“ЗАКОВАТ” ИНТЕЛЛЕКТУАЛ ЎЙИНИНИНГ ТУМАН БОСҚИЧИ ҚИЗИҚАРЛИ ТААССУРОТЛАРГА БОЙ БЎЛДИ

Ўзбекистон Республикаси Президентининг 2022 йил 20 январдаги “Заковат” интеллектуал ўйинини аҳоли ўртасида оммавий-маърифий ҳаракатга айлантириш ва бошқа интеллектуал ўйинларни ривожлантиришга оид чора-тадбирлар тўғрисида”ги Қарори ижросини таъминлаш мақсадида 5 та муҳим ташаббус олимпиадаси доирасида Амударё тумани Мактабгача ва мактаб таълими бўлимига қарашли умумтаълим мактаб ўқувчи-ёшлари ўртасида “Заковат” интеллектуал ўйинининг туман босқичи ўтказилди.

Ўйин ҳамкор ташкилотлар масъуллари, хусусан, “Заковат” надавлат нотижорат ташкилоти ҳудудий координатори Дилшодбек Жуманиязов, Ёшлар ишлари агентлиги туман бщлими раҳбари Сардорбек Исмаилов, туман Мактабгача ва мактаб таълими бўлими масъул ходими Зафар Абдуллаев, Республика маънавият ва маърифат маркази Амударё туман бўлинмаси ходими Зарифа Соатбоевалар ҳамкорлигида ташкиллаштирилди. Унда туман Мактабгача ва мактаб таълими бўлимига қарашли 85 та умумтаълим мактабларининг 85 та билимдонлар жамоалари қатнашиб, ўқувчи-ёшлар мактабда олган билимларини синовдан ўтказишди.

Интеллектуал ўйин Низомига кўра, барча жамоалар аъзолари умумтаълим мактаблари учун белгиланган фанлар дастури бўйича олган билимлари, шунингдек, эпчилликлари ва ҳозиржавобликларини амалда намойиш этдилар. Бундан ташқари, саволларга жавоб беришда ўқувчиларнинг юқори даражада аниқлик, мантиқий фикрлаш доирасининг кенглигига алоҳида эътибор қаратилди.

Кескин, мунтозарали, шу баробарида қизиқарли таассуротларга бой тарзда ўтган “Заковат” интеллектуал ўйинида ҳар бир саволдан кейин билимдон ва мантиқий фикрлаш доираси кенг ўқувчилар ўзларининг алоҳида иқтидорли эканликларини намоён этишиб, ғолиблик сари дадил интилдилар.

Ўйин давомида энг кучли деб тан олинган 65-сонли, 22- ва 29-сонли мактабларнинг билимдон ўқувчилари ғолиблик учун ўзаро куч синашдилар. Айниқса, 65-сонли ва 22-сонли мактабларнинг заковатли ўқувчи-ёшлари ўртасидаги баҳслар янада қизиқарли таассуротларга бой бўлди. Ўзлари таълим-тарбия олаётган мактаб ва мактабдошлари, қолаверса, устозлари шаъни, обрўси учун қизғин баҳслашган 65-сонли умумтаълим мактаби ўқувчи-ёшлари фахрли 1-ўринни эгаллашди. 22-сонли ва 29-сонли мактабларнинг жамоалари эса заковат баҳсларида бири-биридан қолишмасликларини намоён этишиб, ҳар иккала жамоа ҳам дуранг натижани қайд этишди ва 2-ўрин соҳиблари бўлишди.

Мусобақа ғолиблари бўлган 65-, 22- ва 29-сонли мактабларнинг билимдонлар жамоалари “Заковат” интеллектуал ўйинининг Қорақалпоғистон Республикаси босқичига йўлланмани қўлга киритдилар.

Ғолиб жамоалар ҳамкор ташкилотлар томонидан диплом ва қимматбаҳо совғалар билан тақдирландилар.

Шуниси эътиборлики, “Беш муҳим ташаббус” олимпиадаси доирасида ўтказилаётган мазкур билимдонлик бўйича беллашувлар ўсиб келаётган ёш авлоднинг юксак махнавиятли, жисмонан ва ахлоқан етук, шу билан бирга замон билан ҳамнафас, мактаб дастуридаги фанларни мукаммал ўзлаштиришларини таъминлашга йўналтирилгани билан муҳим аҳамият касб этади.

Робия ЙЎЛДОШЕВА