“ZAKOVAT” INTELLEKTUAL OʻYININING TUMAN BOSQIChI QIZIQARLI TAASSUROTLARGA BOY BOʻLDI

Oʻzbekiston Respublikasi Prezidentining 2022-yil 20-yanvardagi “Zakovat” intellektual oʻyinini aholi oʻrtasida ommaviy-maʼrifiy harakatga aylantirish va boshqa intellektual oʻyinlarni rivojlantirishga oid chora-tadbirlar toʻgʻrisida”gi Qarori ijrosini taʼminlash maqsadida 5 ta muhim tashabbus olimpiadasi doirasida Amudaryo tumani Maktabgacha va maktab taʼlimi boʻlimiga qarashli umumtaʼlim maktab oʻquvchi-yoshlari oʻrtasida “Zakovat” intellektual oʻyinining tuman bosqichi oʻtkazildi.

Oʻyin hamkor tashkilotlar masʼullari, xususan, “Zakovat” nadavlat notijorat tashkiloti hududiy koordinatori Dilshodbek Jumaniyazov, Yoshlar ishlari agentligi tuman bshlimi rahbari Sardorbek Ismailov, tuman Maktabgacha va maktab taʼlimi boʻlimi masʼul xodimi Zafar Abdullayev, Respublika maʼnaviyat va maʼrifat markazi Amudaryo tuman boʻlinmasi xodimi Zarifa Soatboyevalar hamkorligida tashkillashtirildi. Unda tuman Maktabgacha va maktab taʼlimi boʻlimiga qarashli 85 ta umumtaʼlim maktablarining 85 ta bilimdonlar jamoalari qatnashib, oʻquvchi-yoshlar maktabda olgan bilimlarini sinovdan oʻtkazishdi.

Intellektual oʻyin Nizomiga koʻra, barcha jamoalar aʼzolari umumtaʼlim maktablari uchun belgilangan fanlar dasturi boʻyicha olgan bilimlari, shuningdek, epchilliklari va hozirjavobliklarini amalda namoyish etdilar. Bundan tashqari, savollarga javob berishda oʻquvchilarning yuqori darajada aniqlik, mantiqiy fikrlash doirasining kengligiga alohida eʼtibor qaratildi.

Keskin, muntozarali, shu barobarida qiziqarli taassurotlarga boy tarzda oʻtgan “Zakovat” intellektual oʻyinida har bir savoldan keyin bilimdon va mantiqiy fikrlash doirasi keng oʻquvchilar oʻzlarining alohida iqtidorli ekanliklarini namoyon etishib, gʻoliblik sari dadil intildilar.

Oʻyin davomida eng kuchli deb tan olingan 65-sonli, 22- va 29-sonli maktablarning bilimdon oʻquvchilari gʻoliblik uchun oʻzaro kuch sinashdilar. Ayniqsa, 65-sonli va 22-sonli maktablarning zakovatli oʻquvchi-yoshlari oʻrtasidagi bahslar yanada qiziqarli taassurotlarga boy boʻldi. Oʻzlari taʼlim-tarbiya olayotgan maktab va maktabdoshlari, qolaversa, ustozlari shaʼni, obroʻsi uchun qizgʻin bahslashgan 65-sonli umumtaʼlim maktabi oʻquvchi-yoshlari faxrli 1-oʻrinni egallashdi. 22-sonli va 29-sonli maktablarning jamoalari esa zakovat bahslarida biri-biridan qolishmasliklarini namoyon etishib, har ikkala jamoa ham durang natijani qayd etishdi va 2-oʻrin sohiblari boʻlishdi.

Musobaqa gʻoliblari boʻlgan 65-, 22- va 29-sonli maktablarning bilimdonlar jamoalari “Zakovat” intellektual oʻyinining Qoraqalpogʻiston Respublikasi bosqichiga yoʻllanmani qoʻlga kiritdilar.

Gʻolib jamoalar hamkor tashkilotlar tomonidan diplom va qimmatbaho sovgʻalar bilan taqdirlandilar.

Shunisi eʼtiborliki, “Besh muhim tashabbus” olimpiadasi doirasida oʻtkazilayotgan mazkur bilimdonlik boʻyicha bellashuvlar oʻsib kelayotgan yosh avlodning yuksak maxnaviyatli, jismonan va axloqan yetuk, shu bilan birga zamon bilan hamnafas, maktab dasturidagi fanlarni mukammal oʻzlashtirishlarini taʼminlashga yoʻnaltirilgani bilan muhim ahamiyat kasb etadi.

Robiya YOʻLDOShEVA