Tuman SEO va JS boʻlimida amalga oshirilayotgan ishlar boʻyicha media-tur tashkil etildi

Qoraqalpogʻiston Respublikasi Sanitariya-epidemiologik osoyishtalik va jamoat salomatligi boshqarmasi tomonidan boshqarmaning tuman boʻlimida amalga oshirilayotgan ishlarga doir media-tur tashkil etildi.

1-avgust kuni tumandagi ommaviy axborot vositalari vakillari, tegishli tashkilotlar hamda tuman Sanitariya-epidemiologik osoyishtalik va jamoat salomatligi boʻlimi xodimlari ishtirokida oʻtgan mazkur tadbirda tuman hududidagi sanitariya-epidemiologik osoyishtalikni taʼminlash borasidagi ishlar haqida keng turda maʼlumotlar berildi.

Tadbirda Beruniy nomli mahalladagi aholi xonadonlari, koʻchalarning sanitariya-gigiyenik holati koʻzdan kechirildi. Fuqarolarga tandir va oʻchoqlarni hojatxonaga yaqin qurmaslik, axlatlarni toʻgʻri kelgan joyga tashlamaslik, meva-sabzavotlarni yuvmasdan ishlatmaslik, qaynamagan suvni isteʼmol qilmaslik kerakligi tushuntirildi. Ularga yoz-kuz oylarida tarqaladigan yuqumli va parazitar kasalliklar haqida maʼlumotlar ham berib oʻtildi.

Tadbir ishtirokchilari Olmazor mahallasidagi koʻngil ochar joylarda, oziq-ovqat mahsulotlari doʻkonlari va umumiy ovqatlanish oʻrinlaridagi sanitariya holatlarini koʻzdan kechirishdi. Oybek nomli mahallada esa 6-sonli maktabgacha taʼlim tashkilotida boʻlib, kichkintoylar uchun yaratilgan shart-sharoitlar, yuvinish joylaridagi, oshxonadagi tozalik va oziq-ovqat mahsulotlarining saqlanish holatlarini koʻrib chiqishdi.

Taʼkidlash joizki, aholining sanitariya-epidemiologik osoyishtaligi bilan bogʻliq muammoli masalalarni hal etishning yangicha “Mahallabay” ishlash tizimi tashkil etilgan. Sanitariya-epidemiologik osoyishtalik va jamoat salomatligi boʻlimining mutaxassislaridan tuzilgan ishchi guruh vakillari aholi orasida targʻibot-tushuntirish ishlarini olib borib, turli kasalliklar tarqalashining oldini olishmoqda.

Mutaxassislar targʻibot-tashviqot ishlari davomida mavsumiy kasalliklar, oʻtkir yuqumli oshqozon-ichak kasalliklari, botulizm va boshqa turdagi ovqatdan zaharlanishlar, virusli gepatitlar, oʻta xavfli yuqumli va parazitar-gijja kasalliklarining profilaktikasi, ichimlik suviga qoʻyiladigan gigiyenik talablar toʻgʻrisidagi tarqatma materiallarni fuqarolarga eslatma tarzida berib chiqishmoqda.

Media-tur ishtirokchilari Amudaryo tumani Sanitariya-epidemiologik osoyishgalik va jamoat salomatligi boʻlimiga qarashli laboratoriyalarida ham boʻlishdi. U yerdagi ish jarayoni, tekshirishga olingan namunalar tahlili hamda boʻlim tomonidan aholini yuqumli kasalliklarga qarshi emlashdagi immunoprofilaktikaning borishi borasidagi ishlar bilan ham yaqindan tanishdilar.

Tadbir yakunida tuman Sanitariya-epidemiologik osoyishtalik va jamoat salomatligi boʻlimi boshligʻi Gulmurod Bekiyev hududda sanitariya-epidemiologik osoyishtalikni taʼminlash bilan birga sohada yosh kadrlarning mutaxassislik boʻyicha bandligini taʼminlashga alohida eʼtibor qaratilayotgani, shuningdek, ularning malakasini oshirish va oʻqish bilan amaliyotni birga olib borishiga sharoit yaratib berilayotgani haqida ham maʼlumotlar berdi. Shuningdek, yosh mutaxassislarni “Ustoz-shogird anʼanasi”ga asoslangan holda koʻp yillik tajribaga ega boʻlgan oliy toifali mutaxassislarga biriktirib, ularga aholining sanitariya-epidemiologik osoyishtaligini taʼminlashda sohaga oid boʻlgan qonunlar, qaror va sanitariya-qoida normalari hujjatlari asosida ish yuritish boʻyicha koʻnikmalar berilayotganini taʼkidlab oʻtdi.

Media-turda ishtirokchilarni qiziqtirgan savollarga ham atroflicha, batafsil javoblar berildi. Tadbirga tashrif buyurganlar boʻlim tomonidan amalga oshirilayotgan ishlar bilan yaqindan tanishib, sohaga oid maʼlumotlarga ega boʻldilar.

T.Babaniyazov, tuman SEO va JS boʻlimi sanitariya-shifokori.