Xalq deputatlari Amudaryo tuman Kengashining 63-sessiyasi toʻgʻrisida axborot

2023-yil 25-avgust kuni Amudaryo tumani hokimligining majlislar zalida Xalq deputatlari tuman Kengashining navbatdagi – 63-sessiyasi boʻlib oʻtdi.

Sessiyani Xalq deputatlari tuman Kengashi raisining oʻrinbosari Gʻulomjon Yeshniyozov ochdi va olib bordi.

Sessiya kotibligiga 22-Jumurtov saylov okrugidan deputat Baxram Shermanov saylandi.

Sessiyada deputatlar, tuman hokimi oʻrinbosarlari, hokimlik masʼul xodimlari, boʻlimlar, tashkilotlar rahbarlari, fuqarolar yigʻinlari raislari hamda ommaviy axborot vositalari vakillari ishtirok etdi.

Sessiyada dastlab hududni ijtimoiy-iqtisodiy rivojlantirish dasturining ijrosi, “Insonga eʼtibor va sifatli taʼlim yili” tuman dasturining bajarilishi, yoshlar muammolarini hal etish, ularning isteʼdodi va qobiliyatlarini rivojlantirish borasidagi ishlar va qonunchilik hujjatlarining oʻz vaqtida ijro etilishi toʻgʻrisida tuman hokimi vazifasini bajaruvchi Rashid Salayevning hisoboti tinglandi.

Hisobotda qayd etilganidek, joriy yilning birinchi yarmida asosiy ijtimoiy-iqtisodiy koʻrsatkichlar sezilarli darajada oʻsgan. Jumladan, sanoat hajmi 368,1 mlrd., xalq isteʼmol mollari hajmi 92,9 mlrd., qishloq xoʻjaligi hajmi 755,4 mlrd., investitsiyalar hajmi 238,7 mlrd., qurilish ishlari hajmi 167,3 mlrd., chakana savdo hajmi 376,3 mlrd., xizmatlar hajmi esa 311,3 mlrd. soʻmni tashkil qilib, barcha sohalarda oʻsish qayd etilgan.

Hududiy investitsiya loyihalari dasturi boʻyicha 2023-yilda tumanda 200,7 mlrd. soʻmlik 65ta loyihalari amalga oshirilishi va 924 ta yangi ish oʻrinlari yaratilishi belgilangan.

Sessiya ishida tuman Fuqarolik ishlari boʻyicha sudi raisi Qayrulla Atamuratov odil sudlovni amalga oshirish borasida 2023-yil 2-yanvardan 30-iyungacha amalga oshirilgan ishlar toʻgʻrisida axborot berdi.

Axborotda taʼkidlanganidek, Fuqarolik ishlari boʻyicha tuman sudi tomonidan ushbu davr holatiga koʻra fuqarolarning huquq va qonuniy manfaatlarini sud orqali himoyalanishini taʼminlash, ishlarni qonunda belgilangan muddatlarda sifatli koʻrib chiqish va aholi oʻrtasida huquqiy targʻibot ishlarini olib borish boʻyicha qator amaliy ishlar qilindi. Ushbu davrda sud tomonidan 2467ta ish koʻrib tamomlangan.

Tuman Moliya boʻlimi mahalliy byudjet ijrosi va hisobi sektor boshligʻi Abay Sagʻinbayev sessiyada tuman mahalliy byudjeti mablagʻlarining 2023-yil 6 oyi davomida sarflanishi toʻgʻrisida hisobot berdi. Taʼkidlanganidek, 2023-yil 6 oyi davomida mahalliy byudjetning daromadlar qismi rejasi 35 milliard 429,1 million soʻmga belgilangan boʻlib, 41 milliard 219,7 million soʻmga, yaʼni rejaga nisbatan 116,3 foizga yoki 5 milliard 790,7 million soʻm ortigʻi bilan bajarilishiga erishilgan. Shu bilan birga, byudjet xarajatlari rejasi kiritilgan oʻzgarishlardan keyin jami 173 milliard 71,5 million soʻmni tashkil qilgan. Ushbu davr mobaynida byudjet mablagʻlari xarajatlari hisobidan jami 154 milliard 766,1 million soʻmlik mablagʻlar sarflangan.

Sessiyada tuman Xalq qabulxonasi mudiri Erkin Rajabov aholidan kelib tushayotgan murojaatlarni tahlil qilgan holda, hokim yordamchilari faoliyatining natijadorligini oʻrganish yakunlari toʻgʻrisidagi masala yuzasidan axborot berdi. Axborotda taʼkidlanganidek, Oʻzbekiston Respublikasi Prezidentining Virtual qabulxonasiga 2023-yil 31-iyul sanasiga qadar tuman aholisi tomonidan jami 2463ta masalalar boʻyicha murojaatlar kelib tushgan. Shundan 2433tasi koʻrib chiqilgan boʻlib, 1956tasi qanoatlantirilgan, 1209tasi ijobiy hal qilingan.

Sessiyada zahiradagi yer maydonlarini ochiq elektron tanlovga chiqarish boʻyicha tuman Fermer, dehqon xoʻjaliklari va tomorqa yer egalari Kengashi raisi Ilhom Palvanov hisobot berdi. Hisobotda bugungi kunda «e-auksion» elektron platformasiga qoʻyilgan yer maydonlariga fuqarolar tomonidan hujjatlar taqdim qilinmasdan qayta savdoga chiqarilayotgani, shuni inobatga olib, tumanning baʼzi hududlarida yer maydonlarini 2 gektargacha boʻlgan oʻlchamlarda kattalashtirib elektron savdolarga chiqarish taklif qilindi. Taklif deputatlar tomonidan tasdiqlandi.

Sessiyada Kengash vakolatiga kiruvchi boshqa masalalar ham muhokama qilindi. Kun tartibidagi barcha masalalar atroflicha koʻrib chiqilib, tuman Kengashining tegishli qarorlari qabul qilindi.

Shuning bilan sessiya oʻz ishini yakunladi.

Tuman hokimligining Axborot xizmati