AMUDARYo TUMANIDA PAXTA TERIMI BOShLANIShIGA BAGʻIShLANGAN TADBIR BOʻLIB OʻTDI

Oʻlkamizga oltin kuz fasli kirib keldi. Dehqonlar erta bahorda dalalarga ekkan ekinlarining hosilini yigʻishtirib olish taraddudiga tushdilar. Ayniqsa, femrmer xoʻjaliklarida asosiy ekin – paxta koʻsaklari ochilib, dalalarda moʻl hosil toʻplandi. Fermerlarning, dehqonlarning yil-oʻn ikki oy davomida qilgan mehnati samarasini koʻrgan koʻzlar quvnaydi. Amudaryo tumani fermerlari bu yil ham dalalarda chinakamiga gʻayrat-shijoat bilan mehnat qilishib, moʻl hosil yetishtirishga erishdilar. Tabiat injiqliklarini, suv taqchilligini ular tajribasi, omilkorligi bilan yengib oʻtdilar.

10-sentyabr kuni joriy yilgi paxta yigʻim-terimi mavsumining ramziy boshlanishi va shu munosabat bilan “Oq oltin karvoni” tadbiri boʻlib oʻtdi.

Tumanning Toshyop ovuli hududidagi “Bekman Allamberganov” fermer xoʻjaligida boʻlib oʻtgan tadbirda Qoraqalpogʻiston Respublikasi Vazirlar Kengashi raisi Farhod Ermanov, Qoraqalpogʻiston Respublikasi Vazirlar Kengashi raisi oʻrinbosari, Oila va xotin-qizlar qoʻmitasi raisi Maryam Ahmedova, tumandagi sektorlar rahbarlari va qishloq xoʻjaligi masʼullari, fuqarolar yigʻinlari raislari hamda qishloq xoʻjaligi korxonalari, sohada faoliyat yuritayotgan xizmat koʻrsatuvchi tashkilotlar rahbarlari ishtirok etdilar.

Joriy yilning erta bahorida tumandagi masʼuliyati cheklangan jamiyat shaklidagi «Amudaryotex» xorijiy korxonasi paxta-toʻqimachilik klasteri bilan shartnoma tuzgan 348ta fermer xoʻjaliklarining jami 13 ming 900 gektar maydoniga chigit ekilgan edi. Bugunga kelib fermer xoʻjaliklari dalalarida dehqonlarning mashaqqatli mehnatlari evaziga moʻl hosil yetishtirildi. Ular jami 44 ming 650 tonnalik sarbaland paxta xirmonini bunyod etishni maqsad qilishgan.

Tadbirda Qoraqalpogʻiston Respublikasi Vazirlar Kengashi raisi Farhod Ermanov soʻzga chiqib, har bir xoʻjalik rahbari hosil taqdiriga javobgar ekanligini, paxtakorlarning erta bahordan urugʻ qadab, zarur agrotexnik tadbirlarni oʻz vaqtida hamda sifatli bajarib, mashaqqatli mehnatlari evaziga yetishtirilgan hosilini nobud qilmasdan yigʻib-terib olish bugungi kunning dolzarb vazifasi ekanligini taʼkidladi.

Qoraqalpogʻiston Respublikasi Vazirlar Kengashi raisi oʻrinbosari, Oila va xotin-qizlar qoʻmitasi raisi Maryam Ahmedova paxta yigʻim-terim ishlarini namunali tashkil etish, terimchilar uchun zarur sharoitlar yaratishga alohida eʼtibor qaratish lozimligini aytib, bu borada masʼullarga topshiriqlar berdi.

Shu kuni joriy yilning ilk paxta hosili xirmonga topshirildi.

Yigʻilishdan keyin MChJ shaklidagi “Amudaryotex” xorijiy korxonasida tadbir ishtirokchilariga osh berildi.

Eʼtirof etish joizki, joriy yilgi yetishtirilgan paxta hosilini qisqa muddatlarda yigʻib-terib olish boʻyicha tumanda 310ta terim otryadlari tashkil qilindi. Terim otryadlariga tajribali xoʻjalik faollari otryad rahbarlari etib tayinlandi. Otyadlarga jami 25 ming 682 nafar terimchilar jalb qilindi, har bir otryadga oʻrtacha 82 nafar terimchilar toʻgʻri keladi. Terimchilarning 6670 nafari paxta-toʻqimachilik klasteri va fermer xoʻjligi ishchilaridir.

Hisob-kitoblarga koʻra har bir terimchi kuniga oʻrtacha 50 kilogrammdan paxta tersa, bir kunda oʻrtacha 1 ming 284 tonna paxta terilib, 34 ish kunida belgilangan reja ado etiladi. Bundan koʻrinib turibdiki, 40-45 ish kunida terimni yakunlashning imkoniyati mavjud. Tumanda terim ishlarini uyushqoqlik bilan tashkil qilib, terim pullarini oʻz vaqtida toʻlab borish uchun bank xodimlari biriktirilgan.

Qabul punktlarida ham yongʻin xavfsizligi qoidalariga rioya qilingan holda mavsumga tayyorgarlik ishlari olib borildi va xoʻjaliklardan keltirilgan paxtalarni oʻz vaqtida qabul qilib olishga shay qilib qoʻyildi. Bundan tashqari, terimchilarni muntazam ravishda sifatli tushlik bilan taʼminlashga alohida eʼtibor qaratilib, fermer xoʻjaliklari tomonidan qozon-oʻchoqlar, toza ichimlik suvi saqlash idishlari va boshqa zarur ashyolar tayyor qilib qoʻyilgan.

Dehqon va fermerlarimizga mavsumni qisqa muddatlarda yakunlab, bu yil ham xirmonlari sarbaland boʻlishlarini tilab qolamiz.

Tuman hokimligi Axborot xizmati