АМУДАРЁ ТУМАНИДА ПАХТА ТЕРИМИ БОШЛАНИШИГА БАҒИШЛАНГАН ТАДБИР БЎЛИБ ЎТДИ

Ўлкамизга олтин куз фасли кириб келди. Деҳқонлар эрта баҳорда далаларга эккан экинларининг ҳосилини йиғиштириб олиш тараддудига тушдилар. Айниқса, фемрмер хўжаликларида асосий экин – пахта кўсаклари очилиб, далаларда мўл ҳосил тўпланди. Фермерларнинг, деҳқонларнинг йил-ўн икки ой давомида қилган меҳнати самарасини кўрган кўзлар қувнайди. Амударё тумани фермерлари бу йил ҳам далаларда чинакамига ғайрат-шижоат билан меҳнат қилишиб, мўл ҳосил етиштиришга эришдилар. Табиат инжиқликларини, сув тақчиллигини улар тажрибаси, омилкорлиги билан енгиб ўтдилар.

10 сентябрь куни жорий йилги пахта йиғим-терими мавсумининг рамзий бошланиши ва шу муносабат билан “Оқ олтин карвони” тадбири бўлиб ўтди.

Туманнинг Тошёп овули ҳудудидаги “Бекман Алламберганов” фермер хўжалигида бўлиб ўтган тадбирда Қорақалпоғистон Республикаси Вазирлар Кенгаши раиси Фарҳод Эрманов, Қорақалпоғистон Республикаси Вазирлар Кенгаши раиси ўринбосари, Оила ва хотин-қизлар қўмитаси раиси Марям Аҳмедова, тумандаги секторлар раҳбарлари ва қишлоқ хўжалиги масъуллари, фуқаролар йиғинлари раислари ҳамда қишлоқ хўжалиги корхоналари, соҳада фаолият юритаётган хизмат кўрсатувчи ташкилотлар раҳбарлари иштирок этдилар.

Жорий йилнинг эрта баҳорида тумандаги масъулияти чекланган жамият шаклидаги «Amudaryotex» хорижий корхонаси пахта-тўқимачилик кластери билан шартнома тузган 348та фермер хўжаликларининг жами 13 минг 900 гектар майдонига чигит экилган эди. Бугунга келиб фермер хўжаликлари далаларида деҳқонларнинг машаққатли меҳнатлари эвазига мўл ҳосил етиштирилди. Улар жами 44 минг 650 тонналик сарбаланд пахта хирмонини бунёд этишни мақсад қилишган.

Тадбирда Қорақалпоғистон Республикаси Вазирлар Кенгаши раиси Фарҳод Эрманов сўзга чиқиб, ҳар бир хўжалик раҳбари ҳосил тақдирига жавобгар эканлигини, пахтакорларнинг эрта баҳордан уруғ қадаб, зарур агротехник тадбирларни ўз вақтида ҳамда сифатли бажариб, машаққатли меҳнатлари эвазига етиштирилган ҳосилини нобуд қилмасдан йиғиб-териб олиш бугунги куннинг долзарб вазифаси эканлигини таъкидлади.

Қорақалпоғистон Республикаси Вазирлар Кенгаши раиси ўринбосари, Оила ва хотин-қизлар қўмитаси раиси Марям Аҳмедова пахта йиғим-терим ишларини намунали ташкил этиш, теримчилар учун зарур шароитлар яратишга алоҳида эътибор қаратиш лозимлигини айтиб, бу борада масъулларга топшириқлар берди.

Шу куни жорий йилнинг илк пахта ҳосили хирмонга топширилди.

Йиғилишдан кейин МЧЖ шаклидаги “Amudaryotex” хорижий корхонасида тадбир иштирокчиларига ош берилди.

Эътироф этиш жоизки, жорий йилги етиштирилган пахта ҳосилини қисқа муддатларда йиғиб-териб олиш бўйича туманда 310та терим отрядлари ташкил қилинди. Терим отрядларига тажрибали хўжалик фаоллари отряд раҳбарлари этиб тайинланди. Отядларга жами 25 минг 682 нафар теримчилар жалб қилинди, ҳар бир отрядга ўртача 82 нафар теримчилар тўғри келади. Теримчиларнинг 6670 нафари пахта-тўқимачилик кластери ва фермер хўжлиги ишчиларидир.

Ҳисоб-китобларга кўра ҳар бир теримчи кунига ўртача 50 килограммдан пахта терса, бир кунда ўртача 1 минг 284 тонна пахта терилиб, 34 иш кунида белгиланган режа адо этилади. Бундан кўриниб турибдики, 40-45 иш кунида теримни якунлашнинг имконияти мавжуд. Туманда терим ишларини уюшқоқлик билан ташкил қилиб, терим пулларини ўз вақтида тўлаб бориш учун банк ходимлари бириктирилган.

Қабул пунктларида ҳам ёнғин хавфсизлиги қоидаларига риоя қилинган ҳолда мавсумга тайёргарлик ишлари олиб борилди ва хўжаликлардан келтирилган пахталарни ўз вақтида қабул қилиб олишга шай қилиб қўйилди. Бундан ташқари, теримчиларни мунтазам равишда сифатли тушлик билан таъминлашга алоҳида эътибор қаратилиб, фермер хўжаликлари томонидан қозон-ўчоқлар, тоза ичимлик суви сақлаш идишлари ва бошқа зарур ашёлар тайёр қилиб қўйилган.

Деҳқон ва фермерларимизга мавсумни қисқа муддатларда якунлаб, бу йил ҳам хирмонлари сарбаланд бўлишларини тилаб қоламиз.

Туман ҳокимлиги Ахборот хизмати