Jayxun ilhomlari
Ustozlarga
Ahil bir jamoa, mudom ogʻzi bir,
Maqsadlari ulugʻ – tarbiya-taʼlim.
Koʻngillar pokiza, yoʻqdir aslo kir,
Ularni atashgan – Buyuk muallim!
Ular oddiy edi, oddiylik – xislat,
Bolani boladay suyar edilar.
Ibroyim Masharif, Shomurod Davlat,
Elning ertasi deb kuyar edilar.
Ularning sardori Ismoil ustoz,
Adolat, qatʼiyat unga yor edi.
Har bir darsi – maktab, yoshlarga parvoz,
Yoʻldosh Matqurbonday inson bor edi.
Aminboy ogʻaning oʻrgatgan harfi,
Maʼrifati bilan dunyoni kezdim.
Mirza aka, Kenjaboy, Oʻrozboy ogʻa,
Qarshisida oʻzni eng gʻarib sezdim.
Mamatsoliy aka, Egam Saidlar,
Aniq fanlar aro sulton edilar.
Moziydan soʻz ochsa, Tursunboy ustoz,
Buyuklar sinfda giryon edilar.
Har bir oʻgitida maʼno mujassam,
Soʻzlarim gʻaribdir, taʼriflar ham oz.
Bilim ham tajriba tahlil ila jam,
Qalbimizda yashar Nazarimbat ustoz.
Marhumlarning yodi qalbimizdadir,
Ruhlarini doim qilib turing shod.
Tiriklarga hurmat tilimizdadir,
Duolarda mudom qilib turing yod.
Ana, davradadir Rajabboy ustoz,
Adabiy dunyoga yetaklab kirgan.
Har bitta bolaga ishonch va parvoz,
Qanotlar baxsh etgan Masharif ustoz.
Rajabboy, Toʻraboy, Saparboy ogʻa,
Yangiboy ogʻalar bir dunyo edi.
Muallima opalar darsi oldida,
Hatto ertaklar ham boʻsh, sayoz edi.
Azizlar, Sizlardan koʻp erur qarzim,
Kamtarin pokiza, hokisor ustoz.
Bugun poyingizda qilaman taʼzim,
Sizgadir ehtirom, sizgadir eʼzoz.
Sanobar Xoʻjamurodova,
40-sonli maktab direktori.
Amudaryom
Jayxun boʻylarida gullab-yashnagan,
Manzilim-makonim, jon Amudaryom.
Oʻzga yurtga zarra havasim yoʻqdir,
Oʻzing sharaf-shonim, jon Amudaryom.
Oʻgʻil-qizlaringda shijoat bugun,
Imon-u eʼtiqod, itoat bugun.
Shu sabab yurtimda halovat bugun,
Osuda osmonim, jon Amudaryom.
Qoʻli gul, mirishkor, dehqonlaring bor,
Har sohada boʻlar zafar senga yor.
Baxtiyor insonlar yurti bu diyor,
Azal boylik koni, jon Amudaryom.
Yangi Oʻzbekiston – uying seniki,
Qadim-koʻhna qoʻshiq, kuying seniki.
Mustaqillik, Navroʻz toʻying seniki,
Mudom quvonch onim, jon Amudaryom.
Shomurod, shaʼningga gʻazal bitarman,
Qoʻlga sozim olib, kuylab oʻtarman.
Ellar ichra noming dovrugʻ etarman,
Tilimda dostonim, jon Amudaryom.
Shomurod XOʻJANOV, Doʻrman ovuli.
Yaxshilar
Yaxshilarga bu jonim fido,
Yomonlarga koʻrsatar Xudo.
Yuz burmasin yomonlikka deb,
Yaxshilarga ayladim nido.
Yomonlardan chiqmaydi hojat,
Yaxshilardan topilar najot.
Yaxshilardan yuk yerda qolmas,
Yaxshilar bor, mazmunli hayot.
Yaxshilarda koʻp yaxshi soʻzlar,
Quvonchlardan yosh toʻksin koʻzlar.
Yaxshilarga intilar borliq,
Yaxshilikdan eriydi muzlar.
Yaxshilarga jon baxshidadir,
Yaxshi boʻlsin doimo yoʻldosh.
Yaxshilar-la yashash yaxshidir,
Yaxshilardir har ishda qoʻldosh.
Bekbergan Tleumuratov,
Qipchoq OFY.
Hayoting oldinda
Oʻgʻlim, keng dunyoda hayoting oldda,
Bosgan qadamingning barisi ortda.
Shoʻx-shodon oʻynagan bolalik oʻtib,
Oʻynab yurgan vaqtlar sarfin unutib.
Umid qilgan ishing amalga oshir,
Umr oʻtguvchidir, oʻzingni shoshir.
Yaqin yoʻldoshingga doʻst boʻla bilgil,
Qingʻir qiliq emas, yaxshilik qilgʻil.
Ayyor koʻrsang, domiga tushma,
Shirin gapirar, deb soʻziga uchma.
Bogʻda doim gulmas, tikon ham oʻsar,
Chaqir tikon gulning yoʻlini toʻsar.
Har joy, har koʻchada ortdan otib tosh,
Dushmaning koʻzingga koʻrinsa yuvosh,
Bundan ogoh boʻlib omon oʻtgaysan,
Baxt qushini ushlab, qoʻlda tutgaysan.
Gʻamlarni kulib yeng, qaygʻudan chekin,
Ezgu ishlaringni unutma lekin.
Yoʻldan adashtirib ketguvchilar bor,
Surinsang, ustingdan kulguvchilar bor.
Aytganlarim baʼzan choʻpchakka oʻxshab,
Tuyulmasin senga, pandim ol toʻxtab.
Dono gaplar aytar uyning qarisi,
Bular boshdan oʻtgan bari-barisi.
Jumaboy HIDOYaTOV,
«Jayxun ilhomlari» NNT aʼzosi.
Yulduzim
Yulduzlar koʻrinmas osmonimda hech,
Porlab turar edi umid baxsh etib.
Xatoni oʻnglashga balki boʻldi kech?
Xavf-u xatarlarda qoldik toliqib.
Insonlar oʻzgardi vaqt oʻtgan sari,
Balki shuning uchun xiradir yulduz?
Mehr-u oqibat va eʼtibor qani?
Koʻngillar goʻyoki qahraton qish, muz.
Boʻlarmish insonning baxt yulduzi,
Baxtiyor boʻlsa gar quyoshday porlar.
Oʻsha yulduz porlab kecha-kunduzi,
Insonni orzular yoʻliga chorlar.
Hayot sinovlari yomon qiynadi,
Mening yulduzimni toʻsdi bulutlar.
Ammo orzularni koʻzim qiymadi,
Ulardan kechmadim, toʻzdi bulutlar.
Ana, porlab ketdi yana yulduzim,
Mehr nuri tushib yorishdi yoʻlim.
Muhayyo Jumaboyeva,
82-maktab oʻquvchisi.
Yomgʻir
Yogʻsa yomgʻir maydalab,
Maysalarni erkalab.
Yer yuzini siypalab,
Barakadan darakdir.
Dehqonga madadkor u,
Mehnat-la dalada u.
Yaxshilikka burkanur,
Dunyo husni ochilur.
Goh bulutning ortidan,
Moʻralaydi yer tomon.
Gohida shoʻxlik qilib,
Shovullaydi beorom.
Yuzlarimni chimchilab,
Gʻuborlarim aritgin.
Dilimdagi gʻamlarim,
Oʻzing-la olib ketgin.
Murodboy Madiyarov,
51-maktab oʻqituvchisi.
Fanlar
Fanlar goʻyo bir dunyo –
Oqadi daryo boʻlib.
Doʻstim, oʻqi, til oʻrgan,
Adashmaydi til bilgan.
Matematika fanlar shohi,
Ona tili sanʼatdir.
Rus tili tamal toshi –
Til bilmoq-chun daʼvatdir.
Fizikani bilsang gar,
Kimyoga qilgung safar.
Biologiya bilan,
Yashaging kelaverar.
Rus tili hamda ingliz,
Nemis, ispan, frantsuz.
Tillarin bilgan yutar,
Arab-u Hindga yetar.
Munisa Toʻremuradova,
6-maktab oʻquvchisi.
Orzu
Nomingni tanitish maqsad qilganman,
Qalqon qilib oldim vijdon-iymonni.
Men hali koʻklarga olib chiqaman,
Boshimga koʻtarib Oʻzbekistonni!
Eng katta boyligim oʻzingsan, yurtim,
Yuksalishing uchun tikaman jonim.
Men hali dunyoga olib chiqaman,
Yelkamga opichib Oʻzbekistonni!
Yurtimning azamat oʻgʻlonlari bor,
Vatan uchun ayamas jon ila qonni.
Biz hali koʻklarga olib chiqamiz,
Boshlarga koʻtarib Oʻzbekistonni!
Madina HASANBOYeVA, 2-sonli kasb-hunar maktabi oʻquvchisi.
OILAMIZ
Oilamizda besh kishi,
Yashaymiz ahil-inoq.
Hamjihatmiz doimo,
Bir-birimizdan quvnoq.
Dadam, onam ishlaydi,
Ukam va men oʻquvchi.
Juda erka singilcham,
Aytganin qildirguvchi.
Mehmon kelib qolsa gar,
Biz onamga dastyor.
Uyimiz fayzga toʻlar,
Bizga doim baxt yor.
Gulasal MAXSUDOVA,
76-maktab oʻquvchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
