Мавзуга оид равон фикрлари учун” 1-ўринга, 32-сонли мактабнинг 11-синф ўқувчиси Сабрина Турсунбоева “Энг яхши, эзгулик тарғиботчилиги учун” 2-ўринга, 11-сонли мактабнинг 10-синф ўқувчиси Ҳакимбек Йўлдошев “Шахсий фикрини равон баён қилгани учун” 3-ўринга муносиб деб топилди.

Шунингдек, 65-сонли мактабнинг 10-синф ўқувчиси Зилола Сатторберганова, 22-сонли мактабнинг 9-синф ўқувчиси Маҳфуза Яхшимуродова, 18-сонли мактабнинг 11-синф ўқувчиси Севара Исмоиловалар иншолар танловидаги “фаол иштироки” учун совриндорлар сафидан жой олдилар.

Ғолиб ва совриндорларга ташкилотчилар томонидан тайёрланган совғалар, “Фахрий ёрлиқ”лар тантанали равишда топширилди.

Ўрозали РЕЙИМОВ